ނަޝީގެ އުފަންދުވަހާ ދިމާކޮށް ބޮޑު ސަޕްރައިޒެއް!

''ނަޝީ ކޭކްސް'' އެއީ މުޅި ރާއްޖެއަށް މަޝްހޫރު ކޭކެވެ. އެހާ ބޮޑަށް މީހުންގެ މެދުގައި މިކޭކް މަޝްހޫރުވެގެންދިޔައީވެސް ސަބަބެއް ނެތިއެއް ނޫނެއެވެ. ރީތި ޑިޒައިންތަކާ އެއްވަރަށް ކޭކުގެ ރަހައަށްވެސް ގިނަ ބައެއްގެ މަގުބޫލުކަން ލިބިގެން ދިޔައެވެ. ކޭކުގެ ދުނިޔޭގައި ނަޝީ ކޭކްސްގެ ވެރިޔާ އައިމިނަތު ނަޝީދާ އަބޫބަކުރު (ނަޝީ) ފިޔަޖަހަމުން ދާއިރު، އަނެއްކާ ވެސް މިވަނީ ވަރަށް އުފާވެރި ޚަބަރެއް ދީފައެވެ.

ނަޝީގެ އުފަން ދުވަހާ ގުޅިގެން މިވަނީ ''ނަޝީ ޗޮކްލެޓް'' ލޯންޗްކޮށްފައެވެ. ހަމަގައިމުވެސް މިއީ ނަޝީގެ ސަޕޯޓަރުންނަށް ލިބުނު ކުޑަ ސަޕްރައިޒަކަށް ނުވާނެއެވެ. އަދި ނަޝީގެ ކޭކްސް މީރު މީހުންނަށް ލިބުނު އިތުރު ހިތްހަމަ ޖެހުމެއްވެސް މެއެވެ. އެގޮތުން ނަޝީ މިވަނީ ޗޮކްލެޓް ހެދުމުގެ މަސައްކަތަށް ވަދެވުނު ގޮތް ރާއްޖެއެމްވީއަށް ހިއްސާކޮށް ވަރަށް އުންމީދީ މެސެޖްތަކެއްވެސް މިވަނީ ދީފައެވެ.

ނަޝީ ކިޔައިދިން ގޮތުގައި ޗޮކްލެޓް ހެދުމުގެ މަސައްކަތަށް ވަދެވުނީ ފިިރިމީހާ ދިން ހިޔާލެއްގެ ސަބަބުންނެވެ. 2019 ވަނަ އަހަރުން ފެށިގެން މި ދާއިރާއަށް ވަނުމަށް އޭނާ މަސައްކަތް ކުރިއެވެ. އެގޮތުން ދުބާއީ، ސިންގަޕޫރު އަދި ރަޝިޔާ މީހެއް ކައިރިން ޗޮކްލެޓް ހެދުމަށް ޚާއްސަ ކޯސްތަކެއް ވަނީ ހަދާފައެވެ. 2020 ވަނަ އަހަރު ''ނަޝީ ޗޮކްލެޓް'' ބާޒާރަށް ނެރުމަށް މަސައްކަތް ކުރި ނަމަވެސް ލަސްވެގެންދިޔައީ ކޮވިޑް-19ގެ ޕެންޑަމިކްއާ ގުޅިގެންނެވެ. ނަމަވެސް މިދިޔަ އަހަރުގެ ތެރޭގައި ނަޝީ ވަނީ ޗޮކްލެޓް ހެދުމަށްފަހު ކަސްޓަމަރުންނަށް ޗޮކްލެޓްގެ ރަހަ ދައްކާލާފައެވެ.

ނަޝީ ޗޮކްލެޓަކީ އެހެން ޗޮކްލެޓްތަކާ ވަރަށް ތަފާތު ޗޮކްލެޓެކެވެ. 12 ފްލޭވަރ ބޭނުންކޮށްގެ ޗޮކްލެޓްތައް ހަދާފައިވަނީ ޚާއްސަ ޑިޒައިންތަކެއް މައްޗަށެވެ. ޗޮކްލެޓްތައް ހަދާފައި ހުންނަ ޑިޒައިންތަކުން ހިތް ދަމައިގަންނައިރު ރަހަ ވެސް އެހާ މީރެއެވެ. ނަޝީ ކިޔައިދިން ގޮތުގައި މިއީ ވަރަށް ބުރަ މަސައްކަތެކެވެ. އަދި ވަރަށް ގިނަ ވަގުތުވެސް މި މަސައްކަތަށް އޭނާ ހޭދަކުރެއެވެ. މީގެ އިތުރުން ނަޝީ ވަނީ ''ނަޝީ ޗޮކްލެޓް ފިހާރަ'' އެއްވެސް ހުޅުވަން ނިންމާފައެވެ.

މިއީ ޚާއްސަ ހަފްލާތަކުގައި ހަދިޔާއެއް ގޮތުގައި ދެވޭނެ އެންމެ ރަނގަޅު އެއް ހަދިޔާއެވެ. ކޭކު ހެދުމުގެ ދާއިރާގައި 38 އަހަރު ހޭދަކޮށްފައިވާ ނަޝީގެ ވިސްނުން މިހާރު ކުރީ ކޭކުގެ އިތުރުން ޗޮކްލެޓް ހެދުމުގެ ދާއިރާއިން ދެވޭނެ އެންމެ ކުރިއަކަށްދާށެވެ.

ނަޝީގެ އުފަންދުވަހާ ދިމާކޮށް 12 ފްލޭވަރ އަދި 6 ފްލޭވަރ ހިމެނޭ ޗޮކްލެޓް ބޮކްސްއެއް ނެރިފައިވާއިރު، އޯޑަރ ކޮށްގެން އަދި ނަޝީ ކޭކްސް ފިހާރައިން ވެސް ޗޮކްލެޓް ލިބޭނެއެވެ. ކުރިއަށް އޮތްތަނުގައި އާއްމުންގެ ތަރުހީބަށް ބެލުމަށްފަހު އައު ފްލޭވަރތައް ނެރެމުންދާނެ ކަމަށް ނަޝީ ބުނެއެވެ.

ނަޝީ ފާހަގަކުރި ފަދައިން މިއީ އުދަނގޫ މަސައްކަތެއް ނަމަވެސް ކުރިމަގު އޮތް ދާއިރާއެކެވެ. މަސައްކަތްތެރި ޒުވާނުން މިއަދު މިދާއިރާއަށް ނުކުންނަން އެބަޖެހެއެވެ. ހުނަރުގެ ބޭނުން ހިފަންޖެހެއެވެ. އުފެއްދުންތެރިކަން އިތުރު ކުރިވަރަކުން ގައުމަށް ވެސް ގިނަ ކުރިއެރުންތަކެއް ލިބޭނެއެވެ. ނަޝީމެން ފަދަ މީހުންގެ ފަރާތުން މިސާލު މިއަދު ނަގަން ޖެހެއެވެ.