ބޭރުން ގެންނަ ހާފިޒުންގެ ވިޒާއަށް އެދުމުގެ ފުރުސަތު ހުޅުވާލައިފި

ރަަމަޟާން މަހު މިސްކިތްތަކުގައި ތާރާވީޙް ނަމާދު ކުރުމަށް ގެންނަ ހާފިޒުންގެ ވިޒާއަށް އެދި ހުށަހެޅުމުގެ ފުރުސަތު އިމިގްރޭޝަނުން ހުޅުވާލައިފިއެވެ.

މިކަމަށް އެދި ހުށަހަޅަން ޖެހެނީ، އިމިގްރޭޝަންގެ އޮންލައިން ޕޯޓަލް މެދުވެރިކޮށެވެ. ވީޒާއަށް އެދި ހުށަހަޅަން ޖެހޭ ލިޔުންތަކުގެ ތެރޭގައި، ކައުންސިލުން ފުރިހަމަކޮށްފައިވާ, 'ސްޕެޝަލް ވިޒާ' އަށް އެދޭ ފޯމާއި، ވީޒާއަށް އެދޭ ފަރާތުގެ މައުލޫމާތު ފޯމާއި، 'ޕާސްޕޯޓު ޑާޓާ ޕޭޖް'ގެ ކުލަ ކޮޕީއާއި، ޕާސްޕޯޓު ސައިޒުގެ ފޮޓޯގެ އިތުރުން، އިސްލާމިކް މިނިސްޓްރީން ދޫކޮށްފައިވާ ހުއްދަ ހިމެނެއެވެ.

އިމިގްރޭޝަނުން މައުލޫމާތު ދޭ ގޮތުގައި، ހާފިޒުންގެ އާއިލާތަކަށް ދޫކުރުމަށް ހަމަޖެހިފައިވަނީ، 30 ދުވަހުގެ ޓޫރިސްޓް ވިޒާއެކެވެ. އަދި އާއިލާގެ މީހުން ގެންނަ ކަމުގައިވާނަމަ، އެ މީހުން ގެންނަ ކައުންސިލް އިދާރާއަކުން، އެ ފަރާތްތައް ސްޕޮންސަރ ކުރަންވާނެކަމަށް އިމިގްރޭޝަނުން ބުނެއެވެ.

ވިޒާއަށްއެދި ހުށަހަޅަން ޖެހޭ ލިޔެކިޔުންތައް، އޮންލައިންކޮށް ހުށަހެޅުމުން، ހުއްދަ ދިނުމަށް ހަމަޖެހިފައިވާ ފަރާތްތަކަށް ރަސްމީ 7 ދުވަހުގެ ތެރޭގައި، ސިސްޓަމް މެދުވެރިކޮށް އެންގޭނެ ކަމަށް އިމިގްރޭޝަނުން ބުނެއެވެ.

މިފަހަރުގެ ރަމަޟާންމަހު ރާއްޖެއިން ބޭރުން ހާފިޒުން ގެނައުމާއި ގުޅޭގޮތުން އިސްލާމިކް މިނިސްޓަރު މީގެ ކުރިން ވިދާޅުވީ، ރާއްޖެއިން ބޭރުން ހާފިޒުން ގެނައުމުގެ އިންތިޒާމުތައް ހަމަޖެއްސުމުގެ މަސައްކަތް އިސްލާމިކް މިނިސްޓްރީން ކުރަމުން ނުދާނެ ކަމަށެވެ. އެހެންނަމަވެސް ރަށްރަށުގެ ކައުންސިލުން ހާފިޒުން ގެންނަށް ބޭނުންވާކަމަށްވާނަމަ، އެކަމަށްޓަކައި މިނިސްޓްރީގައި އެދެވިދާނެ ކަމަށެވެ. އަދި މިހާތަނަށް ބައެއް ރަށްރަށުން މިނިސްޓްރީގައި އެކަމަށް އެދި ހުށަހަޅާފައި ވާކަމަށާއި، ރަށްރަށުގެ ކޮވިޑްގެ ހާލަތަށް ރިއާޔަތްކޮށް، ހުއްދަ ދެމުން ގެންދާކަމަށް މިނިސްޓަރ ވިދާޅުވިއެވެ.

މީގެ އިތުރުން، ހާފިޒުން ގެންނަ ކަމުގައިވާނަމަ، އެކަމުގެ އިންތިޒާމުތަށް ހަމަޖެއްސުމުގައި އެޗްޕީއޭގެ ގަވާއިދުތަކަށާއި މިންގަނޑުތަކަށް، ރަށްރަށުގެ ކައުންސިލުން ބަލަންޖެހޭނެ ކަމަށް މިނިސްޓަރ ވިދާޅުވިއެވެ. އެގޮތުން ކަރަންޓީނުވުމުގެ ވަގުތު އޮއްވައި ހާފިޒުން ގެނައުން މުހިންމުކަން މިނިސްޓަރ ފާހަގަ ކުރެއްވިއެވެ.