އުމަރު ނަސީރާ މެދު ފިޔަވަޅު އަޅައި، ހައްޔަރު ކުރުމަށް މަޖިލީހުގައި ހިމެނޭ އެމްޑީޕީގެ ބައެއް މެމްބަރުން ގޮވާލައިފި

ކުރީގެ ހޯމް މިނިސްޓަރ އުމަރު ނަސީރާ މެދު ފިޔަވަޅު އަޅައި، ހައްޔަރު ކުރުމަށް މަޖިލީހުގައި ހިމެނޭ އެމްޑީޕީގެ ބައެއް މެމްބަރުން ގޮވާލައިފިއެވެ.

އުތުރު ތިލަފަޅާ ގުޅޭގޮތުން ހަގީގަތާ ޚިލާފު ވާހަކަ ދައްކާ މީހުންނާއި، އަދި ފޭކް އެއްބަސްވުންތައް ލީކްކުރަމުންދާ މީހުންނާމެދު ޤާނޫނީ ފިޔަވަޅު އެޅުމަށް ގޮވާލައި މަޖިލީހަށް ހުށަހެޅި ކުއްލި މައްސަލާގައި ވާހަކަ ދައްކަވަމުން ބިލެއްދޫ ދާއިރާގެ މެމްބަރު އަހުމަދު ހަލީމް ވިދާޅުވީ އުމަރު ނަސީރު މިފަދަ ފޭކް އެއްބަސްވުމެއް ލީކްކޮށް، ސިފައިންގެ އަގު ވައްޓާލަމުންދާއިރު އެކަމަށް ފިޔަވަޅު ނޭޅޭކަމީ ކަންބޮޑުވާންޖެހޭ ކަމެއް ކަމަށެވެ.

މިމައްސަލާގައި ވާހަކަ ދައްކަވަމުން މުލަކު ދާއިރާގެ އެމްޑީޕީ މެމްބަރު އިބްރާހިމް ނަޞީރު ވިދާޅުވީ އުމަރު ނަސީރަކީ މީގެ ކުރިންވެސް ރާއްޖޭގެ ސަލާމަތީ ބާރުތައް ހިފުމަށް ގޮވާލައި އެފަދަ މަސައްކަތް ކުރި މީހެއްކަމަށެވެ. މިފަދަ މީހަކު މުޖުތަމައުގެ ތެރޭގައި ދޫކޮށްފައި ބެހެއްޓުމަކީ އޮތް ނުރައްކަލެއްކަމަށް އޭނާ ވިދާޅުވިއެވެ.

މަޑަވެލި ދާއިރާގެ މެމްބަރު ހުސެއިން ފިރުޝާން ވިދާޅުވީ، މީގެ ކުރިން މުޒާހަރާތަކުގައި އުމަރު ނަސީރު، ދިވެހި ސިފައިންނާ ބެހޭ ގޮތުން ދައްކާފައިވާ ވާހަކަތައް ހަނދާން ނުނެތޭ ކަމަށާއި، މިއީ ބަޢާވާތެއްގެ ކޮޅުމަތި ކަމަށެވެ. މިކަމަށް އެއްވެސް ޖާގައެއް ދެވިގެން ނުވާނެ ކަމަށް ފިރުޝާން ވިދާޅުވިއެވެ.

މެމްބަރުން ވިދާޅުވީ، ދިވެހިންގެ މިނިވަންކަމާއި، ސިޔާދަތަށް ގެއްލުންވާގޮތަށް ވާހަކަދައްކާނަމަ އެކަމަށް ހަރުކަށި ފިޔަވަޅު އެޅުމަށް މެމްބަރުން ދަނީ ތަކުރާރުކޮށް ގޮވާލަމުންނެވެ. މިއަދުގެ ސަރުކާރަކީ ދިވެހި ރައްޔިތުންނަށް ގެއްލުންދޭން ވިސްނާނެ ބައެއް ނޫންކަމަށާއި، މިއީ ރައްޔިތުންގެ މެދުގައި ފިތުނަ އުފެއްދުމަށް ހިންގާ ކަމެއްކަން މެމްބަރުން ފާހަގަކުރެއްވިއެވެ.