އެންސީއައިޓީގެ 18 ވަނަ އަހަރީ ދުވަސް ފާހަގަކޮށްފި
އެންސީއައިޓީ އުފެއްދީ 2003 ވަނަ އަހަރު
އެންސީއައިޓީގެ އަހަރީ ދުވަސް
އިންފޮމޭޝަން ޓެކްނޯލޮޖީގެ އެހީގައި ސަރުކާރުގެ ހިންގުން ހަރުދަނާކުރުމަށް އުފެއްދެވި ނޭޝަނަލް ސެންޓަރ ފޮރ އިންފޯރމޭޝަން ޓެކްނޯލޮޖީ (އެން.ސީ.އައި.ޓީ) އަށް 18 އަހަރުފުރުން ކުލަގަދަ ގޮތެއްގައި އެ އިދާރާއިން މިއަދު ފާހަގަކޮށްފިއެވެ.
މި ހަފްލާގައި މިނިސްޓްރީ އޮފް ކޮމިއުނިކޭޝަން، ސައިންސް އެންޑް ޓެކްނޯލޮޖީގެ ވެރިންނާއި މުވައްޒަފުންވެސް ބައިވެރިވެ ވަޑައިގަތެވެ. ޖަލްސާގެ ޝަރަފްވެރި މެހެމާން، މިނިސްޓަރ އޮފް ސްޓޭޓް ފޮރ ކޮމިއުނިކޭޝަން ސައިންސް އެންޑް ޓެކްނޯލޮޖީ އަލީ ސާލިހްގެ ވާހަކަފުޅުގައި 18 އަހަރާއިއެކު އެން.ސީ.އައި.ޓީ މުޅިން އާ ހަރުފަތަކަށް މިސްރާބުޖަހާފައިވާކަން ފާހަގަކުރެއްވިއެވެ. ކޮވިޑް-19ގެ ހާލަތުގައި ކިޔެވުމާއި މަސައްކަތުގެ މާހައުލުގައި އިންފޮމޭޝަން އަދި ކޮމިއުނިކޭޝަން ޓެކްނޯލޮޖީގެ މުހިންމުކަން ބަލައިގަނެވުނުއިރު، ރައީސުލްޖުމްހޫރިއްޔާ އިބްރާހީމް މުޙައްމަދު ސާލިހާއި ސަރުކާރުގެ މުހިންމު ވައުދުތަކެއް ހާސިލްކުރުމަށް އެން.ސީ.އައި.ޓީގެ ދައުރު މުހިންމުކަން ފާހަގަކުރެއްވިއެވެ.
ޚާއްސަކޮށް 100 ދުވަހުގެ ވައުދުތަކުގެ ތެރޭގައި ހިމަނައިގެން އެން.ސީ.އައި.ޓީން ތައްޔާރުކޮށްދެއްވި ކިޔުގައި ނުޖެހި ފްލެޓަށް އެޕްލައިކުރެވޭ ސިސްޓަމްގެ އަޕްގްރޭޑްގެ މަސައްކަތް 2 އަހަރުފަހުން މިއަދު އަނެއްކާވެސް އެން.ސީ.އައި.ޓީއާއި ހަވާލުކުރެވުނުކަމަކީ ސަރުކާރުން އެން.ސީ.އައި.ޓީއަށް ކުރާ އިތުބާރު ދައްކުވައިދޭ ކަމެއްކަމަށްވެސް ވިދާޅުވިއެވެ. އަދި ސަރުކާރުގެ ސިޔާސަތުތައް ތަންފީޒު ކުރުމަށް އިދާރާއަށް ބޭނުންވާ ފަންނީ މުވައްޒަފުން ހޯދުމަށް ދިމާވާ ދަތިތައް ހައްލުކުރުމުގެ މަސައްކަތް ކުރަމުން އަންނަ ކަމަށް ވިދާޅުވިއެވެ. މިކަމުގައި މިހާރު ހިންގެވުމާއި ހަވާލުވެ ހުންނެވި ވަޒީރު އަލްއުސްތާޛް ފައްޔާޟް އިސްމާއިލްގެ އެއްބާރުލުންފާހަގަކުރައްވާ އެމަނިކުފާނަށާއި، އެން.ސީ.އައި.ޓީގެ މުވައްޒަފުންނަށްވެސް ޝުކުރު އަދާކުރެއްވިއެވެ.
ހަފްލާގައި ބައިވެވަޑައިގެންނެވި ބޭފުޅުންގެ ތެރެއިން ޑެޕިއުޓީ މިނިސްޓަރ މުޙައްމަދު ޝާތިރުވަނީ އެން.ސީ.އައި.ޓީ އުފެދިގެން އައިގޮތާއި އިދާރާގެ 18 އަހަރުގެ ކާމިޔާބީތައް ހިއްސާކުރައްވާފައެވެ.
މި ހަފްލާގައި ވާހަކަދައްކަވަމުން މިނިސްޓްރީގެ ޕަރމަނަންޓް ސެކްރެޓަރީ މުޙައްމަދު ޝަރީފްވެސް ވަނީ އެން.ސީ.އައި.ޓީ އުފެއްދެވުމުގައި ފުރަތަމަ ކޮމިއުނިކޭޝަން މިނިސްޓަރ މިދުހަތު ހިލްމީ އަދި އެން.ސީ.އައި.ޓީގެ ކުރީގެ ޗީފް އެގްޒެކެޓިވް ފާއިގު އުމަރުގެ ބުރަ މަސައްކަތްފުޅު ފާހަގަކޮށް އެބޭފުޅުންނާއި، ކުރީގެ މުވައްޒަފުންނާއި މިހާރުގެ ޓީމަށް ޝުކުރުއަދާކުރައްވާފައެވެ.
މީގެ އިތުރަށް މިނިސްޓަރ އޮފް ސްޓޭޓް އަޙްމަދު އަފްޒަލް ދެއްކެވި ވާހަކަފުޅުގައި ތަނެއްގެ އެންމެ ބޮޑު ރައުސްމާލަކީ އެތަނެއްގެ މުވައްޒަފުން ކަމުގައި ފާހަގަކޮށް ކުރިއަށް އޮތްތަނުގައި ވެސް އިޚްލާސްތެރިކަމާއިއެކު މަސައްކަތްކޮށް ކާމިޔާބު ހޯދުމަށްވަނީ ހިތްވަރު ދެއްވާފައެވެ.
އެންސީއައިޓީ އުފައްދާފައިވަނީ 2003 ވަނައަހަރުގެ އޭޕްރީލް މަހުގެ 23 ވަނަދުވަހު އެވެ.
