އުތުރުތިލަފަޅުގެ އެގްރީމަންޓް ލީކްވި ކަމަށް ބުނެ ސޯޝަލް މީޑިއާގައި ފަތުރަމުންދަނީ ދޮގު ލިޔުމެއް ކަމަށް މޯލްޑިވްސް ނެޝެނަލް ޑިފެންސް ފޯސް (އެމްއެންޑީއެފް) އިން ބުނެފިއެވެ.
އުތުރު ތިލަފަޅުގައި އިންޑިޔާ ސިފައިންނަށް ޤާއިމުވެ ތިބެވޭ ގޮތަށް ހަދާފައިވާ އެއްބަސްވުމުގެ ކޮޕީއެއް ލިބުނު ކަމަށް ބުނެ ކުރީގެ ހޯމް މިނިސްޓަރު އުމަރު ނަސީރު ވެސް ވަނީ ޑްރާފްޓް ލިޔުމެއް ހިއްސާ ކުރައްވާފައެވެ. އަދި ބައެއް މީޑިއާތަކުން ވެސް ވަނީ ދިވެހިރާއްޖޭގެ ސިޔާދަތަށް ނުރައްކާވާނެ ފަދަ ވަރަށް ގިނަ ކަންތައްތައް އެބަސްވުމުގައި އެކުލެވިގެންވާ ކަމަށް ބުނެފައެވެ. އުތުރުތިލަފަޅުގައި ޑޮކްޔާޑަކާއި ޚަބަރެއް ތަރައްޤީކުރެވޭނެ އެއްބަސްވުމުގެ ދަށުން އިންޑިޔާގެ ސިފައިންގެ އުޅަނދުފަހަރަށް އެ ތަނުގައި ޤާއިމުކުރާ ވަސީލަތްތައް އެއްވެސް ހުރަހެއް ނެތި ބޭނުންކުރެވޭނެ ކަމަށާއި ދެ ދައުލަތުގެ އަސްކަރީ މީހުންނާއި، ކަނޑުގެ އަދި ވައިގެ އުޅަނދުތަކަށް އެތަން ބޭނުންކުރެވޭނެ ކަމަށާއި އެތަނުގައި ޤާއިމުކުރާ މުވާސަލާތީ ނިޒާމުތައް ވެސް ދެ ޤައުމަށް ބޭނުންކުރެވޭނެ ކަމަށް ވެސް ބުނެފައިވެއެވެ. މީގެ އިތުރުން އެ އެއްބަސްވުމުގެ މުއްދަތަކީ 30 އަހަރު ކަމަށް ބުނެ ބައެއް މީޑިއާތަކުން ވަނީ އެ ދޮގު ލިޔުން ހިއްސާކޮށްފައެވެ.
މިކަމާ ގުޅިގެން އެމްއެންޑީއެފް އިން ބުނީ ދައުރުކުރަމުންދަނީ ހަޤީޤަތާ ޚިލާފު ދޮގު ލިޔުމެއް ކަމަށާއި ރާއްޖެއާއި އަވަށްޓެރި ޤައުމުތަކުގެ ގުޅުން ހީނަރުވާފަދަ ކަންތައް ނުކުރުމަށާއި އެފަދަ ލިޔުންތައް ނުފެތުރުމަށް ވަނީ އިލްތިމާސްކޮށްފައެވެ.
އުތުރު ތިލަފަޅުގައި ކޯސްޓްގާޑް ބަނދަރަކާއި ސަރވިސް ޑޮކްޔާޑެއް ތަރައްގީކުރުމަށް އެކުލަވާލި އެއްބަސްވުން ލީކްވި ކަމަށް ބުނެފައިމިވަނީ އެ އެއްބަސްވުން އިތުރަށް ސިޔާސީކޮށް، ޤައުމު ހަލަބޮލިކުރުމަށް އިދިކޮޅު ކޯލިޝަނުން ބޮޑެތި ރޭވުންތަކެއް ރާވަމުންދާ ދަނޑިވަޅެއްގައެވެ.
އިދިކޮޅު ކޯލިޝަންގައި ވެސް ހިޔާލު ތަފާތު ވެފައިވާ މި މައްސަލަ ހޫނުކުރުމަށް މަސައްކަތް ކުރަމުންދާ ކަމަށް އިތުބާރު ހުރި މަސްދަރަކުން "ރާއްޖެއެމްވީ" އަށް ވަނީ ކަށަވަރުކޮށްދީފައެވެ. އުތުރު ތިލަފަޅާ ގުޅޭ މި މައުލޫމާތު ރާއްޖެއެމްވީއާ ހިއްސާ ކޮށްފައިވަނީ ޕީޕީއެމްގެ އެކި ޙަރަކާތްތަކުގައި އިސްކޮށް އުޅޭ މެމްބަރެކެވެ. އޭނާ ވިދާޅުވި ގޮތުގައި އުތުރުތިލަފަޅުގެ އެއްބަސްވުން ސިޔާސީކުރުމަށް އިދިކޮޅުން ރާވަމުންދަނީ ސީދާ ކުރީގެ ރައީސް އަބްދުﷲ ޔާމީނުގެ މަޝްވަރާއާއި އިރުޝާދުގެ މަތިންނެވެ. އެހެންނަމަވެސް، އެކަމާ ޕީޕީއެމްގެ ބައެއް މެމްބަރުން ނުރުހުންވާކަން ފާހަގަކޮށް އޭނާ ވަނީ ދާދި ފަހުން އިދިކޮޅު ކޯލިޝަނުން އިންޑިއާގެ އެކްސްޓަރނަލް އެފެއާޒް މިނިސްޓަރ ޑރ ސުބްރަމަންޔަމް ޖައިޝަންކަރް އާއެކު ބޭއްވި ބައްދަލު ކުރެއްވުމުގައި އުތުރުތިލަފަޅުގެ އެއްބަސްވުމާ ގުޅޭ ކަންބޮޑުވުން ހިއްސާ ނުކުރީ ކީއްވެތޯ ސުވާލު އުފައްދާފައެވެ. އަދި އޭނާ ހިމެނޭ ގޮތަށް ޕީޕީއެމްގެ ބައެއް މެމްބަރުން ވަނީ ލީޑަރޝިޕްއާ އެ ކަންބޮޑުވުން ހިއްސާ ވެސް ކޮށްފައެވެ.
ރާއްޖެއެމްވީއަށް މައުލޫމާތު ދިން މީހާ ބުނި ގޮތުގައި އިދިކޮޅުން މިކަމުގައި ގެންގުޅޭ މައިގަނޑު ވިސްނުމަކީ އުތުރުތިލަފަޅު އެއްބަސްވުމަކީ ޤައުމީ ސަލާމަތަށް ފުށުއަރާ ކަމެއްގެ ގޮތުގައި ދެއްކުމެވެ. އަދި އެއަށްފަހު، މާލޭގައި ޙަރަކާތްތެރިވާ ގްރޫޕުތަކުގެ އެހީގައި މާލެތެރެ ހަލަބޮލިކޮށް، ސިޔާސީ ގޮތުން ޤައުމު ހަލަބޮލި ކުރުމަކީ ސަރުކާރަށް ޕްރެޝަރ ކުރުމަށްޓަކައި މިވަގުތު އެންމެ ފަސޭހަ އެއް މަގު ކަމަށް އިދިކޮޅުން ދެކޭކަން އޭނާ ފާހަގަކުރިއެވެ. އެހެންނަމަވެސް، މި ވިސްނުމާ ޕާޓީގެ އެތެރޭގެ ބައެއް މެމްބަރުން ވެސް ވަނީ ހިޔާލު ތަފާތުވެފައެވެ.
ރާއްޖޭގެ ކޯސްޓް ގާޑުގެ ކެރިކުޅަދާނަކަން އިތުރުކުރުމަށްޓަކައި މާލެއަތޮޅު އުތުރު ތިލަފަޅުގައި އިންޑިޔާގެ އެހީގައި "ސިފަވަރު" ގެ ނަމުގައި ގާއިމްކުރާ ކޯސްޓްގާޑް ބަނދަރާއި ސާރވިސް ޑޮކްޔާޑުގައި ބޭރުގެ އަސްކަރީ އެއްވެސް ބަޔަކު ނުތިބޭނެކަމުގެ ޔަގީންކަން ސިފައިން ވެސް ވަނީ ދީފައެވެ. ދިވެހި ސިފައިން ބުނެފައިވަނީ މި ބަނދަރުގައި ތިބޭނީ ދިވެހި ސިފައިންނާއި ދިވެހި މުވައްޒަފުން ކަމުގައެވެ. ބަނދަރަކީ ރާއްޖޭގެ ކޯސްޓްގާޑުގެ އުޅަނދުތައް ބަނދަރުކޮށް މަރާމާތުކުރުމަށް ހަދާ ތަނެއްކަމަށާއި ބޭރުގެ އަސްކަރީ އެއްވެސް ބަޔަކު ގާއިމުވެގެން ނުތިބޭނެކަން ވެސް ސިފައިން ފާހަގަކޮށްފައިވެއެވެ.
އޭގެ އިތުރުން، ކޯސްޓްގާޑް ބަނދަރާއި ޑޮކްޔާޑަކީ 2013 ވަނަ އަހަރުން ފެށިގެން ކުރެވުނު މަސައްކަތަށްފަހު، 2016 ވަނަ އަހަރުގެ އެޕްރީލް މަހު ކުރީގެ ރައީސް ޔާމީން އިންޑިއާއަށް ކުރެއްވި ދަތުރުފުޅުގައި ސޮއިކުރެވުނު ޑިފެންސް އެކްޝަން ޕްލޭން އޮން ޑިފެންސް ކޯޕަރޭޝަނުގެ ތެރޭގައިވެސް ހިމެނޭ ކަމެކެވެ.
