މިހާރު ޖީބީއެއްގެ އަގު ހުރީ ފަސް ރުފިޔާ ބަޔަށްކަމަށް ވިދާޅުވި
ކޮމިއުނިކޭޝަން މިނިސްޓްރީގެ ސްޓޭޓް މިނިސްޓަރ އަލީ ސޯލިހް
އިންޓަނެޓްގެ އަގު ހެޔޮކުރުމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް ވެވަޑައިގެންނެވި ވަޢުދު ފުއްދާދެވިއްޖެކަމަށް ޓެލެކޮމިއުނިކޭޝަން މިނިސްޓްރީން ހާމަކޮށްފިއެވެ.
މިނިސްޓްރީ އޮފް ކޮމިއުނިކޭޝަން ސައިންސް އެންޑް ޓެކްނޮލޮޖީގެ ސްޓޭޓް މިނިސްޓަރ އަލީ ޞާލިޙް ރާއްޖެ ޓީވީގެ ފަލަސުރުޚީ ޕްރޮގްރާމްގައި ވާހަކަދައްކަވަމުންވަނީ، އިންޓަނެޓްގެ އަގު ހެޔޮކުރުމަށް ވޭތުވެ ދިޔަ ދެ އަހަރުގެ ތެރޭގައި ގިނަ މަސައްކަތްތަކެއް ކުރެވިފައިވާކަމަށް ވިދާޅުވެފައެވެ. އިންޓަނެޓްގެ ޚިދުމަތަކީ ސީދާ ސަރުކާރުން ދޭ ޚިދުމަތަކަށް ނުވާއިރު، މި ޚިދުމަތުގެ އަގު ކޮންޓްރޯލްކޮށް ކުޑަކުރުމަށް އިންޓަނެޓްގެ ޚިދުމަތާގުޅޭގޮތުން ޓެލެކޮމް ކުންފުނިތަކާއެކު ސަރުކާރުގެ ފަރާތުން ކުރަންޖެހޭ ގިނަ މަޝްވަރާ ބައްދަލުވުންތަކެއް ބާއްވާފައިވާކަމަށް ވިދާޅުވިއެވެ. އެގޮތުން މިހާރު ކުރަމުންދަނީ އިންޓަނެޓްގެ އަގާއި އަދި އިންޓަނެޓުން އިތުރު މަންފާތަކާއި ނަފާތަކެއް ލިބޭނީ ކޮން ގޮތަކަށްތޯ ބެލުމަށް ކުރަންޖެހޭ މަސައްކަތްތައްކަމަށާއި މި މަސައްކަތް އެއްވެސްއިރަކު ހުއްޓާނުލާކަމަށް އަލީ ޞާލިޙް ވިދާޅުވިއެވެ.
މި ހަރަދުގެ ވާހަކަދައްކާއިރު، މި ސަރުކާރުން ވެރިކަމާއި ހަވާލުވެގެން އައިއިރުގައި އިންޓަނެޓަށް ރައްޔިތުން ކުރާ ހަރަދާއި، މިހާރު ކުރާ ހަރަދާއި އަޅާ ކިޔަން ޖެހޭ ކަމަށް ވިދާޅުވެ އަލީ ސޯލިހު ވަނީ މިއަދު ކުންފުނިތަކާއި ވާހަކަދައްކައިގެން އިންޓަނެޓްގެ އަގުތަކަށް ބަދަލު ގެނެސްފައިވާކަން ފާހަގަކުރައްވާފައެވެ. އެގޮތުން މިއަދު ފަސް ރުފިޔާ ބަޔަށް ޖީބީއެއް އެބަ ލިބޭކަމަށާއި މިނިސްޓްރީން މަސައްކަތް ފެށިއިރާއި، މިދިޔަ އަހަރާއި ހަމައަށްވެސް، އަދި މިއަހަރުގެ މި ރަމަޟާންމަސް ފެށުމުގެ ކުރިންވެސް މި އަގު ހުރީ 33 ރުފިޔާގައިކަމަށް ވިދާޅުވިއެވެ. މީގެ އިތުރުން 1000 ރުފިޔާއަށް 30 ޖީބީ ލިބެމުންދިޔަ ބަޔަަކަށް، މިއަދު އެ އަގަށް 180 ޖީބީ ލިބޭކަމަށްވެސް ވިދާޅުވިއެވެ.
ރައްޔިތުންގެ ކަންބޮޑުވުންތައް ހުރީ އިންޓަނެޓްގެ އަގުގެ އެކަނި ނޫން ކަމަށާއި، ކަންބޮޑުވުންތައް ދެން ހުރި ދާއިރާތަކުން ކުރަންޖެހޭ މަސައްކަތް ކުރަމުންދާކަމަށް ވިދާޅުވިއެވެ. މި މޭރުމުން ވާހަކަދައްކަވަމުން ސްޓޭޓް މިނިސްޓަރ އަލީ ޞާލިޙްވަނީ، އިންޓަނެޓްގެ އަގު ހެޔޮކުރުމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް ވެވަޑައިގެންނެވި ވަޢުދު ފުއްދާދެވިއްޖެކަމަށް ވިދާޅުވެފައެވެ.
