ހިޔާ ފްލެޓްގެ ފުލުހުންނާއި ސިފައިންގެ ކެޓެގަރީ އުވާލަން މަސައްކަތްކުރާ ކަމަށް ބުނެ ދައްކާ ވާހަކަ ޑިފެންސް މިނިސްޓަރާއި ޕްލޭނިންގ މިނިސްޓަރ ދޮގު ކުރައްވައިފިއެވެ.

ހުޅުމާލެ ދެވަނަ ފިޔަވަހީގައި އަޅާ ހިޔާ ފްލެޓުން ފުލުހުންނާއި ސިފައިންނަށް ކަނޑައަޅާފައިވާ ފްލެޓްތައް ސަރުކާރަށް ނަގަން މަޝްވަރާ ކުރަމުން އަންނަ ކަމަށް ތުހުމަތުކޮށް 'އާއްމު އެކުވެރިންގެ ގުޅުން' ޖަމުޢިއްޔާއިން ނެރެފައިވާ ބަޔާނަށް ރައްދުދެއްވައި ޑިފެންސް މިނިސްޓަރ މާރިޔާ އަޙްމަދު ދީދީ ވިދާޅުވީ، އެއީ ކަނޑައެޅިގެން ދޮގެއް ކަމަށާއި، ސިފައިންނަށް ދިނުމަށް ކަނޑައަޅާފައިވާ 300 ފްލެޓަށް އެދި ހުށަހެޅި ފޯރމްތައް ދިރާސާކޮށް ނިމިފައިވާ ކަމަށެވެ. މިކަން ސިފައިންނަށް އެނގޭނެކަމަށް ވެސް މިނިސްޓަރ ވިދާޅުވިއެވެ.

މިކަމާ ގުޅިގެން މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވީ، ފުލުހުންނާއި ސިފައިންނަށް ކަނޑައަޅާފައިވާ ފްލެޓްތައް ސަރުކަރަށް ނެގުމުގެ ވިސްނުމެއް ނެތް ކަމަށެވެ. އަދި މިފަދަ ދޮގުވާހަކަތައް ފަތުރާ މީހުންގެ އޮތީ ހަމަ އެންމެ މަގްސަދެއް ކަމަށެވެ. އެއީ ސަރުކަރާ މެދު ރައްޔިތުންގެ ހިތުގައި ނުތަނަވަސް ކަމާއި ނުރުހުން އުފެއްދުން ކަމަށެވެ.

އާންމު އެކުވެރިންގެ ގުޅުމުން ނެރެފައިވާ ބަޔާނުގައި ވަނީ، ހިޔާ ފްލެޓުން ފުލުހުންނަށް ކަނޑައެޅި 300 ފްލެޓާއި ސިފައިންނަށް ހާއްސަކުރި 300 ފްލެޓާއެކު މުޅި ޖުމްލަ 600 ފްލެޓު، ސަރުކާރަށް ނަަގައި އެ ދެ ކެޓެގަރީ އުވާލަން މަޝްވަރާ ކުރެވެމުންދާ ވާހަކަ އަދި އެކަމުގެ ކަންބޮޑުވުން އެ ޖަމްއިއްޔާގެ ‏މެންބަރުންގެ ތެރޭގައި ހިމެނޭ ބައެއް ފުލުހުންނާއި ސިފައިން ހިއްސާ ކޮށްފައިވާ ކަމަށެވެ.

‏ހިޔާ ފްލެޓާގުޅޭ ގޮތުން ސަރުކާރުން މިހާ ތަނަށް ކަންތައް ކޮށްފައިވާ ގޮތުން، މިފަދަ ކަމެެއް ކުރަން އުޅޭ ހަބަރު ލިބުމުން، އެފަދަ ކަމެއް ނުކުރާނޭ ބުނަން ވަރަށް ދަތި ކަމަށާއި، ނަތީޖާއެއްގެ ގޮތުން އެ ކެޓެގަރީގައި ހިމެނޭ ފުލުހުންނާއި ސިފައިން މިކަމާ ކަން ބޮޑުވާ ކަމަށް އެ ބަޔާނުގައި ވެއެވެ. އަދި މިކަމަށް ކަމާ ގުޅުންހުރި ފަރާތްތަކުން ޖަވާބުދާރީވުމަށް ގޮވާލާފައިވެއެވެ.