ޔުވެންޓަސްގައި ރޮނާލްޑޯ މަޑުކުރާނެ: ނެޑްވެޑް

ޕޯޗުގަލުގެ ތަރި ކްރިސްޓިއާނޯ ރޮނާލްޑޯ ޔުވެންޓަސްގައި މަޑުކުރާނެ ކަމަށް އެ ޓީމުގެ ބޯޑް އޮފް ޑިރެކްޓަރުންގެ ވައިސް ޗެއާމަން އަދި ކުރީގެ ކުޅުންތެރިޔާ ޕަވެލް ނެޑްވެޑް ވިދާޅުވެއްޖެއެވެ.

ރެއާލް މެޑްރިޑަށް ނުވަ އަހަރު ކުޅެދިނުމަށްފަހު އުމުރުން 36 އަހަރުގެ ރޮނާލްޑޯ ޔުވެންޓަސްއަށް ބަދަލުވީ 2018 ވަނަ އަހަރުގެ ޖުލައި މަހުގެ ތެރޭގައި 100 މިލިޔަން ޔޫރޯއަށެވެ. އެފަހަރު ރޮނާލްޑޯ ވަނީ ޔުވެންޓަސްއާއެކު ހަތަރު އަހަރުގެ އެއްބަސްވުމެއް ހަދާފައެވެ. އެހެންކަމުން ރޮނާލްޑޯގެ އެއްބަސްވުން ހަމަވާނީ 2022 ވަނަ އަހަރެވެ.

ދާދި ފަހުން ސްޕެއިނުގެ މީޑިއާގައި ވަނީ ރޮނާލްޑޯ އަލުން ރެއާލަށް އަންނަން ބޭނުންވާ ކަމަށާއި، ރެއާލުންވެސް އޭނާ ގެންނަން މަސައްކަތްކުރާ ކަމަށް ރިޕޯޓުކޮށްފައެވެ. އަދި ފަހުން ނޫސްވެރިއަކު ކުރި ސުވާލަކަށް ޖަވާބުދެމުން ރެއާލުގެ ކޯޗު ޒިނެދިން ޒިދާން ވަނީ ރޮނާލްޑޯ އަލުން ރެއާލާ ގުޅުމުގެ ފުރުޞަތު އެބައޮތް ކަމަށް ބުނެފައެވެ.

އެކަމަކު ދާދި ފަހުން ދިން އިންޓަވިއުއެއްގައި ނެޑްވެޑް ވިދާޅުވީ 2022 ވަނަ އަހަރުގެ ޖޫން މަހުގެ ނިޔަލަށް ރޮނާލްޑޯ ޔުވެންޓަސްގެ އެއްބަސްވުމުގައި ހުރިއިރު، އޭގެ ކުރިން އޭނާ ކުލަބު ދޫކޮށް ނުދާނެ ކަމަށެވެ. އަދި މި މުއްދަތުގައި އެހެން ކުލަބަކަށްވެސް ރޮނާލްޑޯ ނުހޯދޭނެ ކަމަށް އޭނާ ވަނީ ވިދާޅުވެފައެވެ.

ޔުވެންޓަސް ދޫކޮށްލަން ރޮނާލްޑޯ އުޅޭ ކަމަށް ރިޕޯޓުކުރިއިރު، މީގެ ކުރިން ރެއާލް މެޑްރިޑާއެކު ޔުއެފާ ޗެމްޕިއަންސް ލީގު ހަތަރު ފަހަރު ރޮނާލްޑޯ ކާމިޔާބުކުރި ނަމަވެސް، އޭނާއަށް ޔުވެންޓަސްއާއެކު އަދި މިހާތަނަށް ޗެމްޕިއަންސް ލީގު ކާމިޔާބުކުރެވިފައެއް ނުވެއެވެ. އެގޮތުން މި ސީޒަނުގެ ޗެމްޕިއަންސް ލީގުން ޔުވެންޓަސް ވަނީ ދެވަނަ ބުރުން ކަޓާފައެވެ.

އެކަމަކު ޔުވެންޓަސްގައި ރޮނާލްޑޯ މިހާތަނަށް މޮޅު ކުޅުމެއް ދައްކާފައިވާއިރު، އޭނާ ވަނީ ޔުވެންޓަސްއަށް ކުޅެދިން 123 މެޗުގައި 95 ލަނޑު ޖަހާފައެވެ. އަދި ވަނީ މިހާތަނަށް ޔުވެންޓަސްއާއެކު އިޓާލިއަން ލީގާއި އިޓާލިއަން ސުޕަ ކަޕް ދެ ފަހަރު ކާމިޔާބުކޮށްފައެވެ.