"މަސްތުވާތަކެތި ބޭނުންކުރާ އައްޑާތަކުގެ ގޮތުގައި މާލޭގައި ބޭނުންކުރި 50 ތަނެއް، އޭގެ ތެރޭގައި ސަރުކާރު އިމާރާތްތައް ހިމެނޭ"
މަސްތުވާތަކެތި ބޭނުން ކުރާ މީހުން ރިބިލިޓޭޓްކުރުމަށް އެކަށީގެންވާ މަސައްކަތްތަކެއް ކުރަމުންދާ ކަމަށް އިހުސާން ވަނީ ވިދާޅުވެފަ
ޑްރަގް ބޭނުން ކުރާ އައްޑާއެއްގެ ގޮތުގައި ބޭނުން ކުރި ތަނެއް
މަސްތުވާތަކެތި ބޭނުންކުރާ އައްޑާތަކުގެ ގޮތުގައި މާލޭގައި ބޭނުންކުރި 50 ތަނެއް ދެނެގަނެވިފައިވާ ކަމަށާއި އޭގެ ތެެރޭގައި ސަރުކާރުގެ އިމާރާތްތައް ހިމެނޭ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެއެވެ.
މަޖިލީހުގެ 241 ކޮމިޓީގައި ވާހަކަދައްކަވަމުން މިނިސްޓަރ ވަނީ އާއްމު އިމާރާތްތަކާއި ސަރުކާރު އިމާރާތްތަކުގައި ވެސް އެފަދަ ޢަމަލުތައް ހިނގާ ކަމަށް ވިދާޅުވެފައެވެ.
އިހުސާން ވިދާޅުވި ގޮތުގައި ފުލުހުން ދަނީ އެ ތަންތަނުގެ ވީޑިއޯތައް ނަގާ އެ ތަންތަނުގެ އެސެސްމެންޓްތައް ހަދަމުންނެވެ. އަދި އެ ތަންތަނަކީ ކޮބައިކަން މިހާރު ދެނެގަނެވިފައިވާ ކަމަށް ވެސް އިހުސާން ވަނީ ވިދާޅުވެފައެވެ.
އެހެންނަމަވެސް އޭގެ ތެރެއިން ސަރުކާރުގެ އިމާރާތްތަކަކީ ކޮބައިކަން އޭނާ ހާމައެއް ނުކުރައްވައެވެ. ޑްރަގް އައްޑާތަކުގެ ގޮތުގައި ބޭނުން ކުރާ ސަރުކާރުގެ ތިން އިމާރާތް ތަޅާލުމުގެ މަސައްކަތް ކުރަމުންދާކަން އޭނާ ވަނީ ހާމަކުރައްވާފައެވެ.
އެކަމަށް ބޭނުންވާ ހުއްދަ މިހާރު ލިބިފައިވާ ކަމަށާއި ޑްރަގް ބޭނުން ކުރާ އައްޑާތަކުގެ ގޮތުގައި ބޭނުން ކުރާ އެހެން ބައެއް ތަންތަން ވެސް ބަންދުކުރުމުގެ ހުއްދަ ހޯދަމުންދާ ކަމަށް އިހުސާން ވިދާޅުވިއެވެ.
އިހުސާން ވަނީ ޑްރަގް ބޭނުން ކުރާ އައްޑާއެއްގެ ގޮތުގައި ބޭނުން ކުރާ ތަންތަން ނައްތާލުމަށް މަސައްކަތް ކުރާ ކަމަށް ވިދާޅުވެފައެވެ.
އިހުސާން އިތުރަށް ވިދާޅުވީ މަސްތުވާތަކެތި ވިއްކުމާއި ބޭނުން ކުރުން މަދު ކުރެވެނީ މަސްތުވާތަކެތި އެތެރު ކުރާ މިންވަރު މަދު ކުރެވިގެން ކަމަށެވެ. އެކަމަށްޓަކާ ޤާނޫނީ ބަދަލުތަކެއް ގެނައުމުގެ ވިސްނުން ގެންގުޅުއްވާ ކަމަށް އިހުސާން ވަނީ ވިދާޅުވެފައެވެ.
މީގެ އިތުރުން މަސްތުވާތަކެތި ބޭނުން ކުރާ މީހުން ރިބިލިޓޭޓްކުރުމަށް އެކަށީގެންވާ މަސައްކަތްތަކެއް ކުރަމުންދާ ކަމަށް އިހުސާން ވަނީ ވިދާޅުވެފައެވެ.
