ރ.ހުޅުއްދުފާރުން ކޮވިޑް-19ގެ ކޭސްއެއް ފެނުމާ ގުޅިގެން ކުރިއަށް ގެންދިޔަ ކޮންޓެކްޓް ޓްރޭސިންގެ މަސައްކަތް ނިންމާލައިފިއެވެ.
އެރަށުގެ ކައުންސިލް ރައީސް އަލީ ޖާވިދު ރާއްޖެއެމްވީއަށް ވިދާޅުވީ ކޮވިޑް-19ށް މީހަކު ޕޮޒިޓިވްވުމާ ގުޅިގެން ކުރިއަށް ގެންދިޔަ ކޮންޓެކްޓް ޓްރޭސިންގެ މަސައްކަތް މިހާރު ނިންމާލެވިފައިވާ ކަމަށާއި، 61 ސާމްޕަލެއް ނެގުނު ކަމަށެވެ. އަދި ބުރާސްފަތި ދުވަހުގެ ހެނދުނު ސާމްޕަލްތައް ފޮނުވާފައިވާ ކަމަށް އޭނާ ވިދާޅުވިއެވެ.
ޖާވިދު ވިދާޅުވީ ކޮންޓެކްޓް ޓްރޭސިންގެ މަސައްކަތަށް އާއްމު ރައްޔިތުންގެ ފުރިހަމަ އެއްބާރުލުން ލިބިފައިވާ ކަމަށެވެ.
ބަލިން ރައްކާތެރިވުމަށް ގިނަ ފިޔަވަޅުތަކެއް އަޅާފައިވާކަން ފާހަގަކުރައްވައި ޖާވިދު ވިދާޅުވީ މިހާލަތުގައި ކެފޭ/ރެސްޓޯރެންޓްތަކުން ހަމައެކަނި ލިބޭނީ ޑެލިވަރީގެ ޚިދުމަތް ކަމަށެވެ. އަދި ކޮންމެހެން ބޭރަށް ނުކުންނަން ޖެހިގެން މެނުވީ ނުނިކުތުމަށް ވަނީ އިލްތިމާސްކޮށްފައެވެ.
މީގެ އިތުރުން ޖާވިދު ވިދާޅުވީ ރަށުގެ އާއްމު ހާލަތު ރަނގަޅު ކަމަށާއި، އާއްމު ޚިދުމަތްތަކަށް ބޭނުންވާ އާލަތްތައް ލިބޭ ކަމަށެވެ. އެގޮތުން ކާޑުގެ ބާވަތްތަކާއި ބޭސް ލިބޭކަން އޭނާ ފާހަގަކުރެއްވިއެވެ.
ހުޅުއްދުފާރުން ކޮވިޑް-19ގެ ކޭސްއެއް ފެނުމާ ގުޅިގެން އެރަށް މޮނިޓަރިންގެ ހާލަތަށް ގެނެސްފައިވަނީ މިމަހުގެ 24 ވީ ބުދަ ދުވަހުގެ ވަގުތެއްގައެވެ. އެރަށުން ޕޮޒިޓިވްވި މީހާއަކީ މި މަހުގެ 4 ވަނަ ދުވަހު އުނގޫފާރަށް ދަތުރުކޮށްފައިވާ މީހެކެވެ.
