ކުރީގެ ރައީސް، ރައީސް މުހައްމަދު ނަޝީދުގެ ހިޔާލުފުޅަށް އިހުތިރާމް ކުރައްވާ ކަމަށާއި، ވެންޓިލޭޓަރުގެ މައްސަލާގައި އިސްތިއުފާ ދޭން ޖެހޭ ހާލަތެއްގައި އެކަން ވެސް ކުރައްވާނެ ކަމަށް ޕްރޮސެކިޔުޓަރ ޖެނެރަލް (ޕީޖީ) ހުސައިން ޝަމީމް ވިދާޅުވެއްޖެ އެވެ.

ރާއްޖެ ޓީވީގެ ފަށާއިރު ޕްރޮގްރާމްގައި ޝަމީމް ވިދާޅުވީ ރައީސް ނަޝީދަކީ ވަރަށް އިހުތިރާމް ކުރައްވާ ބޭފުޅެއް ކަމަށާއި، މިރާއްޖޭގެ މަސްލަހަތު އެންމެ އިސްކޮށް ރައްކާތެރިކޮށްދެއްވާނެ ބޭފުޅެއް ކަމަށެވެ. އެހެންކަމުން އެމަނިކުފާނުގެ ނިންމެވުން ހިތުގެ އަޑިން ގަބޫލުކުރައްވާނެ ކަމަށް ޝަމީމް ވިދާޅުވިއެވެ.

ރައީސް ނަޝީދު ވާހަކަފުޅު ދައްކަވަނީ ވަރަށް ދެފުށްފެންނަ ގޮތަކަން ކަން ފާހަގަކުރައްވައި ޝަމީމް ވިދާޅުވީ އިސްތިއުފާ ދެއްވަން ޖެހޭ ކަމަށް ވިދާޅުވެ އެމްޑީޕީގެ ވަޓްސްއެޕް ގްރޫޕަކަށް އެމަނިކުފާނު ފޮނުއްވި މެސެޖު އޭނާއަށް ވެސް ފޮނުއްވި ކަމަށެވެ.

ޝަމީމް ވިދާޅުވީ އިސްތިއުފާ ދިނުމާ ގުޅޭ ގޮތުން ރައީސް ނަޝީދު ދައްކަވާ ވާހަކަފުޅަށް ދޭނެ އިތުރު ކޮމެންޓެއް ނެތް ކަމަށާއި، އެއަށްވުރެ ބޮޑަށް އެމަނިކުފާނަށް އިހުތިރާމް ކުރާ ކަމަށެވެ. އަދި އެވިދާޅުވާ ވިދާޅުވުން އެއީ އެންމެ ރަނގަޅު ގޮތްކަމުގައި ދެކޭ ކަމަށް ޝަމީމް ވިދާޅުވިއެވެ.

ޝަމީމް ވިދާޅުވީ މަގާމެއްގައި ހުންނާކަށް މާބޮޑު ޝައުގުވެރިކަމެއް ނެތް ކަމަށާއި، އިސްތިއުފާ އާ ބެހޭ ގޮތުން ކަނޑައަޅާފައި އޮންނަ އުސޫލުގެ ދަށުން ކަން ކުރާނެ ކަމަށެވެ.

ވެންޓިލޭޓަރުގެ މައްސަލާގައި އިސްތިއުފާ ދީފާނެކަމަށް ޝަމީމް ވިދާޅުވެފައިމިވަނީ ރައީސް ނަޝީދު ގައުމީ މަޖިލިސް ވަޓްސްއަޕް ގްރޫޕަށް ހުކުރު ދުވަހުގެ ރޭ ފޮނުއްވި މެސެޖަކާއި ގުޅިގެންނެވެ. އެމެސެޖްގައި ރައީސް ނަޝީދު ވިދާޅުވީ ވެންޓިލޭޓަރު ކޮރަޕްޝަން ބެލުމަށް ޝަމީމް ފެއިލްވެފައިވާ ކަމަށާއި، އޭނާ އެ މަގާމުން އިސްތިއުފާ ދޭން ޖެހޭ ކަމަށެވެ.

ވެންޓިލޭޓަރު ހިޔާނާތުގެ މައްސަލައާ ގުޅިގެން ޕީޖީ އޮފީހުން ބުނީ ކޮވިޑް-19 އާ ގުޅިގެން މިނިސްޓްރީ އޮފް ހެލްތުގެ ފަރާތުން ރާއްޖެ ގެންނެވުމަށް މަސައްކަތްކުރެއްވި ވެންޓިލޭޓަރުތަކާ ބެހޭ މައްސަލައިގައި އެންޓި ކޮރަޕްޝަން ކޮމިޝަނުން ޕީޖީ އޮފީހަށް ހުށަހެޅި އިތުރު މައުލޫމާތުތަކާ ގުޅިގެން، މައްސަލަ އަލުން ރިވިއުކޮށް ބަލާފައިވާ ކަމަށެވެ. އަދި އައު މައުލޫމާތާއި، މައްސަލައިގައި ކުރިން ހޯދިފައިވާ ހެކި ގަރީނާގެ މައްޗަށް ބަލައި، ޖިނާއީ ކުށެއްގައި ސާބިތުކޮށްދޭންޖެހޭ އުންޞުރުތައް ސާބިތު ކޮށްދެވިދާނެކަމަށް ނުފެންނަކަމަށް ޕީޖީ އޮފީހުން މައުލޫމާތު ދެއެވެ. އެއާއެކު، މި މައްސަލާގައި ދަޢުވާ ނުކުރުމަށް ނިންމި ސަބަބުތައް އެގޮތުގައި ދެމިއޮތްކަމަށް ފެންނަކަން ފާހަގަކޮށް ޕީޖީ އޮފީހުން ބުނީ، އެ ނިންމުމަށް ބަދަލުނުގެންނަށް ނިންމާފައިވާ ކަމަށެވެ.

ވެންޓިލޭޓަރުތައް ގަތުމުގައި ކޮރަޕްޝަން ހިމެނޭ ކަމަށް ތުހުމަތު ކުރެވޭ މައްސަލައާއި ގުޅިގެން އޭސީސީ އާއި ޕީޖީ އޮފީހާ ދެމެދު ޙިޔާލު ތަފާތުވުންތަކެއް އުފެދިފައިވާއިރު، ވެންޓިލޭޓަރު މައްސަލައިގައި އޭސީސީން ކުރި ތަހުގީގަށްފަހު ކުރީގެ ހެލްތު މިނިސްޓަރު އަބްދުﷲ އަމީންއާއެކު 11 ބޭފުޅެއްގެ މައްޗަށް ދައުވާކުރަން ޕީޖީގެ އޮފީހަށް ފޮނުވިއެވެ. އެހެންނަމަވެސް ޕީޖީން ނިންމާފައިވަނީ އެކަމުގައި ޖިނާއީ ދައުވާއެއް ކުރެވޭވަރަށް ހެކި ނެތްކަމަށެވެ. މި މައްސަލައާއި ގުޅިގެން ކުރިމަތިވީ ފިއްތުންތަކާއި ގުޅިގެން އޭރުގެ ހެލްތް މިނިސްޓަރ އަމީނު ވަނީ މިނިސްޓަރު ކަމުން އިސްތިއުފާވެސް ދެއްވާފައެވެ.

މި މައްސަލަ އަނބުރާ ފޮނުވާލެއްވި ސަބަބު ތަފްސީލު ކޮށްދެއްވަމުން ޕީޖީ ހުސައިން ޝަމީމް މީގެ ކުރިން ވިދާޅުވީ، މި މައްސަލައިގެ ތަހުޤީޤު ނިންމައި ޕީޖީ އޮފީހަށް ފޮނުވިއިރު، އެއްވެސް މީހެއްގެ މައްޗަށް ޖިނާއީ ދައުވާއެއްކޮށް، ކުށް ސާބިތުވާ ވަރަށް ހެއްކެއް ނެތް ކަމަށެވެ. ޕީޖީ ވިދާޅުވީ، އިދާރީ ގޮތުން މައްސަލަތަކެއް ފެންނަން ހުރި ނަމަވެސް، ޕީޖީ އޮފީހުން ބަލަނީ ޖިނާއީ ދައުވާއެއް ކޮށް، ސާބިތު ކުރެވިދާނެތޯ ކަމަށެވެ. އެހެން ނަމަވެސް، އޭސީސީގެ ރައީސާ މަރިޔަމް ޝިއުނާ ތަކުރާރުކޮށް ވިދާޅުވެފައިވަނީ ދައުވާ ކުރަން ފޮނުވީ އެކަށީގެންވާ ހެކި ހުރުމުން ކަމަށެވެ.