މަސްތުވާތަކެތީގެ މައްސަލަ ހައްލުކުރެވޭނީ މަސްތުވާތަކެތީގެ ވިޔަފާރަވެރިންނަށް އަދަބުދެވިގެން : ޕީޖީ

މުޖުތަމައުގައި އާންމުވެފައިވާ މަސްތުވާތަކެތީގެ ވަބާ، ޖިނާއީ އަދުލުގެ ނިޒާމުގެ ތެރެއިން ހައްލުކުރެވޭނީ، މަސްތުވާތަކެތީގެ ވިޔަފާރިކުރާ ފައިސާއާއި، ފައިސާ ވެރިން ހޯދިގެން ކަމަށް ޕްރޮސެކިއުޓަރ ޖެނެރަލް ހުސައިން ޝަމީމް ވިދާޅުވެއްޖެއެވެ.

"މަސްތުވާ ތަކެތީގެ ވިޔަފާރިކުރާ ފައިސާއާއި ފައިސާވެރިންގެ ފަހަތުން ދިޔުން" މި ސުރުޚީގެ ދަށުން ޝަމީމް ގެ ބްލޮގްގައި ޝާއިއުކޮށްފައިވާ ލިޔުމެއްގައި ވަނީ، މުޖުތަމައުގައި މަސްތުވާތަކެތީގެ މައްސަލަ އާންމުވެފައިވާ މިންވަރާއި، އެކަން ހައްލުކުރެވެން އޮތް ގޮތާ ބެހޭގޮތުން ވާހަކަ ދައްކަވާފައެވެ. ޝަމީމް ވިދާޅުވީ މަސްތުވާތަކެތީގެ މައްސަލައާއި ގުޅުން ނެތް އިތުރު އެއްވެސް މައްސަލައެއް ޖިނާއީ އަދުލުގެ ނިޒާމުގައި ނެތްކަމަށާއި، ކޯޓުތަކުގައި ހުރި މައްސަލަތަށް ލަސްވަނީ ވެސް، މަސްތުވާތަކެތީގެ ތާސީރުގައި ޖެހިގެން ކުރާ ކުދި ކުދި ވައްކަމާއި ފޭރުންތަކުގެ މައްސަލަ ގިނަވެގެން ކަމަށެވެ.

ޕްރޮސެކިއުޓަރ ޖެނެރަލްގެ މަގާމާ ހަވާލުވެވަޑައިގެންނެވުމަށްފަހު، މަސްތުވާތަކެތި ބޭނުންކުރާ މީހުން މަދުކުރެވޭނެ ގޮތެއް ހޯއްދެވުމަށްޓަކައި ކުރެއްވި މަސައްކަތްޕުޅުތަކާ ގުޅޭގޮތުން ޝަމީމް ވިދާޅުވީ، މަސްތުވާތަކެތީގެ ވިޔަފާރި ކުރާ މީހުންގެ "ފަހަތުން ދެވޭނެ" ގޮތަކަށް ޕްރޮސެކިއުޝަންގެ ސިޔާސަތުތައް ބަދަލުކުރައްވަމުން ގެންދަވާކަމަށެވެ. އަދި އެގޮތުން ފާއިތުވި އަހަރުގެ ޖަނަވަރީ މަހުން ފެށިގެން، މަސްތުވާތަކެތީގެ މައްސަލައެއްގައި ދައުވާ ކުރާއިރު، އެމައްސަލައިގައި ހިމެނޭ ފައިސާ ދައުލަތަށް ނެގުމުގެ ބައި ވަކިން ދައުވާގައި ހިމަނަން ފަށާފައިވާކަމަށެވެ. އަދި މީގެ ބޭނުމަކީ، އެފައިސާ ދައުލަތަށް ނަގައި، މަސްތުވާތަކެއްޗާ ގުޅިގެން ދައުލަތުން ހިންގާ ޕްރޮގްރާމުތަކަށް އެފައިސާ ޚަރަދު ކުރުން ކަމަށްވެސް ޝަމީމް ވިދާޅުވިއެވެ.

މީގެއިތުރުން، މަސްތުވާތަކެތީގެ ވިޔަފާރިކޮށްގެން ހޯދާ ފައިސާ ލޯންޑަރ ކުރާ ކަމަށް ތުހުމަތުކުރެވޭ މީހުންގެ މައްޗަށް ޤާނޫނު ނަންބަރު 10/2014 (މަނީލޯންޑްރިން އަދި ޓެރަރިޒަމް ފައިނޭންސްކުރުން ހުއްޓުވުމުގެ ޤާނޫނު) ގެ ދަށުން މަނީ ލޯންޑްރިންގެ ދައުވާ ކުރާގޮތަށް ސިޔާސަތު ބަދަލުކުރައްވާފައިވާކަމަށްވެސް ޝަމީމް ވިދާޅުވިއެވެ.

އަދި މިބާވަތުގެ ފުރަތަމަ މައްސަލަ މާޗު މަހުގެ 18ވަނަ ދުވަހު ކްރިމިނަލް ކޯޓަށް ހުށަހަޅާފައިވާކަމަށް ޝަމީމް ވިދާޅުވިއެވެ.  ޝަމީމް ވިދާޅުވީ މި މައްސަލައިގައި ގދ. ތިނަދޫ، ރަންގަލް، ހަސަން ލޫތާއި، ހުޅުމާލެ ފްލެޓް ނަންބަރު 01-ޖީ-45، ހަސަން ރަޝީދާއި، ތ. ތިމަރަފުށި، ވައިޓްރޯސް، އިސްމާޢީލް ޝަރީފާއި، މއ. ހަސްލަތު، ޝަނިޔާ އިބްރާހީމްގެ މައްޗަށް މަސްތުވާތަކެތި ޓްރެފިކް ކުރުމުގެ ކުށުގެ ދައުވާގެ އިތުރުން މަނީ ލޯންޑްރިންގެ ދައުވާ ހުށަހަޅާފައިވާކަމަށެވެ.

މަނީލޯންޑްރިން އަދި ޓެރަރިޒަމް ފައިނޭންސްކުރުން ހުއްޓުވުމުގެ ޤާނޫނުގެ 7 ވަނަ މާއްދާގެ (ނ) ބުނާ ގޮތުން، މަސްތުވާތަކެތި ޓްރެފިކްކުރުމުގެ ކުށަކީ، އެކުށާ ގުޅިގެން މަނީ ލޯންޑްރިންގެ ދައުވާ ކުރެވޭ ކުށެކެވެ. އެހެންކަމުން އެޤާނޫނުގެ ދަށުން، މަސްތުވާތަކެތި ވިޔަފާރި ކުރާކަމަށް ތުހުމަތުކުރެވޭ މީހުންނާއި، އެމީހުންގެ އަނބިންނާއި ފިރިންނާއި، ގާތްތިމާގެ މީހުންވެސް، ފައިސާ ގެންގުޅުމުގައި ބައިވެރިވެއްޖެނަމަ ދައުވާ ކުރެވޭނެކަމަށް ޝަމީމް ވިދާޅުވިއެވެ.

ޝަމީމް އިތުރަށް ވިދާޅުވީ، މިހާތަނަށް ބައެއް މީހުންނަށް ހީވެފައި އޮންނަނީ، މަސްތުވާތަކެތީގައި އަތް ނުލާނަމަ، ކުށްވެރި ނުވާނެ ކަމަށް ކަމަށާއި، ސިޔާސަތަށް ގެނައި ބަދަލާއެކު، އެވިސްނުން ނިމުމަކަށް އަންނާނެކަމަށެވެ.

މަސްތުވާތަކެއްޗާ ބެހޭ ޤާނޫނެއް ފުރަތަމަ ފާސްކޮށްފައި ވަނީ 1977 އެވެ. މި ޤާނޫނުގެ މަގުސަދަކީ، މަސްތުވާތަކެތި ބޭނުންކުރާ މީހުންނަށް އަދަބުދިނުމެވެ. އޭގެފަހުން މަސްތުވާތަކެއްޗަށް ދެވިހިފާފައިވާ ފަރާތްތަކަށް ފަރުވާދީ، އެމީހުން އަނބުރާ މުޖުތަމަޢަށް ނެރުމުގެ މަގުސަދުގައި 2011 ވަނަ އަހަރު މަސްތުވާތަކެއްޗާ ބެހޭ އާ ޤާނޫނެއް ފާސްކުރިއެވެ. މި ޤާނޫނަށް އިސްލާހު ގެނައުމުގެ ބިލެއް، ރައްޔިތުންގެ 2021ވަނަ އަހަރުގެ ފުރަތަމަ ދައުރަށް، ސަރުކާރުގެ ފަރާތުން ހުށަހެޅުމަށް ގަސްދުކޮށްފައިވާކަމަށް، އެޓަރނީ ޖެނެރަލްގެ އޮފީހުން ފެބްރުއަރީ މަހު ބުނެފައިވެއެވެ.