ރަމަޟާން މަހުގެ ކުރިން ވެކްސިންގެ ފުރަތަމަ ޑޯޒް ޖެހުމަށް އަންގައިފި

ރަމަޟާން މަހުގެ ކުރިން ވެކްސިންގެ ފުރަތަމަ ޑޯޒް ޖެހުމަށް ހެލްތް ޕްރޮޓެކްޝަން އެޖެންސީ (އެޗްޕީއޭ)އިން އަންގައިފިއެވެ.

އެޗްޕީއޭއިން ބުނީ މާލެ ސަރަހައްދުގައި އުމުރުން 18 އަހަރާއި 60 އަހަރުގެ މީހުންގެ ތެރެއިން ކޮވިޑް-19 ވެކްސިންގެ ފުރަތަމަ ޑޯޒް ނުޖަހާ މީހުން ސިނޯފަރމް ވެކްސިންގެ ފުރަތަމަ ޑޯޒް ޖެހުން އަވަސް ކުރަން ޖެހޭ ކަމަށެވެ. ކުރިއަށްއޮތް ރަމަޟާން މަހުގައި ވެކްސިން ދިނުން ކުރިއަށް ގެންދެވޭނީ މަދު ގަޑިތަކެއްގައި ކަމުން ރަމަޟާން މަހުގެ ކުރިން ވެކްސިންގެ ފުރަތަމަ ޑޯޒް ޖެހުމަށް އެޗްޕީއޭއިން އެދިފައިވެއެވެ.

އެޗްޕީއޭއިން ބުނީ ސިނޯފަރމް ވެކްސިންގެ 2 ވަނަ ޑޯޒް، ފުރަތަމަ ޑޯޒް ޖަހާތާ 4 ހަފުތާ ވުމުން ޖެހޭނެ ކަމަށެވެ.

ސިނޯފަރމް ވެކްސިނަކީ ކޮވިޑް-19 އަށް ދެމުންގެންދާ އެހެން ވެކްސިންތަކެކޭ އެއްފަދައިން ރައްކާތެރި ވެކްސިނެކެވެ. މި ވެކްސިނަކީ "އިން އެކްޓިވޭޓެޑް" ވައިރަސް ބޭނުންކޮށްގެން ތައްޔާރުކޮށްފައިވާ ވެކްސިނެކެވެ. މިއީ ގިނަ ޒަމާންތަކެއް ވަންދެން ރައްކާތެރިކަން ޔަގީންކުރެވިފައިވާ ވެކްސިން އުފެއްދުމުގެ ޓެކްނޮލޮޖީއެކެވެ. ޒަމާނުއްސުރެ ޖަހަމުން ގެންދާ ޕޯލިއޯ، ރޭބީސް ފަދަ ވެކްސިންތައް ތައްޔާރުކޮށްފައިވަނީ މި ޓެކްނޮލޮޖީ ބޭނުންކޮށްގެންނެވެ. މި ވެކްސިން 25 ގައުމެއްގައި މިހާރު ބޭނުން ކުރެވެމުންދެއެވެ. އަދި ކުރިއަށް އޮތްތަނުގައި ކޮމިޝީލްޑް ވެކްސިން ޖަހާނީ 2 ވަނަ ޑޯޒަށް އެކަނި ކަމަށް އެޗްޕީއޭއިން ބުނެއެވެ.

ކޮވިޑް-19ށް ވެކްސިން ދިނުމުގެ ޕްރޮގްރާމް ރާއްޖޭގައި ފަށާފައިވަނީ ފެބްރުއަރީ މަހުގެ 1 ވަނަ ދުވަހުއެވެ. އެންމެ ފުރަތަމަ ރާއްޖޭގައި ދީފައިވަނީ އިންޑިޔާގެ ސެރަމް އިންސްޓިޓިއުޓުން އުފެއްދި ކޮވިޝީލްޑް ވެކްސިނެވެ. އެ ވެކްސިން މާރޗް މަހުގެ 15 ވަނަ ދުވަހާ ހަމައަށް މާލޭގައި ދެމުން އައިސްފައިވެއެވެ. އޭގެފަހުން މިހާރު ދެމުން އަންނަނީ ޗައިނާގެ ސިނޯފަރމް އިން އުފައްދާފައިވާ ވެކްސިނެވެ. އުމުރުން 18 އަހަރާއި 60 އަހަރާ ދެމެދުގެ މީހުންނަށް ދެމުން އަންނަނީ ސިނޯފަރމް ވެކްސިނެވެ.

މާލޭގެ 8 ތަނަކުން ވެކްސިން ދެމުން އަންނައިރު މޯބައިލް ޓީމުގެ ގޮތުގައި 2 ޓީމެއް އަންނަނީ މާލޭގައި ވެކްސިން ދިނުމުގައި ހަރަކާތްތެރިވަމުންނެވެ. އަދި އަތޮޅުތަކުގައި 169 ތަނަކުން އަންނަނީ ވެކްސިން ދެމުންނެވެ. ވެކްސިން ދީފައިވާ ތަފާސްހިސާބުތަކަށް ބަލާއިރު، މުޅި ރާއްޖޭގައި ވެކްސިން ދިން މީހުންގެ އަދަދު ވަނީ 230،130ށް އަރާފައެވެ.