ކޮވިޑް 19 ގެ ހާލަތު ގޯސްވެ، އެޗްޕީއޭއިން މާލެ ސަރަހައްދުގައި އަޅާފައިވާ ފިޔަވަޅުތަކުގެ ސަބަބުން، ޓެކްސީ ސެންޓަރުތަކުގެ ވިޔަފާރިއަށް ލިބެމުންދާ ގެއްލުންތަކާ ގުޅިގެން، ޑްރައިވަރުންގެ ހުރި ކަންބޮޑުވުންތަކަށް، އުންމީދީ ޖަވާބެއް، ރައްޔިތުންގެ މަޖިލީހުގެ ރައީސް މުހައްމަދު ނަޝީދު ދެއްވައިފިއެވެ.

ޓެކްސީ ޑްރައިވަރުންގެ ކަންބޮޑުވުންތައް މަޖިލީހުގެ ރައީސަށް ހިއްސާކުރުމަށްޓަކައި، ސިޓީއެއް ލިޔެ މަޖިލީސް ކުރާގޭ ދޮރުމައްޗަށް އައުމުން، ރައީސް ނަޝީދު ވަނީ، މަޖިލީހުން ނިކުމެވަޑައިގެން އެމީހުންނާ ބައްދަލުކުރައްވާފައެވެ. އަދި އެމީހުންގެ ކަންބޮޑުވުންތައް އަޑު އައްސަވާ، އެކަމުގައި ކުރެއްވެން ހުރި މަސައްކަތްތައް ކޮށްދެއްވާނެކަމަށް ވިދާޅުވިއެވެ.

ނަޝީދު ވިދާޅުވީ، ޕަބްލިކް ހެލްތުން ގަވާއިދުތަކެއް ހަދާފައި ހުންނަނީ، ސިއްޚީ ބޭފުޅުންގެ އިރުޝާދުގެ ދަށުން ކަމަށާއި، އޭގެ ސަބަބުން ނުކުންނަ ނަތީޖާތައް މަޖިލީހުން ފާހަގަކޮށްދިނުމުން ގަވާއިދުތަކަށް ބަދަލު ގެނެސްފައި އެބަހުރިކަމަށެވެ.

މަޖިލީހުގެ އިދާރާއަށް ސިޓީ ހަވާލުކޮށްދިނުމަށް އެދިވަޑައިގަންނަވަމުން، ނަޝީދު ވިދާޅުވީ، ސިޓީ ލިބި ކޮމެޓީ މަސައްކަތް ފެށޭއިރަށް، ޑިރެކްޓަރ ޖެނެރަލް އޮފް ޕަބްލިކް ހެލްތު، މައިމޫނާ އަބޫބަކުރަށް، އެކަން ހިއްސާކުރައްވާނެކަމަށެވެ.

ނަޝީދު ވިދާޅުވީ، އާމްދަނީ ހޯދޭނެ ގޮތްތައް ބަންދުވެފައި އޮތުމުން ލިބޭ ދެރަ ވިސްނިވަޑައިގަންނަވާ ކަމަށާއި، އެއީ ސަރުކާރުން ވެސް އެދޭނެ ގޮތެއް ނޫންކަން ޔަގީން ކުރައްވާކަމަށެވެ.

ނަޝީދު ދެއްވި ޖަވާބާ ގުޅިގެން، ޓެކްސީ ޑްރައިވަރުން ބުނީ، މި މައްސަލައަށް ވަރަށް އަވަހަށް ހައްލެއް ލިބޭނެ ކަމުގެ އުންމީދުގައި، އެކަމަށް އިންތިޒާރު ކުރާނެކަމަށެވެ.