އިތުރު 2،009 މީހުން ވެކްސިން ޖަހައިފި
24 މާރިޗު 2021 | ބުދަ 17:52ރާއްޖޭގައި ޖަހަނީ ސިނޮފަރމްގެ ކޮވިޑް ވެކްސިނާއި ކޮވިޝީލްޑް ވެކްސިން
ކުޅުދުއްފުށީގައި ވެކްސިން ދިނުމުގެ ޕްރޮގްރާމް | ރާއްޖެއެމްވީ
ރާއްޖޭގައި ކޮވިޑް-19 ވެކްސިނޭޝަން ޕްރޮގްރާމް ފަށާފައިވާއިރު، އިތުރު 2،009 މީހުން ވެކްސިން ޖަހައިފި ކަމަށް ހެލްތު ޕްރޮޓެކްޝަން އެޖެންސީން ބުނެފިއެވެ.
އެޗްޕީއޭ އިން ބުނީ އެއީ މާލެ ސަރަހައްދުން ވެކްސިން ޖެހި 1،207 މީހުންނާއި އަތޮޅުތެރޭގެ ރަށްތަކުން ވެކްސިން ޖެހި 802 މީހުންކަމަށެވެ. މިއާއިއެކު ރާއްޖެއިން ކޮވިޑް-19 ވެކްސިންގެ ފުރަތަމަ ޑޯޒް ޖެހި މީހުންގެ ޖުމްލަ އަދަދު ވަނީ 224،979ށް އަރާފައެވެ.
އެޗްޕީއޭގެ ތަފާސްހިސާބުތައް ދައްކާގޮތުން މާލެ ސަރަހައްދުން 125،885 މީހުން ވަނީ މިހާރު ވެކްސިން ޖަހާފައެވެ. އަދި އަތޮޅުތެރެއިން 99،094 މީހުން ވަނީ ވެކްސިން ޖަހާފައެވެ.
ކޮވިޑް-19 ވެކްސިންތަކުގެ ތެރެއިން ރާއްޖެއިން ޖަހަނީ ކޮވިޝީލްޑް ވެކްސިނާއި ޗައިނާގެ ސިނޮފަރމް ކުންފުނީގެ ކޮވިޑް ވެކްސިނެވެ. ކޮވިޝީލް ވެކްސިންގެ ފުރަތަމަ ޑޯޒް މާލެ ސަރަހައްދުގައި ޖެހުން ހުއްޓާލާފައިވާއިރު، ހޯމަ ދުވަހު އެޗްޕީއޭއިން ވަނީ ސިނޮފަރމްގެ ކޮވިޑް ވެކްސިން ޖަހަން ފަށާފައެވެ. ތަފާތު ދެ ވެކްސިނެއް ރާއްޖޭގައި މިހާރު ޖަހަމުންދާއިރު، މި ދެ ވެކްސިނަކީވެސް ދެ ޑޯޒް ޖަހަންޖެހޭ ވެކްސިނެވެ.
ރާއްޖޭގައި ސިނޮފަރމް ވެކްސިންގެ ފުރަތަމަ ޑޯޒް ޖަހަން ފަށާފައިވާއިރު، އެކަށޭނެ މިންވަރަށް ދިފާއީ ނިޒާމަށް ސިނޮފަރމް ވެކްސިނުން އަސަރު ކުރަމުން ނުދާތީ ޔޫއޭއީން އެ ވެކްސިނުގެ ތިން ޑޯޒު ޖަހަން ނިންމައިފިއެވެ.
މީގެ އިތުރުން ވެކްސިންގެ ދެ ވަނަ ޑޯޒް ޖަހަން ފަށާނެކަމަށް އެޗްޕީއޭއިން އާންމުކޮށްފައިވާއިރު، ވެކްސިންގެ ދެ ވަނަ ޑޯޒް ޖެހޭނީ ބޭސްފަރުވާއަށް ނުވަތަ ތައުލީމު ހާސިލުކުރުމަށް ގައުމުން ބޭރަށް ދަތުރުކުރަންޖެހުމުގެ ސަބަބުން ފުރަތަމަ ޑޯޒް ޖެހިތާ 12-8 ހަފުތާގެ ތެރޭގައި ވެކްސިންގެ ދެ ވަނަ ޑޯޒް ފުރިހަމަ ނުކުރެވޭނެ ފަރާތްތަކަށް ކަމަށް އެޗްޕީއޭއިން ބުނެއެވެ. އަދި އެފަރާތްތައް ވެކްސިންގެ ފުރަތަމަ ޑޯޒް ޖެހިތާ 4 ހަފްތާ ހަމަވާންޖެހޭއިރު، ވެކްސިންގެ ދެ ވަނަ ޑޯޒް ޖަހަން ބޭނުންވާ ފަރާތްތަކުން ވެކްސިންޖެހުމަށް ނަން ނޯޓުކުރުމުން ވެކްސިން ޖެހުމަށް އެޕޮއިންޓްމަންޓް ހަމަޖައްސައި، ވެކްސިން ޖަހަން ހަމަޖެހިފައިވާ ގަޑިއާއި ތަން އަންގާނެކަމަށް އެޗްޕީއޭއިން ބުނެއެވެ.
