މާބަނޑު އަންހެނެއްގެ ބަނޑަށް 22 ހަފްތާ ނުވަނީސް ކުއްޖާ ވިހައިފިނަމަ އެ ބަލާނީ ސްޕޮންޓޭނިއަސް އެބޯޝަންއެއްގެ ގޮތުގައކަމަށާއި އެފަދަ ހާލަތުގައި އަމަލުކުރާނެ ގޮތަކީ ކުއްޖާގެ ވިންދު ހުއްޓެންދެން ބޭއްވުންކަމަށް އައިޖީއެމްއެޗުން ބުނެފިއެވެ.
މި މަހުގެ 13 ވަނަ ދުވަހުގެ ރޭ އެ ހޮސްޕިޓަލުގައި ދުވަސް ނުފުރާ ވިހެއި ކުއްޖަކަށް ފަރުވާ ނުދީ މަރުވާން ދޫކޮށްލިކަމުގެ ތުހުމަތުތައް އާއިލާއިން ވަނީ ކޮށްފައެވެ. އެ ކުއްޖާ ވިހެއީ ބަނޑަށް ފަސް މަހުގައެވެ. ހަފްތާއިން ބަލާ ނަމަ އެއީ 17 ނުވަތަ 18 ހަފްތާއެވެ. ކުއްޖާއަށް 22 ހަފްތާ ވަނީ ބަނޑަށް ހަ މަހުގައެވެ.
އެ ކުއްޖާ ވިހައިގެން އެއްވެސް ވަރަކަށް ނިވާ ނުކޮށް ސާފުވެސް ނުކޮށް، ނަރސިން ޓްރޭއެއްގައި ބާއްވާފައި އޮތް ފޮޓޯއާއި ވީޑިއޯ އާންމުކޮށް އާއިލާއިން ބުނީ ކުއްޖާ މަރުވީ ހަ ގަޑިއިރު ފަހުން ކަމަށާއި، އެތައް އާދޭހެއް ކުރުމުންވެސް އެއްވެސް ފަރުވާއެއް ނުދޭކަމަށް އާއިލާއިން ވަނީ ބުނެފައެވެ.
އެކަމާގުޅިގެން އައިޖީއެމްއެޗުން ނެރުނު ބަޔާނުގައި ބުނީ އެ ހޮސްޕިޓަލަށް ކޮންމެ ފުރާނައެއްވެސް މުހިންމު ކަމަށެވެ. ސިއްހީ ފަރުވާއަކީ އިލާހީ ޤާނޫނުތަކުގެ އިތުރުން ސައިންޓިފިކް އަދި ސިއްހީ ގޮތުން މިހާތަނަށް ހޯދިފައިވާ ހޯދުންތަކާއި އަދި ބައެއް ހާލަތްތަކުގައި އެނގި ކަށަވަރުވެފައިވާ ޢިލްމުގެ މައްޗަށް ބިނާވާ ކަމެއް ކަމަށެވެ. އެ ކަންކަމަށް ބަލާ ފުރާނަ ސަލާމަތްކުރުމަށް ދެވޭނެ ހުރިހާ ފަރުވާއެއްވެސް ހޮސްޕިޓަލުން ދޭނެ ކަމަށެވެ.
އެ ހޮސްޕިޓަލުން ބުނީ މާބަނޑު މީހެއްގެ ބަނޑަށް ދަރިފުޅު ނިޔާވެއްޖެނަމަ ނުވަތަ ވަކި އުމުރެއްގެ ކުރިން ވިހައިފިނަމަ އެކަން ބަލަނީ ސްޕޮންޓޭނިއަސް އެބޯޝަން ނުވަތަ ދިވެހި ބަހުންނަމަ ބައިގެން ދިއުން ކަމަށެވެ. ރާއްޖޭގައި ސްޕޮންޓޭނިއަސް އެބޯޝަންއެއްކަމަށް ބަލަނީ ބަނޑަށް 22 ހަފްތާ ނުވަނީސް ބަނޑުގައިވާ ދަރިފުޅު ނިޔާވެއްޖެނަމަ ނުވަތަ ވިހައިފިނަމަ ކަމަށެވެ. އެގޮތުން ބަނޑަށް 12 ހަފްތާއިން ފެށިގެން ވެސް ކުއްޖާގެ ވިންދު ހުންނާނެ ކަމަށާއި 22 ހަފްތާ ނުވަނީސް ވިހާއިރު ވިންދު ހުރިނަމަވެސް ބަރުދަނުގައި 500 ގްރާމް ހަމަ ނުވުމުގެ އިތުރަށް އިންސާނަކު ދިރި ހުރުމަށް ބޭނުންވާ ބައެއް ގުނަވަންތައްވެސް ފުރިހަަ ނުވާނެކަމަށް ހޮސްޕިޓަލުގެ ބަޔާނުގައި ބުނެފައިވެއެވެ.
އެ އުމުރުގައި ވިހާ ކުއްޖެއްގެ ނުވަތަ ބައިގެންދާ ކުއްޖެއްގެ ފުރާނަ ސަލާމަތް ކުރުމަށް ފަރުވާ ދިނުމަކީ ހޮސްޕިޓަލްތަކުގައި ކުރާ ކަމެއް ނޫން ކަމަށާއި މިފަދަ އަމަލުކުރާ ގޮތަކީ، ވިހާއިރު ކުއްޖާގެ ވިންދު ހުރިނަމަ ވިންދު އެއްކޮށް ދަންދެން ކުއްޖާ ބޭއްވުން ކަމަށްވެސް ބުނެފައިވެއެވެ. އެއީ އާއިލާއަށްވެސް އަދި އެހެން މީހުންނަށްވެސް ބަލަން ތިބެން ފަސޭހަ މަންޒަރަކަށް ނުވި ނަމަވެސް އެފަދަ ހާލަތްތަކުގައި ކަންތައް ކުރާ ގޮތާއި ހާލަތުގެ ފުރިހަމަ މައުލޫމާތު ކުއްޖާގެ މައިންބަފައިންނަށް ދޭ ކަމަށާއި، އާއިލާގެ އެހެން މެމްބަރުންނާއި ތިން ވަނަ ފަރާތަކަށް އެ މައުލޫމާތުތައް ހިއްސާ ނުކުރާ ކަމަށް ބުންޏެވެ.
އައިޖީއެމްއެޗުން މިހެން ބުނި ނަމަވެސް ކުއްޖާގެ މައިންބަފައިންނަށް އެ މައުލޫމާތުތައް ހިއްސާކޮށްފައި ނުވާކަމަށް އާއިލާއިން ބުނެއެވެ. އަދި ކުއްޖާގެ ބަރުދަން ބެލުމަށް ފަހު ސަލާމަތް ވުމަކީ ނާދިރު ކަމެއް ކަމަށް ބުނި ކަމަށާއި އިތުރު އެއްވެސް މައުލޫމާތެއް ނުދޭކަމަށް އާއިލާއިން ބުނެފައިވެއެވެ.
އައިޖީއެމްއެޗުން ބުނީ އެފަދަ ހާލަތްތަކުގައި ހޮސްޕިޓަލާއި ހޮސްޕިޓަލްގެ މުވައްޒަފުންގެ ފޮޓޯއާއި ވީޑިއޯ ސޯޝަލް މީޑިއާގައި އާންމުކޮށް އެފަދަ ކަންކަން ކުރުމަކީ ހިތާމަކުރާ ކަމެއް ކަމަށާއި އެކަން އެގޮތަށް ނުކުރުމަށް އިލްތިމާސްކުރާ ކަމަށެވެ.
