އިންފޮމޭޝަން ކޮމިޝަނަރުގެ ނިންމުން އިސްތިއުނާފީ މައްސަލައެއްގެ ގޮތަށް ބެލެން ނެތްކަމަށް ހައިކޯޓުން ނިންމައިފި

އިންފޮމޭޝަން ކޮމިޝަނަރު ނިންމަވާފައިވާ މައްސަލަތައް، އިސްތިއުނާފީ މައްސަލައެއްގެ ގޮތުގައި ބެލުމުގެ އިޚްތިޞާސް ހައިކޯޓަށް ލިބިގެން ނުވާކަމަށް، އެ ކޯޓުން މައްސަލަ ބެއްލެވި ފަނޑިޔާރުންގެ އިއްތިފާޤުން ނިންމައިފިއެވެ.

އާދީއްތަ ދުވަހު ހައިކޯޓުން ނިންމާފައިވާ މިނިންމުމަކީ، އިންފޮމޭޝަން ކޮމިޝަނަރު ނިންމަވާފައިވާ ނިންމެވުމެއް، މާލޭ ވޯޓަރ އެންޑް ސްވަރޭޖް ކޮމްޕެނީ ޕްރައިވެޓް ލިމިޓެޑް (އެމްޑަބްލިއުއެސްސީ) ގެ ފަރާތުން، ހައިކޯޓުގައި އިސްތިއުނާފު ކުރުމުން އެ ކޯޓުން ބަލާފައިވާ މައްސަލައެކެވެ.

އެއީ، ލ. ގަން، މުކުރިމަގު، ނޫވިލާގެ, މޫސާ ނަސީމް، ވަޒީފާއިން ވަކިކުރަން ނިންމި ނިންމުމުގައި ހަވާލާދީފައިވާ އޮޑިޓް ރިޕޯޓް ހޯދުމަށް އެދި، އޭނާ އެމްޑަބްލިއުއެސްސީއަށް ހުށަހެޅުމުން، އެކުންފުނިން ޖަވާބެއްދީފައި ނުވާތީ، އިންފޮމޭޝަން ކޮމިޝަނަރަށް އިލްތިމާސްކުރުމުން، ނިންމަވާފައިވާ ނިންމެވުމެކެވެ.

މި މައްސަލައިގައި އިންފޮމޭޝަން ކޮމިޝަނަރުގެ ނިންމެވުމުގައި ވަނީ، މޫސާ ނަސީމް، އެމްޑަބްލިއުއެސްސީން ހޯދުމަށް އެދި ހުށަހަޅާފައިވާ ރިޕޯޓު އޭނާއަށް ދޫކުރުމަށް އަންގަވާފައެވެ. އެއީ، އެ މައުލޫމާތަކީ، މައުލޫމާތު ހޯދައި ލިބިގަތުމުގެ ހައްގުގެ ޤާނޫނު  (މަހޯލި ޤާނޫނު) ގެ 7 ވަނަ ބާބުގައި ކަނޑައަޅާފައިވާ، އާންމު މަސްލަހަތަށް އިސްކަންދިނުމާއި އިސްތިސްނާ ހާލަތްތަކަށް ފެތޭ މައުލޫމާތެއް ކަމުގައި ނުވާތީ ކަމަށް ވެސް އެ ނިންމެވުމުގައިވެއެވެ.

ހައިކޯޓުގައި އިސްތިއުނާފުކޮށްފައިވާ މި މައްސަލައިގެ ނިންމުމުގައި، މައްސަލަ ބެއްލެވި ފަނޑިޔާރުން ބަޔާންކުރައްވާފައިވަނީ، ކޯޓުތަކުގެ އިޚްތިޞާޞް ކަނޑައަޅާ ޚާއްސަ ޤާނޫނަކީ، ދިވެހިރާއްޖޭގެ ކޯޓުތަކުގެ ޤާނޫނު ކަމަށާއި، މަހޯލި ޤާނޫނަކީ، ކޯޓުތަކުގެ އިޚްތިޞާޞް ކަނޑައަޅާ ޤާނޫނެއް ނޫން ކަމަށެވެ. އަދި، ކޯޓުތަކުގެ ޤާނޫނު ފިޔަވައި އެހެން ޤާނޫނެއްގައި ކޯޓުތަކުގެ އިޚްތިޞާޞާ ގުޅޭ ގޮތުން ކަމެއް ބަޔާންކުރާނަމަ އެކަން ވަރަށް ސާފު އިބާރާތުން ބަޔާންކުރަން ޖެހޭނެކަމަށް މި ނިންމުމުގައިވެއެވެ.

މަހޯލި ޤާނޫނުގެ 64 ވަނަ މާއްދާގެ (ހ) ގައި ބަޔާންކޮށްފައިވަނީ،  އިންފޮމޭޝަން ކޮމިޝަނަރު ނިންމާ ނިންމެވުމަކާމެދު ހިތްހަމަނުޖެހޭނަމަ، އެ ނިންމެވުމަކާ ގުޅޭގޮތުން ހިތްހަމަނުޖެހޭ ފަރާތަކުން، އެމައްސަލައެއް ނިންމާ ތާރީޚުން ފެށިގެން 30 ދުވަހުގެ ތެރޭގައި ހައިކޯޓަށް އިލްތިމާސްކުރުމުގެ ފުރުސަތު ލިބިދޭކަމަށެވެ.

އެހެން ނަމަވެސް ހައިކޯޓުގެ ފަނޑިޔާރުންގެ ނިންމުމުގައި ބުނެފައިވަނީ، ކޯޓުތަކުގެ ޤާނޫނުން ހައިކޯޓަށް ލިބިދީފައިވާ އިޚްތިޞާޞަށް ބަލާއިރު، މި ނިންމުން ނިންމާފައިވަނީ ދަށު ކޯޓަކުންތޯ ނުވަތަ ޓްރައިބިއުނަލަކުންތޯ ބަލަން ޖެހޭކަމަށެވެ.  އަދި އެއީ ދަށުކޯޓަކުން ނިންމާފައިވާ ނިންމުމެއްކަމަށް ބެލޭނެ ޖާގައެއް ނެތްކަމަށެވެ. ހަމައެހެންމެ، މަހޯލި ޤާނޫނުގެ 64 ވަނަ މާއްދާގެ (ހ) ގެ އިބާރާތުގައިވާ "އިންފޮމޭޝަން ކޮމިޝަނަރު" އެއީ ޓްރައިބިއުނަލެއްކަމަށް ބެލެވެން ވެސް ނެތްކަމަށެވެ.

އެހެން ނަމަވެސް ހައިކޯޓުގެ މި ނިންމުން، ސުޕްރީމް ކޯޓުގައި އިސްތިއުނާފުކުރުމަށް ޤާނޫނީ ހުރަހެއް ނެތްކަމަށް ހައިކޯޓުގެ ނިންމުމުގައި ބަޔާންކޮށްފައިވެއެވެ.

މި މައްސަލަ ބައްލަވައި ޙުކުމްކުރި ހައިކޯޓުގެ ފަނޑިޔާރުންގެ ބެންޗުގައި ތިއްބެވީ، ފަނޑިޔާރު މުޙައްމަދު ފައިޞަލާއި، ފަނޑިޔާރު މުޙައްމަދު ނިޔާޒާއި، ފަނޑިޔާރު ހުސައިން ރަޝީދެވެ.