އޮސްޓްރޭލިޔާއިން ރާއްޖެއަށް ކަނޑައަޅާފައި ހުންނަ ސަފީރު ޑޭވިޑް ހޮލީ، ރައްޔިތުންގެ މަޖިލީހުގެ ރައީސް މުހައްމދު ނަޝީދުގެ އަރިހަށް ޒިޔާރަތް ކުރައްވައިފިއެވެ. ސަފީރުގެ މި ޒިޔާރަތުގައި ދެޤައުމުގެ ގުޅުން އިތުރަށް ބަދަހިކުރުމާ ބެހޭގޮތުން މަޝްވަރާކުރެއްވިއެވެ. ރައްޔިތުންގެ މަޖީިލީހުގެ އިދާރާގައި އޮތް މި ބައްދަލުކުރެއްވުމުގައި މަޖިލީހުގެ ރައީސްގެ އިތުރުން ނައިބް ރައީސް އިވާ އަބްދުﷲ އާއި އަމީން އާންމު ފާތިމަތު ނިއުޝާ ވެސް ބައިވެރިވެވަޑައިގެންނެވިއެވެ.
ރާއްޖެއާއި އޮސްޓްރޭލިޔާއާ ދެމެދު ޚާރިޖީ ގުޅުން ޤާއިމުކޮށްފައިވަނީ 1974 ވަނަ އަހަރުގައެވެ. އޭގެފަހުން އެކި ރޮނގު ރޮނގުން އޮސްޓްރޭލިޔާއިން ގެންދަނީ ރާއްޖެއަށް އެހީތެރިވެ ދެއްވަމުންނެވެ. އެގޮތުން ތައުލީމީ ދާއިރާއިންނާއި ސިއްޚީ ދާއިރާއިން އޮސްޓްރޭލިއާއިން ރާއްޖެއަށް ދެމުން އަންނަ އެހީތެރިކަން ފާހަގަކުރެވެއެވެ. އޮސްޓްރޭލިއާއިންވަނީ ކޮވިޑް-19އާ ގުޅިގެން ވެސް ރާްޖެއަށް އެހީތެރިކަން ފޯރުކޮށްދީފައެވެ.
