ސިވިލް ސަރވިސް ކޮމިޝަނުގައި މަދުވެގެން 2 އަންހެން މެމްބަރުން ތިބޭގޮތަށް ސިވިލް ސަރވިސް ގާނޫނަށް އިސްލާހު ހުށަހަޅައިފި
23 މާރިޗު 2021 | އަންގާރަ 15:12ބިލްގައި ހުރި އިސްލާހުތަކަކީ ސިވިލް ސަރވިސް ހިންގުމުގައި މިހާރު ދިމާވަމުންދާ ދަތިތައް ހައްލުކުރުމަށް ސިވިލް ސަރވިސް ކޮމިޝަނުން އެދިފައިވާ ކަންކަން
ރޮޒައިނާ އާދަމް: ސިވިލް ސަރވިސްގެ ޤާނޫނަށް ހުށަހަޅާފައިވާ އިސްލާހުގެ ބިލް ހުށަހަޅުއްވަނީ
އަންހެނުން ބާރުވެރިކުރުވުމުގެ ގޮތުން ސިވިލް ސަރވިސް ކޮމިޝަންގައި މަދުވެގެން ދެ އަންހެން މެމްބަރުން ތިބުމަށް ލާޒިމްވާގޮތަށް ސިވިލް ސަރވިސްގެ ޤާނޫނަށް އިސްލާހުގެނައުމުގެ ބިލް ހުށަހަޅާ އެބިލްގެ ބަހުސް ފަށައިފިއެވެ.
މިބިލް ރައްޔިތުންގެ މަޖިލީހަށް ހުށަހެޅުއްވީ އައްޑޫ މީދޫ ދާއިރާގެ މެމްބަރ ރޮޒައިނާ އާދަމްއެވެ. ބިލް ހުށަހަޅުއްވަމުން ރޮޒައިނާ ވިދާޅުވީ ބިލްގައި ހުރި އިސްލާހުތަކަކީ ސިވިލް ސަރވިސް ހިންގުމުގައި މިހާރު ދިމާވަމުންދާ ދަތިތައް ހައްލުކުރުމަށް ސިވިލް ސަރވިސް ކޮމިޝަނުން އެދިފައިވާ ކަންކަންކަމަށެވެ.
ސިވިލް ސަރވިސް ކޮމިޝަނުގައި އަންހެން ދެ މެމްބަރުން ތިބުމަށް ލާޒިމްކޮށް ހުށަހަޅާފައިވަނީ ކޮމިޝަންތައް އެކުލަވާލުން އެއްގޮތް ކުރުމުގެ ގޮތުން ކަމަށާއި ކުރިޔަށް އޮތްތަނުގައި މިބަދަލުތައް ދެން ހުރި ކޮމިޝަންތަކަށްވެސް ގެނައުމުގެ މަސައްކަތްކުރައްވަމުން ގެންދަވާކަމަށް ރޮޒައިނާ ވިދާޅުވިއެވެ.
ރޮޒައިނާ ހުށަހަޅުއްވާފައިވާ ބިލްގެ 10 ވަނަ މާއްދާގެ ހ ގައި ވަނީ ކޮމިޝަންގެ މެމްބަރުންގެ ގޮތުގައި މަދުވެގެން 2 އަންހެން މެމްބަރުން ހުންނަންވާނެއެވެ.
މީގެއިތުރުން ކޮމިޝަންގެ މެމްބަރުންގައި ހުރުން ލާޒިމްވާ ސިފަތަކުގެ ތެރޭގައި ފުރަތަމަ ޑިގްރީ ހާސިލްކުރުމަށްފަހު ހިންގުމުގެ ދާއިރާއިން މަދުވެގެން 10 އަހަރު ދުވަހުގެ ތަޖުރިބާ ލިބިފައިވާންޖެހޭނެކަމަށް ވެސް ވަނީ ހުށަހަޅާފައެވެ.
އަދި ކޮމިޝަންގެ ރައީސާއި ނައިބު ރައީސް އައްޔަނުކުރާނީ ރައީސުލްޖުމްހޫރިއްޔާކަމަށްވެސް މިބިލަށް ވަނީ އިސްލާހު ގެނެސްފައެވެ.
އެގޮތުން 17 ވަނަ މާއްދާއަށް ހުށަހަޅާފައިވާ އިސްލާހުގައި ބުނެފައިވަނީ ކޮމިޝަންގެ ރައީސަކު ނުވަތަ ނައިބު ރައީސަކު އައްޔަނުކުރުމަށް ބޭނުންވާ ކޮންމެ ފަހަރަކު، ކޮމިޝަނަށް އައްޔަނުކޮށްފައިވާ މެމްބަރުންގެ ތެރެއިން މީހެއްގެ ނުވަތަ މީހުންގެ ނަން ރައީސުލްޖުމްހޫރިއްޔާ ރައްޔިތުންގެ މަޖިލީހަށް ހުށަހަޅަންވާނެކަމަށް ވަނީ ބުނެފައެވެ.
އަދި ރައްޔިތުންގެ މަޖިލީހަށް ރައީސް ހުށަހަޅާ ނަންތަކުގެ ތެރެއިން ރައްޔިތުންގެ މަޖިލީހުގެ ޖަލްސާއެއްގައި ހާޒިރުވެ ވޯޓުގައި ބައިވެރިވެ މެމްބަރުންގެ އަޣްލަބިއްޔަތުން ފާސްކުރާ މީހަކު ކޮމިޝަނުގެ ރައީސްކަމުގެ މަގާމަށް ނުވަތަ ނައިބު ރައީސްކަމުގެ މަގާމަށް ރައީސުލްޖުމްހޫރިއްޔާ އައްޔަނުކުރަންވާނެކަމަށް 17 ވަނަ މާއްދާގެ ރ އަށް ހުށަހަޅާފައިވާ އިސްލާހުގައިވެއެވެ.
އެހެންނަމަވެސް މި ޤާނޫނަށް އަމަލުކުރަން ފަށާއިރު ކޮމިޝަންގެ ރައީސާއި ނައިބު ރައީސްކަމުގެ މަގާމަށް އައްޔަނުކޮށްފައިވާ މެމްބަރުން ގާނޫނުގައިވާ ގޮތުގެމަތިން މަގާމުން ވަކިވަންދެން ތިބޭނެކަމަށް މިބިލްގައިވެއެވެ.
