އެޓަލާންޓާ ކަޓުވާލުމަށްފަހު ރެއާލް ކުއާޓާއަށް

ޔުއެފާ ޗެމްޕިއަންސް ލީގުގެ ދެވަނަ ބުރުން އެޓަލާންޓާ ކަޓުވާލުމަށްފަހު މުބާރާތުގެ ކުއާޓާ ފައިނަލަށް ރެއާލް މެޑްރިޑް ދަތުރުކޮށްފިއެވެ.

އަންގާރަ ދުވަހުގެރޭ އަމިއްލަ ދަނޑުގައި ކުޅުނު ދެވަނަ ލެގުގެ މެޗުން 3-1 ގެ ނަތީޖާއަކުން ރެއާލް މޮޅުވިއިރު، އެޓަލާންޓާގެ ދަނޑުގައި ކުޅުނު ފުރަތަމަ ލެގުން ރެއާލް ވަނީ ފަހު ވަގުތު 1-0 ގެ ނަތީޖާއަކުން މޮޅުވެފައެވެ. އެހެންކަމުން 4-1 ގެ އެގްރިގޭޓް ނަތީޖާއަކުން މޮޅުވެ، ރެއާލް ވަނީ ކުއާޓާއަށް ދަތުރުކޮށްފައެވެ.

އަންގާރަ ދުވަހުގެރޭ ކުޅުނު މެޗުގެ ފުރަތަމަ ހާފުގައި ރެއާލަށް ލީޑު ނަގައިދިނީ އިތުބާރު ފޯވާޑް ކަރިމް ބެންޒެމާއެވެ. މިއީ ޗެމްޕިއަންސް ލީގުގައި ބެންޒެމާ ކާމިޔާބުކުރި 70 ވަނަ ލަނޑެވެ. އެއާއެކު އޭނާ ވެފައިވަނީ ޗެމްޕިއަންސް ލީގުގެ ތާރީޚުގައި ފަސްވަނައަށް އެންމެ ގިނަ ލަނޑު ޖެހި ކުޅުންތެރިޔާއަށެވެ.

މި މެޗުގެ ދެވަނަ ހާފުގައިވެސް ރެއާލުން މޮޅު ކުޅުމެއް ދެއްކިއިރު، މެޗުގެ 60 ވަނަ މިނެޓުގައި ލިބުނު ޕެނަލްޓީއަކުން ކެޕްޓަން ސާޖިއޯ ރާމޯސް ވަނީ ރެއާލަށް ލީޑު ފުޅާކޮށްދީފައެވެ. މިއީ އޭރިއާ ތެރެއިން ރެއާލުގެ ވިނީޝިއުސް ޖޫނިއާއަށް އެޓަލާންޓާގެ ރަފައެލް ޓޮލޯއި ކުރި ފައުލަކަށް ރެފުރީ ދިން ޕެނަލްޓީއެކެވެ. އޭގެ ފަހުން މެޗުގެ 83 ވަނަ މިނެޓުގައި ލުއިސް މިއުރިއެލްގެ ލަނޑުން އެޓަލާންޓާއިން ފަރަގު ކުޑަކުރި ނަމަވެސް، އޭގެ ދެ މިނެޓު ފަހުން މާކޯ އެސެންސިއޯ ވަނީ ލަނޑެއް ޖަހައި، ރެއާލަށް އަލުން ލީޑު ފުޅާކޮށްދީފައެވެ.

މި މޮޅާއެކު މުބާރާތުގެ ކުއާޓާއަށް ރެއާލް ދަތުރުކުރިއިރު، މިއީ ޗެމްޕިއަންސް ލީގުގެ ކުއާޓާގައި މި މުބާރާތުގެ އެންމެ ކާމިޔާބު ޓީމު ކަމަށްވާ ރެއާލް ކުޅޭނެ 36 ވަނަ ފަހަރެވެ. މިހާތަނަށް ހަ ޓީމެއް ޗެމްޕިއަންސް ލީގުގެ ކުއާޓާގެ ޖާގަތައް ޔަގީންކޮށްފައިވާއިރު، މި މުބާރާތުގެ ކުއާޓާ ފައިނަލުގެ ގުރުއަތުލުން އޮންނާނީ އަންނަ ހުކުރު ދުވަހުއެވެ.