ހުޅުދުއްފާރުގެ މަގުތައް ޒަމާނީ ފެންވަރަށް ތަރައްގީ ކުރުމުގެ މަޝްރޫއު ބާރު ސްޕީޑްގައި ކުރިއަށްދޭ!

ރ. ހުޅުދުއްފާރުގެ މަގުތައް ޒަމާނީ ފެންވަރަށް ތަރައްގީ ކުރުމުގެ މަޝްރޫއު ބާރު ސްޕީޑްގައި ކުރިއަށްދާ ކަމަށް ރޯޑް ޑިވެލޮޕްމެންޓް ކޯޕަރޭޝަން (އާރްޑީސީ)ން ބުނެފިއެވެ.

އާރްޑީސީން ބުނީ ހުޅުދުއްފާރު ބޮޑެތި މަގުތައް ޒަމާނީ ފެންވަރަށް ތަރައްގީ ކުރުމުގެ މަޝްރޫއުގެ ދަށުން، މިވަގުތު ކުރިޔަށްދަނީ މި މަސައްކަތުގެ ސެކްޝަން ބީ ގެ ހާބަރ ޕޭވިން މަސައްކަތާއި ކާސްޓިން ޔާރޑް ނިންމުމުގެ މަސައްކަތް ކަމަށެވެ. އަދި މަސައްކަތުގެ ސްޕީޑް ރަނގަޅުކަން އާރްޑީސީން ބުނެއެވެ.

އާރްޑީސީން ބުނީ ހުޅުދުއްފާރުގެ މަގު ހެދުމުގެ މަސައްކަތްތައް ކުރިއަށްދަނީ ކައުންސިލްގެ އެހީތެރިކަމާއެކު ކަމަށެވެ. އަދި ރައްޔިތުންގެ ފަރާތުން އެއްބާރުލުން ލިބޭކަން ފާހަގަކޮށްފައިވެއެވެ.

ހުޅުދުއްފާރުގެ މައި މަގުތަކުގައި ތާރު އެޅުމުގެ މަސައްކަތް އާރުޑީސީއާ ހަވާލުކޮށްފައި ވަނީ 88 މިލިއަން ރުފިޔާ އަށް، 390 ދުވަހުގެ ތެރޭ ނިންމާ ގޮތަށެވެ. މި އެއްބަސްވުމުގައި މިނިސްޓްރީ އޮފް ޕްލޭނިން އެންޑް އިންފްރާސްޓްރަކްޗާގެ ފަރާތުން ސޮއިކުރެއްވީ ޕަރމަނަންޓް ސެކްރެޓަރީ ޒީނިޔާ ޙަމީދު އެވެ. އާރުޑީސީގެ ފަރާތުން ސޮއިކުރެއްވީ ކުންފުނީގެ މެނޭޖިން ޑިރެކްޓަރު މޫސާ ޢަލީ މަނިކެވެ.

މި މަޝްރޫއުގެ ދަށުން ހުޅުދުއްފާރުގެ 3.2 ކިލޯ މީޓަރުގެ މަގުގައި ތާރު އަޅައި މަގުތަކުގައި ފެން ހިންދާ ނިޒާމު ގާއިމުކޮށް މަގުބައްތި ހަރުކުރާނެ އެވެ.