ރައީސުލްޖުމްހޫރިއްޔާ ބަންގްލަދޭޝްއަށް ވަޑައިގެންފި
17 މާރިޗު 2021 | ބުދަ 04:17ބަންގަލަދޭޝްގައި އުޅޭ ދިވެހިންނާއި ބައްދަލުކުރެއްވުމަށް ވަނީ ހަމަޖެހިފައި
ރައީސް ޞާލިޙް ބަންގަލަދޭޝަށް ވަޑައިގަތުން
ރައީސުލްޖުމްހޫރިއްޔާ، އިބްރާހީމް މުޙައްމަދު ޞާލިޙްގެ ދެކަނބަލުން ބަންގްލަދޭޝްއަށް ވަޑައިގަންނަވައިފިއެވެ. ރައީސްގެ ދެކަނބަލުންނަށް, ހަޒްރަތް ޝާހްޖަލާލް އިންޓަރނޭޝަނަލް އެއަރޕޯޓުން މަރުހަބާ ވިދާޅުވީ، ބަންގްލަދޭޝްގެ ރައީސް އެމްޑީ އަބްދުލް ހާމިދާއި، ފަސްޓްލޭޑީ، ރާޝިދާ ހާމިދެވެ.
ރައީސް ޞާލިހު ބަންގްލަދޭޝްއަށް ކުރައްވާ ފުރަމާނަ ދަތުރުފުޅަކީ 1975 ވަނަ އަހަރު އަވަހާރަކޮށްލާފައިވާ ބަންގްލަދޭޝްގެ މިނިވަންކަމުގެ ބާނީ އަދި މިހާރުގެ ބޮޑު ވަޒީރު ޝެއިޚް ހަސީނާގެ ބައްޕާފުޅު ޝެއިޚް މުޖީބުއްރަހުމާނަށް 100 އަހަރު ފުރުމުގެ މުނާޞަބާގައި ބައިވެރިވެވަޑައިގެންނެވުމަށް ކުރައްވާ ދަތުރުފުޅެކެވެ. މި ރަސްމިއްޔާތު އޮންނާނީ ރާއްޖެ ގަޑިން މެންދުރުފަހު 3:30 ގައެވެ.
"ބާރތު ސެންޓެނަރީ އޮފް ޝެއިޚް މުޖީބުއްރަޙްމާން"ގެ ރަސްމީ ޙަފްލާގައި ބައިވެރިވެ ވަޑައިގެންނެވުމުގެ އިތުރުން ބަނގުލަދޭޝްގެ ބޮޑުވަޒީރުގެ އަރިހަށް ޒިޔާރަތްކުރެއްވުމާއި، އެ ޤައުމުގެ ސަރުކާރުގެ އިސްއޮފިޝަލުންނާ ބައްދަލުކުރައްވައި އެކިދާއިރާތަކުން ދެޤައުމުގެ ގުޅުން އިތުރަށް ބަދަހިކުރުމާ ގުޅޭގޮތުން މަޝްވަރާކުރެއްވުމަށް ހަމަޖެހިފައިވެއެވެ. ހަމަ އެހެންމެ ރައީސުލްޖުމްހޫރިއްޔާގެ މިދަތުރުފުޅުގައި ބަނގުލަދޭޝްގައި ދިރިއުޅޭ ދިވެހިންނާއި ބައްދަލުކުރެއްވުމަށް ވެސް ވަނީ ހަމަޖެހިފައެވެ.
ރައީސުލްޖުމްހޫރިއްޔާ ބަންްގްލަދޭޝްއަށް ވަޑައިގަތީ، ގަތަރަށް ކުރެއްވި ރަސްމީ ދަތުރުފުޅު ނިންމަވާލެއްވުމަށްފަހުގައެވެ.
