މާލޭ ކޮމަރޝަލް ހާބަރާއި ހުޅުމާލެ ޓާރމިނަލް އަށް މުދާ ކްލިއަރ ކުރަން ވަންނަ ކްލިއަރިންގ އެޖެންޓުންގެ "ކްލިއަރެންސް އެޖެންޓް ރަޖިސްޓްރޭޝަން ގަވާއިދަ"ށް ގެންނަން ޖެހޭ އިސްލާހުތައް ގެނެސް އެ ގަވާއިދު އެކުލަވާލުމުގެ މަސައްކަތް 30 އެޕްރީލް 2021 ކުރިން ނިންމުމަށް މޯލްޑިވްސް ޕޯޓްސް ލިމިޓެޑް (އެމްޕީއެލް)ށް ދެންނެވުމަށް ރައްޔިތުންގެ މަޖިލީހުން ފާސްކޮށްފިއެވެ.

ބުދަ ދުވަހުގެ ރައްޔިތުންގެ މަޖިލީހުގައި މިކަން ފާސްކޮށްފައި ވަނީ މިކަމަށްޓަކައި ނެގުނު ވޯޓުގައި ބައިވެރިވި 26 މެންބަރުންގެ އިއްތިފާގުންނެވެ.

މިފަހުން މާލޭ ވިޔަފާރި ބަނދަރުގައި ހިނގާފައިވާ ނުރައްކާތެރި ދެ ހާދިސާގައި ކަންހިނގާފައިވާ ގޮތް ބެލުމަށާއި، ހެދިފައިވާ ގައިޑްލައިންތަކާއި އުސޫލުތަކާ އެއްގޮތަށް މާލޭ ވިޔަފާރި ބަނދަރުގައި ސަލާމަތީ ކަންކަން ބެލެހެއްޓެމުން ދޭތޯ ބެއްލެވުމަށް އެދި ހުށަހަޅާފައިވާ މައްސަލަ ސްޓޭޓް އޯންޑް އެންޓަރޕްރައިސަސް ކޮމިޓީން ދިރާސާކޮށް ނިންމިގޮތުގެ ރިޕޯޓުގައި ބުނީ ބަނދަރުގައި ހިނގާ ކަންކަން މޮނިޓަރކުރުން ހަރުދަނާކުރަން ޖެހޭކަމާއި، އަދި އާންމު އުސޫލުން މޮނިޓަރ ކުރެވޭނެ ގޮތްތަކެއް ކަނޑައެޅުން މުހިންމު ކަމަށާއި، އަދި މިފަދަ ނިޒާމެއް ގާއިމުކޮށް މޯލްޑިވްސް ޓްރާންސްޕޯޓް އޮތޯރިޓީގެ ބޭފުޅުން ބަނދަރުގެ ކަންކަން ހިނގަމުން ދާގޮތް ބަލައި ރިޕޯޓްކުރާނެ މެކޭނިޒަމެއް ގާއިމްކުރުމަށް މޯލްޑިވްސް ޓްރާންސްޕޯޓް އޮތޯރިޓީއާއި އެމްޕީއެލްއަށް ދެންނެވުމަށް ނިންމާފައިވާ ކަމަށެވެ.

އަދި ދިވެހި ސަރުކާރުން ސޮއިކޮށްފައިވާ މުއާހަދާއެއް ކަމަށްވާ ސޭފްޓީ އޮފް ލައިފް އެޓްސީ (ސޯލާސް) ގެ ދަށުން ބަނދަރުތަކުގެ ސެކިއުރިޓީގެ ކަންކަން ބެލެހެއްޓުމަށް ލާޒިމް ކޮށްފައިވާތީ، ބަނދަރުތަކުގެ ސެކިއުރިޓީއާއި ގުޅޭގޮތުން އުސޫލެއް ކަނޑައެޅިފައި ވީނަމަވެސް ބަނދަރުތަކުގެ ސަލާމަތާ ބެހޭ ގަވާއިދެއް، އުސޫލެއް ގާއިމްކޮށްފައި ނުވާ ކަމުންވީ އެންމެ އަވަސް ފުރުސަތެއްގައި ބަނދަރުތަކުގެ ގާނޫނެއް އެކުލަވާލައި ރައްޔިތުންގެ މަޖިލީހަށް ހުށަހެޅުމަށް މޯލްޑިވްސް ޓްރާންސްޕޯޓް އޮތޯރިޓީއަށް ދަންނަވައި، އަދި މި ގާނޫނާއެކު އެކުލަވާލަންޖެހޭ ބަނދަރުތަކުގެ ސަލާމަތާބެހޭ ގަވާއިދުތައް އެކުލަވާލުމަށް ދެންނެވުމަށް ވެސް ވަނީ ނިންމާފައެވެ.

މީގެ އިތުރުން އިންޓަރނޭޝަނަލް ލޭބަރ އޯގަނައިޒޭޝަންގެ ސޭފްޓީ އެންޑް ހެލްތް އިން ޕޯޓްސްގެ އޮކިއުޕޭޝަނަލް ސޭފްޓީ އެންޑް ހެލްތު އެޑްމިނިސްޓްރޭޝަންގެ ގައިޑްލައިނާ އެއްގޮތަށް ކޮންޓެއިނަރ ޔާޑާއި ޕޯޓްސް ކްލިއަރިންގ އޭރިއާ ވަކިކުރުމަށް ދެންނެވުމާއިއެކު ސ. ހިތަދޫ ޕޯޓް ފެސިލިޓީއާއި ހދ. ކުޅުދުއްފުށި ޕޯޓް ފެސިލިޓީއާއި، ހުޅުމާލެ ޕޯޓް ފެސިލިޓީގެ ސެކިއުރިޓީ އެސެސްމަންޓް ހަދައި އިންޓަރނޭޝަނަލް ޝިޕް އެންޑް ޕޯޓް ފެސިލިޓީ ސެކިއުރިޓީ ކޯޑް ކޮމްޕްލައިންސް އޮޑިޓްގެ މަސައްކަތް ނިންމުމަށްފަހު މޯލްޑިވްސް ޓްރާންސްޕޯޓް އޮތޯރިޓީއަށް ހުށަހެޅުމަށް އެމްޕީއެލްއަށް އެންގުމަށް ވެސް ވަނީ ނިންމާފައެވެ.

އެމްޕީއެލްގައި މަސައްކަތް ކުރަމުންދާ އެކުންފުނީގެ މުވައްޒަފުންނާއި، ކުންފުނިން ޚިދުމަތް ހޯދާ ފަރާތްތަކުގެ ސަލާމަތާއި ރައްކާތެރިކަން ކަށަވަރުކުރުމުގެ ގޮތުން ހަރުދަނާ ފިޔަވަޅުތައް އަޅައި، ކުންފުނީގެ މުވައްޒަފުންނާއި، ބަނދަރުން ޚިދުމަތް ހޯދާ އެންމެހައި ފަރާތްތަކުން ކުންފުނީގެ ގަވާއިދުތަކާއި އުސޫލުތަކަށް ތަބާވޭތޯ ކަށަވަރުކުރުމަށް އެމްޕީއެލްއަށް އެންގުމާއިއެކު މާލޭ ވިޔަފާރި ބަނދަރުގައި ހިނގާފައިވާ ނުރައްކާތެރި ދެ ހާދިސާގައި އިހުމާލުވާ އެންމެހާ ފަރާތްތަކަށް ޖިނާއީ ތަހުގީގު ކުރުމަށް މޯލްޑިވްސް ޕޮލިސް ސަރވިސަށް ދަންނަވާ، އަދި ތަހުގީގު ކޮށް ނިންމުނު ގޮތުގެ ރިޕޯޓު ސްޓޭޓް އޯންޑް އެންޓަރޕްރައިސަސް ކޮމިޓީ ފޮނުއްވައި ދެއްވުމަށް އެންގުމަށް ވެސް ނިންމާފައިވެއެވެ.

ރިޕޯޓުގައި އިތުރަށް ބުނީ އެމްޕީއެލްގެ އެކްސިޑެންޓް އެންޑް އިންވެސްޓިގޭޝަން ކޮމިޓީން އެކުލަވާލައިފައިވާ އިންވެސްޓިގޭޝަން ރިޕޯޓުގައި، މާލޭ ވިޔަފާރި ބަނދަރުގައި ހިނގާފައިވާ ނުރައްކާތެރި ދެ ހާދިސާގައި އިހުމާލުވެފައިވާ ކަމަށް ފާހަގަ ކުރައްވާފައިވާ އެ ކުންފުނީގެ މުވައްޒަފުންގެ މައްސަލަ، އެ ކުންފުނީގެ ޑިސިޕްލިނަރީ ކޮމިޓީން ބެލުމަށްފަހު، އެ މުވައްޒަފުންނާއި މެދު އަޅަންޖެހޭ ފިޔަވަޅުތައް އެޅުމަށް ދެންނެވުމާއިއެކު ކުރިޔަށް އޮތްތާގައި މިފަދަ ހާދިސާއެއް ތަކުރާރުވިޔަ ނުދިނުމަށް، ކުންފުނީގެ ހިންގުން ހަރުދަނާކޮށް، ރައްކާތެރިވުމުގެ ގޮތުން އަޅަންޖެހޭ އެންމެހާ ފިޔަވަޅުތައް އެޅުމަށް މޯލްޑިވްސް ޕޯޓްސް ލިމިޓެޑަށް ދެންނެވުމަށް ނިންމާފައިވާ ކަމަށެވެ.