ނައިފަރުގެ ފެނާއި ނަރުދަމާގެ މައްސަލައިގައި ނައިފަރު ދާއިރާގެ މެމްބަރު ހުށަހެޅުއްވި ގަރާރު އެންވައިރަންމެންޓް ކޮމެޓީން ދިރާސާކޮށް ނިންމި ގޮތަށް މަޖިލީހުން ފާސްކޮށްފި

ނައިފަރުގެ ފެނާއި ނަރުދަމާގެ މަސައްކަތް ނުނިމި، އެ މަސައްކަތް ހުއްޓިފައިވުމުގެ ސަބަބުން ރައްޔިތުންނަށް ކުރިމަތިވި ދަތިތައް ޙައްލުކޮށްދިނުމަށް ސަރުކާރަށް ގޮވާލައި ހުށަހެޅި ޤަރާރު، އެންވަޔަރަންމަންޓް އެންޑް ކްލައިމެޓް ޗޭންޖް ކޮމިޓީން ދިރާސާކޮށް ނިންމި ގޮތަށް މަޖިލީހުން ފާސްކޮށްފިއެވެ.

މިގަރާރު ފާސްވީ، ވޯޓުގައި ބައިވެރިވެޑައިގެންނެވި މެންބަރުންގެ އަގްލަބިއްޔަތުންނެވެ. ޖަލްސާގައި ހާޒިރުވެވަޑައިގެން ތިއްބެވި 35 މެމްބަރުންގެ ތެރެއިން ވޯޓުގައި ބައިވެރިވެޑައިގެންނެވީ 34 މެމްބަރުންނެވެ. މި ރިޕޯޓް ފާސްކުރުމަށް ފެންނަ ކަމަށް ވޯޓުދެއްވީ 34 މެމްބަރުންނެވެ. އަދި ނުފެންނަ ކަމަށް އެއްވެސް މެމްބަރަކު ވޯޓެއް ނުދެއްވައެވެ.

Advertisement

ނައިފަރުގެ ފެނާއި ނަރުދަމާގެ މަސައްކަތުގެ ކޮންޓްރެކްޓް ކުއްލިގޮތަކަށް ބާތިލްކުރީ ކަމަށް ދޭހަވާގޮތަށް ނައިފަރު ދާއިރާގެ މެމްބަރު ގަރާރުގައި ފާހަގަ ކުރައްވާފައިވަނީ ހަގީގަތާ ޚިލާފު މައުލޫމާތެއްކަން ކޮމެޓީއަށް ފާހަގަކުރެވިފައިވާ ކަމަށް އެންވަޔަރަންމަންޓް އެންޑް ކްލައިމެޓް ޗޭންޖް ކޮމިޓީގެ މުގައްރިރު، ހޯރަފުށީ ދާއިރާގެ މެމްބަރު އަހްމަދު ސަލީމު ވިދާޅުވިއެވެ. އެހެންކަމުން ގަރާރު ފާސްނުކުރުމަށް ކޮމެޓީން ނިންމާފައިވާކަމަށް ވެސް މެމްބަރު ސަލީމް ވިދާޅުވިއެވެ.

މި ރިޕޯޓުގައި ހިމެނޭ ކަންކަން ފާހަގަކުރައްވަމުން ސަލީމް ވިދާޅުވީ، މިސަރުކާރު އައިއިރު މި މަޝްރޫއުގެ ނިމިފައި އޮތީ 34.2 އިންސައްތައެވެ. އިތުރުކުރެވުނު މުއްދަތާއެކު ވެސް މަޝްރޫއުގެ މަސައްކަތް ލަސްވުމުން، މަޝްރޫއުގައި ކަނޑައެޅިފައިވާ މުއްދަތަށްވުރެ އިތުރުވާ ކޮންމެ ދުވަހަކަށް ކޮންޓްރެކްޓްގައި ބުނާ އަދަދަށް ފައިސާ ކަނޑޭނެ އެންމެ މަތީ ނިސްބަތަށް ފައިސާ ކަނޑައި، ޑިލޭ ޑެމޭޖަށް ކެނޑޭނެ އިތުރު ފައިސާއެއް ނެތުމުން ސަރުކާރުން ކޮންޓްރެކްޓް ބާތިލްކުރަން ނިންމީކަމަށެވެ.

 ކޮންޓްރެކްޓް ބާތިލްކުރުމުގެ ނޯޓިސް ފޮނުވާފައިވަނީ އޭޖީގެ ވެސް ލަފަޔާއި، މަޝްރޫއުގެ ޑޯނަރ، އިސްލާމިކް ޑިވެލޮޕްމެންޓް ބޭންކުގެ އިއުތިޒާޒެއް ނެތްކަމުގެ ލިޔުމަކާއެކުގައެވެ.

 23 ޖެނުއަރީ 2020 ގައި ކޮންޓްރެކްޓް ބާތިލްކުރިއިރު މަޝްރޫއުގެ 47 އިންސައްތަ ވަނީ ޚަރަދުވެފައެވެ.

ޅ. ނައިފަރާއި ތ. ވޭމަންޑޫ ހިމެނޭ ގޮތުން ފެނާއި ނަރުދަމާގެ މަޝްރޫއުއަކީ ލަކީ އެކްސްޕޯޓްސް ޓްރިވެނީ އިންޖިނިއަރިންގ ޕްރައިވެޓް ލިމިޓެޑާ ޖޮއިންޓް ވެންޗަރ އުސޫލުން މަސައްކަތް ހަވާލުކޮށްފައި އޮތީ 18 ޖޫން 2017 ގައެވެ. 148.9 މިލިއަން ރުފިޔާގެ މި މަޝްރޫއު ހަވާލުކޮށްފައި އޮތީ 3 ޖެނުއަރީ 2019 ގައި ނިންމުމަށެވެ. ކަނޑައާޅަފައިވާ މުއްދަތައް މަސައްކަތް ނުނިމޭތީވެ ދުވަސް އިތުރުކުރުމަށް މިނިސްޓްރީގައި އެދުމުން 249 ދުވަސް (9 މަސް) އިތުރުކޮށްދީފައިވާކަން ލިޔެކިޔުންތަކުން ފެންނަން ހުރި ކަމަށް ރިޕޯޓުގައިވެއެވެ. މި މުއްދަތާއެކުން މަސައްކަތް ނިންމަންޖެހޭ ތާރީޚަކީ 9 އޮކްޓޯބަރ 2019 އެވެ.

މުއްދަތު ހަމަވިއިރުވެސް މި މަސައްކަތް ނުނިމޭތީއާއި، މަސައްކަތުގެ ސްޕީޑް ދަށްވުމާއި، ސައިޓަށް ބޭނުންވާ އިކްއިޕްމެންޓް ފޯރުކޮށްނުދެވުމާއި، ސަބްކޮންރެކްޓަރުންނަށް މަސައްކަތް ހަވާލުކުރިއިރު ލޭބަރުންގެ މައްސަލަތައް ދިމާވުންފަދަ ކަންކަން މަޝްރޫޢުގެ ކޮންސަލްޓެންޓް ސަރުކާރުގެ ކަމާބެހޭ ފަރާތްތަކަށް އެތައް ފަހަރެއްގެ މަތިން އަންގާފައިވާކަމަށް ވެސް ރިޕޯޓުގައިވެއެވެ.

މިކަންކަން ހައްލުކުރުމަށް އެކިފަހަރުމަތިން ކޮންޓްރެކްޓަރާ ބައްދަލުކޮށްފައިވާކަމަށާއި، 28 ފަހަރެއްގެ މަތިން ކޮންޓްރެކްޓަރަށް ސިޓީ އާއި ނޯޓިސް ފޮނުވާފައިވާކަން ލިޔެކިޔުންތަކުން ފެންނަން އެބައޮތް ކަމަށާއި، ކޮމެޓީއިން ބެލިބެލުމުން އެނގުނުގޮތުގައި، މި މަސައްކަތް ހަވާލުކޮށްފައިވާ ކުންފުންޏަކީ މިފަދަ މަސައްކަތްތަކުގެ ތަޖުރިބާއެއް ނެތް ކުންފުންޏެއްކަމަށް ކޮމެޓީ ރިޕޯޓުގައި ފާހަގަކޮށްފައިވެއެވެ.   

މި މަޝްރޫޢު ކުރިއަށް ގެންދިއުމަށް އެމްޑަބްލިއުއެސްސީ އާއެކު އާ އެއްބަސްވުމެއް 26 އޮކްޓޯބަރ 2020 ގައި ވަނީ ވެފައެވެ. މި މަސައްކަތް އެމްޑަބްލިއުއެސްސީން ކުރިއަށްގެންދާކަން ކިތާބީ ހެކިތަކުން ފެންނަން އެބައޮތެވެ. އަދި އެމްޑަބްލިއުއެސްސީއިން 9 ޖުލައި 2021 ގައި ނިންމާނެ ކަމުގެ ޔަގީންކަން ކޮމެޓީއަށް ލިބިފައިވާކަމަށް ވެސް ސަލީމް ވިދާޅުވިއެވެ.