ނ އަދި ޅ އަތޮޅުގައި ހިންގި އޮޕަރޭޝަންގައި ގިނަ އަދަދެއްގެ މަސްތުވާތަކެއްޗާއި، ފައިސާ ހޯދާފައިވޭ: ފުލުހުން

ރާއްޖޭގެ ދެ އަތޮޅުގައި ކުރިއަށް ގެންދިޔަ މަސްތުވާތަކެތީގެ ބޮޑު އޮޕަރޭޝަންގައި ގިނަ އަދަދެއްގެ ފައިސާއާއި، މަސްތުވާތަކެތި އަތުލައިގަނެފިއެވެ.

ސެޕްޓެންބަރު މަހުގެ 11 ވަނަ ދުވަހު ފުލުހުން ވަނީ ނ އަދި ޅ އަތޮޅުގައި ތިން ދުވަހުގެ ޚާއްސަ އޮޕަރޭޝަނެއް ކުރިއަށް ގެންގޮސްފައެވެ. ބުދަ ދުވަހު ފުލުހުން ބޭއްވި ނޫސްވެރިންގެ ބައްދަލުވުމުގައި މި އޮޕަރޭޝަންތަކުގެ ތަފްސީލު ވަނީ ހިއްސާކޮށްފައެވެ.

ޑްރަގް އެންފޯސްމަންޓްގެ ހެޑް ސްޕްރިންޓެންޑެންޓް އޮފް ޕޮލިސް ނާހިދު ހުސެއިން ވިދާޅުވީ މި އޮޕަރޭޝަންގައި ހިންނަވަރުގައި ޖުމްލަ 9 ތަނެއް ބަލާފާސްކޮށްފައިވާ ކަމަށާއި، 6 މީހަކު ފުލުހުންގެ ބެލުމުގެ ދަށަށް ގެނެސްފައިވާ ކަމަށެވެ. އަދި ނައިފަރުން ދެތަނެއް ބަލާފާސްކޮށް ތިން މީހަކު ބެލުމުގެ ދަށަށް ގެނެސްފައިވާ ކަމަށް ނާހިދު ވިދާޅުވިއެވެ.

ނާހިދު ވިދާޅުވީ ޅ.އަތޮޅުގައި ޖުމްލަ 11 ތަނެއް ބަލާ ފާސްކޮށްފައިވާ ކަމަށާއި، 9 މީހުން ބެލުމުގެ ދަށަށް ގެނައިއިރު، ޑްރަގް ޓްރެފިކިންގެ މައްސަލައެއް ފާހަގަކުރެވިފައިވާ ކަމަށެވެ. އަދި ވިދާޅުވީ މި އޮޕަރޭޝަންގައި 86 ގްރާމަށް ވުރެ ގިނަ މަސްތުވާތަކެތި ހޯދައި، ދެލައްކައަށްވުރެ ގިނަ ފައިސާ ހޯދާފައިވާ ކަމަށެވެ.

ނ.އަތޮޅުގައި ހިންގި އޮޕަރޭޝަނަށް އިޝާރާތް ކުރައްވައި ނާހިދު ވިދާޅުވީ މި އޮޕަރޭޝަންގައި 9 ގެއެއް ބަލާ ފާސްކޮށް އަދި 9 މީހެއް ބެލުމުގެ ދަށަށް ގެނެވިފައިވާ ކަމަށެވެ. އަދި 1.5 ގްރާމް މަސްތުވާތަކެތި އަތުލައިގަނެވުނުއިރު އެއްލައްކަވުރެ ގިނަ ފައިސާ ހޯދިފައިވާ ކަމަށް އޭނާ ވިދާޅުވިއެވެ.

މީގެ އިތުރުން ނާހިދު ވަނީ ނ.ވެލިދޫގައި މަސްތުވާތަކެތި ފުޅާ ދާއިރާއެއްގައި ވިޔަފާރި ކުރާ މީހުންގެ ވަނަވަރު ވެސް ހާމަކޮށްފައެވެ.

އެއީ ހުދުފިނިފެންމާގެ/ 35 އަހަރުގެ އަހުމަދު މުރުޝިދު، ހިކިފިނިފެންމާގެ/ 30 އަހަރުގެ އަލީ ރަޝީދު، ކޮކްނެޓްވިލާ/ 28 އަހަރުގެ އަހުމަދު ނައުޝާދު، އަދި ކޮކްނެޓްވިލާ/ 26 އަހަރުގެ އަބްދުﷲ ނިޝާދެވެ.

ފުލުހުން ބުނީ މި ދެ އޮޕަރޭޝަން ވެސް ވަރަށް ކާމިޔާބު ކަމަށެވެ. އަދި އިތުރަށް މި މައްސަލަތައް ތަހުގީގު ކުރަމުންދާ ކަމަށް ފުލުހުން ބުނެއެވެ.