ވެކްސިން ޖެހުމަށް ފަހު ކަރަންޓީނުގައި ހުރި އަންހެނަކު މަރުވެއްޖެ
އެމީހާ ވެކްސިން ޖެހީ ފެބްރުއަރީ 25ގައި
ރަތަފަންދޫ
މާލެއިން ގދ. ރަތަފަންދޫއަށް ގޮސް ހޯމް ކަރަންޓީންގައި ހުރި އަންހެނަކު މަރުވެއްޖެއެވެ.
ގދ. ރަތަފަންދޫން މަރުވީ އުމުރުން 67 އަހަރުގެ އަންހެނެކެވެ.
ރަތަފަންދޫ ކައުންސިލުން "ރާއްޖެ އެމްވީ"އަށް މައުލޫމާތުދެމުން ބުނީ އެމީހާއަކީ މިދިޔަ ފެބްރުއަރީ މަހުގެ 25ގައި މާލެއިން ވެކްސިން ޖެހި މީހެއް ކަމަށެވެ. އެމީހާ ރަށަށް ދިޔައީ ބުރާސްފަތި ދުވަހު ކަމަށާއި އޭރުން ފެށިގެން ހުރީ ހޯމް ކަރަންޓީންގައިކަމަށެވެ.
ކައުންސިލުން ބުނީ އެމީހާގެ ކޮވިޑް-19ގެ އެއްވެސް އަލާމާތެއް ނެތް ކަމަށެވެ. އެކަމަކު އެމީހާގެ އެހެން ބަލިކަންތައް ހުރި ކަމަށް ކައުންސިލުން ބުންޏެވެ. އެގޮތުން އެމީހާ އަކީ ދާއިމީ ބައްޔަށް ބޭސްކުރާ މީހެއް ކަމަށާއި އެ ނޫންވެސް ބައެއް ސިއްހީ މައްސަލަތައް ހުރިކަމަށް ކައުންސިލުން ބުންޏެވެ.
ކައުލްސިލުން ބުނީ އެމީހާއާއެކު އެ ގޭގައި އިތުރު ދެމީހަކުވެސް ކަރަންޓީނުގައި ތިބި ކަމަށެވެ. އެމީހާ ރަށަށް ގެންދިޔަ އިރުވެސް ކަނާތު ފައިގައި ރިއްސާ ވާހަކަ ބުނި ކަމަށާއި ފައި އަޅަންވެސް އުނދަގޫވެ ހިނގާ ބިނގާވެސް ނޫޅެވޭ ކަމަށް ކައުންސިލުން ބުންޏެވެ. ކައުންސިލުން ބުނީ ކަނާތު ފައިން ފެށިގެން މުޅި އެ ފަޅީގައި ރިއްސާކަމަށް އެމީހާ ބުނުމުން ބުރާސްފަތި ދުވަހުގެ ރޭ އޭނާ ޑޮކްޓަރަށްވެސް ދެއްކިކަމަށެވެ. އަދި އޭރުވެސް އެމީހާއަށް ފައި އަޅާ ނޫޅެވޭ ކަމަށާއި، ކުޑަކޮށް ފައި ހަރަކާތްކުރާ ކަމަށެވެ.
ކައުންސިލުން ބުނީ އޭގެ ފަހުން އެރޭ ދަންވަރު އެމީހާ ގިފިލި ތެރެއަށް ވެއްޓުނުކަމަށް އާއިލާއިން މައުލޫމާތުދިން ކަމަށާއި، އެކަމަކު އޭގެ ސަބަބުން އެމީހާއަށް މާ ބޮޑު ގެއްލުމެއްވެފައި ނުވާ ކަމަށެވެ. އެމީހާ މަރުވީ ހުކުރު ދުވަހުގެ މެންދުރު ހުކުރުގެ ފަހުން ކަމަށާއި، ނޭވާ ނުލާތީ އާއިލާއިން ގުޅައިގެން ކައުންސިލުން އަދި ޑޮކްޓަރުން އެ ގެއަށް ދިޔަ އިރުވެސް އެމީހާ އޮތީ މަރުވެފައިކަމަށް އެ ކައުންސިލުން ބުނެއެވެ.
ކައުންސިލުން ބުނީ އެމީހާ މަރުވި ވަކި ސަބަބެއް ހޮސްޕިޓަލުންވެސް ކަށަވަރުކޮށްދީފައި ނުވާ ކަމަށެވެ.
