ބެންޒެމާގެ ދެ ލަނޑާއެކު ސެލްޓަ އަތުން ރެއާލަށް މޮޅެއް

ސްޕެނިޝް ލީގުގައި ހޮނިހިރު ދުވަހުގެރޭ އިތުބާރު ފޯވާޑް ކަރިމް ބެންޒެމާ ޖެހި ދެ ލަނޑާއެކު، ސެލްޓަ ވީގޯ އަތުން އެންމެ ފަހުގެ ޗެމްޕިއަން ރެއާލް މެޑްރިޑް މޮޅުވެއްޖެއެވެ.

ރަށުން ބޭރުގައި ކުޅުނު މެޗުން ރެއާލް މޮޅުވީ 3-1 ގެ ނަތީޖާއަކުންނެވެ.

ދެ ޓީމުގެ ފަރާތުންވެސް ހަމަހަމަ ކުޅުމެއް ފެނިގެންދިޔަ މި މެޗުގައި އެންމެ ފުރަތަމަ ލަނޑު ޖަހާ ލިޑު ނެގީ ރެއާލުންނެވެ. އެގޮތުން މެޗުގެ 20 ވަނަ މިނެޓުގައި ރެއާލަށް ލީޑު ނަގައިދިން ލަނޑު ކާމިޔާބުކޮށްދިނީ ބެންޒެމާއެވެ. އަދި އޭގެ 10 މިނެޓު ފަހުން ބެންޒެމާ ވަނީ އިތުރު ލަނޑެއް ޖަހައި، ރެއާލަށް ލީޑު ފުޅާކޮށްދީފައެވެ. އެކަމަކު ފުރަތަމަ ހާފު ނިމުމުގެ ކުރިން ސެލްޓައިން ވަނީ ފަރަގު ކުޑަކޮށްފައެވެ. ފުރަތަމަ ހާފު ނިމެން ފަސް މިނެޓަށް ވެފައި ވަނިކޮށް މި ލަނޑު އެ ޓީމަށް ކާމިޔާބުކޮށްދިނީ ސަންޓި މީނާއެވެ.

މި މެޗުގެ ދެވަނަ ހާފުގައިވެސް ދެ ޓީމުގެ ފަރާތުން ގިނަ ހަމަލާތަކެއް ފެނިގެންދިޔައިރު، ރެއާލުން އަލުން ލީޑު ފުޅާކޮށްފައިވަނީ މެޗުގެ އިތުރު ވަގުތުގައެވެ. ބެންޒެމާގެ އެހީއާއެކު މި ލަނޑު އެ ޓީމަށް ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި މާކޯ އެސެންސިއޯއެވެ.

މި މޮޅާއެކު ތާވަލުގެ ދެވަނައަށް ރެއާލް ޖެހިލިއިރު، އެ ޓީމަށް ވަނީ ކުޅުނު 28 މެޗުން 60 ޕޮއިންޓް ލިބިފައެވެ. އަދި ތިންވަނައަށް ވެއްޓުނު ބާސެލޯނާއަށް 27 މެޗުން 59 ޕޮއިންޓް ލިބިފައިވާއިރު، އެއްވަނައިގައި އޮތް އެތުލެޓިކޯ މެޑްރިޑަށް 27 މެޗުން ވަނީ 63 ޕޮއިންޓް ލިބިފައެވެ. މީގެ އިތުރުން ރެއާލް އަތުން ބަލިވި ސެލްޓަ އޮތީ ތާވަލުގެ 11 ވަނައިގައި 28 މެޗުން 34 ޕޮއިންޓާއެކުއެވެ.