އިންޑިއާއިން ކޮވިޑްގެ އައު ވޭރިއަންޓެއް ފެނިއްޖެ
ކުރިން ފެނުނު ދެ ވޭރިއަންޓާއި ހިލާފަށް އައު ވޭރިއަންޓަކީ ނުރައްކާތެރި ވޭރިއަންޓެއް ނޫން
އިންޑިއާގެ ސިޓީއެއްގައި އާންމުން ނިކުމެ އުޅެނިކޮށް
ކޮވިޑް-19ގެ އައު ވޭރިއަންޓެއް އިންޑިއާއިން ފެނިއްޖެ ކަމަށް އެގައުމުގެ ސިއްހަތާއި ބެހޭ ވުޒާރާއިން ބުނެފިއެވެ.
އިންޑިއާގެ ސިއްހަތާއި ބެހޭ ވުޒާރާއިން ނެރުނު ބަޔާނެއްގައި ބުނީ އެގައުމުގެ މަހާރަޝްތުރާއިން ކޮވިޑް ޖެހިފައިވާ މީހުންގެ ހަށިގަނޑުން ނަގާފައިވާ ސާމްޕަލްތަކުން މީގެ ކުރިން ފެނިފައިނުވާ ވޭރިއަންޓެއް ފާހަގަ ކުރެވިފައިވާ ކަމަށެވެ. އަދި މީގެ ކުރިން ފެނުނު އައު ދެ ވޭރިއަންޓަކުން ފާހަގަ ކުރެވުނު ބަދަލުތައް، މިފަހަރު ފެނުނު ވެރިއަންޓުގައި ހުރި ކަމަށްވެސް އިންޑިއާގެ ސިއްހަތާއި ބެހޭ ވުޒާރާއިން ބުންޏެވެ.
އެހެންނަމަވެސް އިންޑިއާއިން ފެނުނު އައު ވޭރިއަންޓަކީ ކުރިން ފެނުނު ދެ ވޭރިއަންޓަށްވުރެ ނުރައްކާތެރި ވޭރިއަންޓެއް ކަމަށް އަދި ފާހަގަ ކުރެވިފައި ނުވާ ކަމަށާއި، އައު ވޭރިއަންޓު އިތުރަށް ދިރާސާ ކުރަމުން އަންނަ ކަމަށް އެގައުމުގެ ސިއްހަތާއި ބެހޭ ވުޒާރާއިން ވަނީ ބުނެފައެވެ.
އިންޑިއާއިން އައު ވޭރިއަންޓެއް ފެނިފައިވާކަން އެގައުމުން އިއުލާން ކޮށްފައި މިވަނީ އެގައުމުން ކޮވިޑަށް މީހުން ޕޮޒިޓިވްވާ އަދަދު އިތުރު ވެފައިވާ ދަނޑިވަޅެއްގައެވެ. އަދި މިދިޔަ ހަފްތާއަކީ އެގައުމުން އެންމެ ގިނަ މީހުން ކޮވިޑަށް ޕޮޒިޓިވްވެ އެންމެ ގިނަ މީހުން ބަލީގައި މަރުވެފައިވާ ހަފްތާ ކަމަށް އެގައުމުގެ ސިއްހަތާއި ބެހޭ ވުޒާރާގެ ތަފާސް ހިސާބުތަކުން ދައްކައެވެ.
އިންޑިއާގެ ސިއްހަތާއި ބެހޭ ވުޒާރާއިން ދާދިފަހުން ބުނީ އެގައުމަށް ކޮވިޑްގެ ދެވަނަ ރާޅެއް ބިންދާލައިފައިވާ ކަމަށާއި، ދެވަނަ ރާޅުގެ ފަހަތުގައި އައު ވޭރިއަންޓްތައް އިތުރު ވަމުން އައުން ފާހަގަވެފައިވާ ކަމަށެވެ.
