ދުންފުހުގެ ސަބަބުން ދުރު ފެންނަ މިންވަރު ދަށްވެ، ވައިގެ ދަތުރުފަތުރުގެ އުސޫލުތަކަށް ބަދަލު ގެނެސްފި
ދުރުފެންނަ މިންވަރު 5 ކިލޯމީޓަރަށްވުރެ ދަށްވާ ހާލަތުގައި ވީއެފްއާރު ގެ ބަދަލުގައި އެސްވީއެފްއާރަށް އަމަލުކުރަން ނިންމާފައިވޭ. ރާއްޖޭގެ ސަރަހައްދަށް ކޮންމެ އަހަރެއްގެ އިރުވައި މޫސުމުގައި އިންޑިޔާ އަދި ހިމާލިޔާ ސަރަހައްދުން އަންނަ ފުސްދުމާއެކު މި މައްސަލަ ކުރިމަތިވޭ.
ވެލާނާ އިންޓަނޭޝަނަލް އެއާޕޯޓަށް ފްލައިޓެއް ޖައްސަނީ: ރާއްޖޭ ސަރަހައްދުގެ ވައި އާދަޔާ ހިލާފަށް ވަނީ ނުސާފުވެފައި | ސަން އޮންލައިން
ދުންފުހުގެ ސަބަބުން ދުރު ފެންނަ މިންވަރު ދަށްވެފައިވާތީ މަތިންދާ ބޯޓު ދަތުރު ކުރުމުގައި ޢަމަލުކުރާ އުސޫލަށް ބަދަލު ގެނެސްފައިވާ ކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމްއޭސީއެލް އިން ބުނެފި އެވެ.
މި ދުވަސްވަރު ރާއްޖެ ސަރަހައްދަށް ދުންފުހުގެ އަސަރު ކުރަމުން ދިއުމާއެކު، ދުރު ފެންނަ މިންވަރު ވަނީ ވަރަށް ބޮޑަށް ދަށްވެފަ އެވެ.
އެމްއޭސީއެލް އިން ނެރުނު ބަޔާނެއްގައި ބުނީ ވައި ނުސާފުވެ ނުވަތަ ބޯކޮށް ވާރޭ ވެހުމުގެ ސަބަބުން ދުރު ފެންނަ މިންވަރު ދަށްވެއްޖެނަމަ ހެދިފައިވާ ގަވާއިދުތަކާ އެއްގޮތަށް މަތިންދާ ބޯޓު ދަތުރު ކުރުމުގައި އިތުރަށް ރައްކާތެރިކަމުގެ ފިޔަވަޅު އަޅާ ކަމަށެވެ. އަދި އެއްވެސް ސަބަބަކާހުރެ ދުރަށް ފެންނަ މިންވަރު ދަށްވެއްޖެނަމަ ދަތުރުކުރުމުގައި އިތުރު ރައްކާތެރިކަމުގެ ފިޔަވަޅު އެޅުމަކީ އެ ކުންފުނީގެ ޒިންމާއެއް ކަމަށެވެ. އަދި މިއީ އަބަދުވެސް މިފަދަ ހާލަތެއް މެދުވެރިވާ ހިނދު އަމަލު ކުރާ އުސޫލުކަން ވެސް އެކުންފުނިން ފާހަގަކުރި އެވެ.
މި ދުވަސްވަރަކީ، ދުންފުހުގެ އަސަރު ރާއްޖޭގެ ބޮޑު ސަރަހައްދަކަށް ކުރަމުންދާ ދުވަސްވަރެއް ކަމުން އެމްއޭސީއެލް އިން އަޅާފައިވާ އެއް ފިޔަވަޅަކީ ބަލައިގެން ދުއްވާ ގަވާއިދު ނުވަތަ ވިޝުއަލް ފްލައިޓް ރޫލްސް (ވީއެފްއާރު) ވަގުތީ ގޮތުން މަޑުޖައްސާލުމެވެ. އޭގެ ބަދަލުގައި އިތުރު އެހީތެރިކަން ލިބޭނެ ގޮތަކަށް ސްޕެޝަލް ވިޝުއަލް ފްލައިޓް ރޫލްސް (އެސްވީއެފްއާރު) އަށް ދަތުރު ކުރަން މިހާރު ވަނީ އަނގާފަ އެވެ. މި ގަވާއިދަށް އަމަލު ކުރާނީ، ދުރު ފެންނަ މިންވަރު 5 ކިލޯމީޓަރަށްވުރެ ދަށްވާ ހާލަތްތަކުގައި ކަމަށް އެމްއޭސީއެލް އިން ބުނެ އެވެ.
މިދިޔަ ބުދަ ދުވަހަކީ، ރާއްޖޭގެ އެކި ސަރަހައްދުތަކަށް ދުންފުހުގެ އަސަރު އެންމެ ބޮޑަށް ކުރި އެއް ދުވަހެވެ. އެ ދުވަހު ދުރު ފެންނަ މިންވަރު 1.5 ކިލޯމީޓަރަށް ދަށަށް ދިޔަ ކަމަށް މޫސުމާއި ބެހޭ ޤައުމީ އިދާރާ އިން ހާމަ ކޮށްފައިވެ އެވެ. ނަމަވެސް މިވޭތުވެ ދިޔަ ދެ ދުވަހު ރާއްޖެ ސަރަހައްދުގައި ދުރު ފެންނަ މިންވަރު ހުރީ 2 ކިލޯ މީޓަރުގައި ކަމަށް މެޓް އޮފީހުން ވަނީ ބުނެފަ އެވެ. އެ އިދާރާ އިން ލަފާކުރާ ގޮތުގައި އާދީއްތަ ދުވަހުން ފެށިގެން މިހާލަތު މިއަށްވުރެ ރަނގަޅު ވާނެ އެވެ.
ރާއްޖޭގެ ސަރަހައްދަށް ދުރު ފެންނަ މިންވަރު ދަށްވާ ގަޑިތަކުގައި ދަތުރު ކުރާ ފަރާތްތަކުން އެކަމަށް ސަމާލުވުމަށް މޫސުމާއި ބެހޭ ގައުމީ އިދާރާއިން ވަނީ އިލްތިމާސްކޮށްފަ އެވެ. ބޭރުގެ ނުސާފު ވައި ގޭތެރެއަށް ނުވަންނާނެ ހެން ގޭގެ ދޮރުތައް ލައްޕާފައި ބެހެއްޓުމަށް އެޗްޕީއޭ އިން އިރުޝާދު ދީފައިވެ އެވެ. އަދި ކުޑަކުދިންނާއި މާބަނޑު މީހުން ބޭރަށް ނުކުންނަން ޖެހިއްޖެ ހާލަތްތަކުގައި އިތުރު ސަމާލުކަމެއް ދިނުމަށް އެޗްޕީއޭ އިން ވަނީ ގޮވާލާފަ އެވެ.
ރާއްޖޭގެ ސަރަހައްދުގެ ވައި ނުސާފުވެފައި ވަނީ އިރުވައި މޫސުމުގައި ރާއްޖޭގެ އުތުރުން އިންޑިއާ އަދި ހިމާލިޔާ ސަރަހައްދުން އަންނަ ފުސްދުމާއެކުގަ އެވެ. ފަހަކަށް އައިސް ކޮންމެ އަހަރެއްގެ ވެސް އިރުވައި މޫސުމުގައި މި މައްސަލަ ރާއްޖެ އަށް ކުރިމަތިވެ އެވެ.
