ޓްރާންސްޕޯޓް އޮތޯރިޓީގެ ޤާނޫނު އުވާލުމަށް ހުށަހަޅައިފި
ބިލް ހުށަހެޅި މައިގަނޑު އެއް ސަބަބަކީ ޓްރާންސްޕޯޓް އޮތޯރިޓީއާއި މިނިސްޓްރީއާ ކުރަމުންދާ މަސައްކަތްތަކުގައި ފުށުއެރުންތަކެއް ހުރުން
ވައިކަރަދޫ ދާއިރާގެ މެމްބަރ ހުސައިން ޒިޔާދު- ބިލް ހުށަހަޅުއްވަނީ
މޯލްޑިވްސް ޓްރާންސްޕޯޓް އޮތޯރިޓީގެ ޤާނޫނު އުވާލުމުގެ ބިލް ރައްޔިތުންގެ މަޖިލީހަށް ހުށަހަޅައިފިއެވެ.
މިބިލް ސަރުކާރުގެ ފަރާތުން މަޖިލީހަށް ހުށަހެޅުއްވީ ވައިކަރަދޫ ދާއިރާގެ މެމްބަރ ހުސައިން ޒިޔާދެވެ. ބިލް ހުށަހަޅުއްވަމުން ހުސައިން ޒިޔާދު ވިދާޅުވީ ބިލް ހުށަހަޅުއްވަނީ މޯލްޑިވްސް ޓްރާންސްޕޯޓް އޮތޯރިޓީގެ ޤާނޫނުގެ ދަށުން އުފައްދާފައިވާ މޯލްޑިވްސް ޓްރާންސްޕޯޓް އޮތޯރިޓީ އުވާލައި އެއޮތޯރިޓީން ކުރަމުންދިޔަ މަސައްކަތްތައް މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަން އޮތޯރިޓީއަށް ބަދަލުކުރުމަށް ސަރުކާރުން ނިންމާފައިވާތީކަމަށެވެ. އެހެންކަމުން އެއޮތޯރިޓީ އުވާލައި އެއޮތޯރިޓީގައި ވަޒީފާ އަދާކުރަމުންދާ މުވައްޒަފުންނާއި އެއޮތޯރިޓީގެ މުދަލާއި ވަސީލަތްތައް ޓްރާންސްޕޯޓް މިނިސްޓްރީގެ ދަށަށް ބަދަލުކުރުމަށްޓަކައި ކަމާގުޅޭ އުސޫލުތައް ކަނޑައެޅުމާއެކު ޓްރާންސްޕޯޓް އޮތޯރިޓީގެ ޤާނޫނު އުވާލުމަށް ހުށަހަޅުއްވާކަމަށް ޒިޔާދު ވިދާޅުވިއެވެ.
މީގެއިތުރުން މި ބިލް ޤާނޫނަކަށްވެ އަމަލުކުރަން ފެށުމުގެ ކުރިން ޓްރާންސްޕޯޓް އޮތޯރިޓީގެ މުވައްޒަފުންގެ ގޮތުގައި ތިބި ސިވިލް ސަރވިސްގެ މުވައްޒަފުން ޓްރާންސްޕޯޓް މިނިސްޓްރީގެ މުވައްޒަފުންގެ ގޮތުގައި ހަމަޖެހޭނެކަމަށް މިބިލްގައި ބަޔާންކޮށްފައިވެއެވެ.
ހުސައިން ޒިޔާދު ވިދާޅުވީ ސަރުކާރުން ޓްރާންސްޕޯޓް އޮތޯރިޓީ އުވާލުމަށް ނިންމި އެންމެ ބޮޑު އެއް ސަބަބަކީ މިނިސްޓްރީގެ ފަރާތުން ދޭ ހިދުމަތްތަކުގައި މިނިސްޓްރީއާއި ޓްރާންސްޕޯޓް އޮތޯރިޓީ އާ ދެމެދުގައި މެންޑޭޓްގައި ހުރި ގާނޫނީ ފުށުއެރުންތަކުގެ ސަބަބުން ހިދުމަތް ދިނުމަށް ލަސްވެގެންދާތީ މިކަން ހައްލުކުރުމުގެ ގޮތުން ކަމަށެވެ.
މިބިލް ގާނޫނަކަށްވެ އަމަލުކުރަން ފެށުމުން އޭގެކުރިން ޓްރާންސްޕޯޓް އޮތޯރިޓީގެ މިލްކުވެރިކަމުގެ ދަށުގައި ނުވަތަ ބެލެހެއްޓުމުގެ ދަށުގައި ހުރި އެންމެހާ މުދަލާއި ފައިސާއާއި ވަސީލަތްތައް ދައުލަތުގެ ބަޖެޓުން މޯލްޑިވްސް ޓްރާންސްޕޯޓް އޮތޯރިޓީއަށް އެކަށައަޅައި ރައްޔިތުންގެ މަޖިލީހުން ފާސްކޮށްފައިވާ ފައިސާއާއި ގާނޫނީ ގޮތުންނާއި އެއްބަސްވުންތަކުގެ ދަށުން އެއޮތޯރިޓީއަށް ލިބިދޭ ހައްގުތަކާއި މަންފާތަކާއި އެއްބަސްވުމުގެ ދަށުން އެއޮތޯރިޓީން އަދާކުރަންޖެހޭ އެންމެހައި އިލްތިމާސްތައް ޓްރާންސްޕޯޓް މިނިސްޓްރީގެ ދަށަށް ބަދަލުކުރެވުނީކަމަށް މިބިލްގައި ބުނެފައިވެއެވެ.
