ޑރ މުއިއްޒުގެ މެއިޑް ދަންޖެހި މަރުވިގޮތް ތަހުޤީޤުކުރުމަށް ޖާބިރު ގޮވާލައިފި
މޭޔަރު ކަަމަށް ތާއީދު ކުރަނީ އަނަސްއަށް
ކާށިދޫ ދާއިރާގެ ޢިއްޒަތްތެރި މެންބަރު ޢަބްދުﷲ ޖާބިރު
މާލޭގެ މޭޔަރުކަމަށް ޕީޕީއެމް ޕީއެންސީ ކޯލިޝަނުން ކުރިމަތިލާފައިވާ ކުރީގެ ހައުސިން މިނިސްޓަރ ޑރ. މުހައްމަދު މުއިއްޒުގެ ގޭގައި ހައުސްމެއިޑަކަށް ގެންގުޅުނު މީހާ މަރުވި ގޮތް ތަހުޤީޤު ކުރުމަށް ކާށިދޫ ދާއިރާގެ މެމްބަރު އަބްދުﷲ ޖާބިރު ގޮވާލައްވައިފިއެވެ. އަދި މުއިއްޒުގެ ގޭގައި މަސައްކަތް ކުރަމުން އައި މެއިޑް ދަންޖެހި މަރުވީ ކޮންކަމަކާ ގުޅިގެންތޯ އާއި އެ މައްސަލަ ނުބެލި އޮތީ ކީއްވެގެން ތޯ ޖާބިރު ސުވާލު އުފެއްދެވިއެވެ.
މުއިއްޒުގެ ގޭގައި ހައުސްމެއިޑަކަށް ގެންގުޅުނު ބިދޭސީ އަންހެން މީހާ ދަންޖެހިފައި ހުއްޓާ ފެނިފައި ވަނީ 2012 ޑިސެމްބަރ 22 ވީ ހޮނިހިރު ދުވަހުއެވެ.
ޖާބިރު ވިދާޅުވީ، މާލެ ސިޓީ މޭޔަރުކަމަށް އެމަނިކުފާނު ތާއީދު ކުރައްވަނީ އަނަސްއަށް ކަމަށެވެ. މުއިއްޒުއަށް ތާއީދު ނުކުރާ ވަރަށް ގިނަ ސަބަބުތައް އެބަހުރި ކަމަށާއި، ތާރީޚަށް ބަލާއިރު މުއިއްޒުވަނީ ދައުލަތައް ގެއްލުންވާގޮތަށް ވަރަށް ގިނަ ކަންކަން ކޮށްފައިކަމަށް ޖާބިރު ވިދާޅުވިއެވެ. ރާއްޖެއަށް ވަރަށް ބޮޑެތި ބަދަލުތައް އަންނަތަން ފެންނަ ކަމަށާއި، ކައުންސިލް ތަކަކީ މަސައްކަތްކޮށް ނަތީޖާ ދައްކާ ކައުންސިލްތަކަކަށް ހެދުމަށްޓަކައި، ކައުންސިލްތައް ހިންގުމަށް ގާބިލް މީހުން ނެރެންޖެހޭ ކަމަށް ވެސް ވިދާޅުވިއެވެ. އެމްޑީޕީގެ ހުރިހާ ކެންޑިޑޭޓުންނަށް ޑީއާރްޕީން ތާއީދު ކުރާ ކަމަށާއި، އެމްޑީޕީގެ ކެނޑިްޑޭޓުންނަށް ތާއީދު ކުރަނީ، މި ޑިމޮކްރެސީ ދެމެހެއްޓުމަށް ކަމަށް ޖާބިރު ވިދާޅުވިއެވެ.
މީގެއިތުރުން ޖާބިރު ވިދާޅުވީ، ކުރިއަށް އޮތް ލޯކަލް ކައުސިލް އިންތިޚާބުގައި ޑީއާރްޕީން ނެރެނީ އެންމެ ކެންޑިޑޭޓެއް ކަމަށާއި، އެ ކެންޑިޑޭޓް އިންތިޚާބު ކާމިޔާބު ކުރާނެ ކަމުގެ ޔަގީންކަން އެބައޮތް ކަމަށެވެ.
