ޕޮލިސް ބޯޑަށް އާންމުންގެ ތެރެއިން ހާމިދު އަބްދުލްޣަފޫރު އައްޔަންކުރުމަށް މަޖިލީހުން ފާސްކޮށްފި
ޕޮލިސް ބޯޑަށް ރައްޔިތުންގެ ތެރެއިން 5 މީހަކު ކުރިމަތިލި
ހާމިދު އަބްދުލްޣަފޫރު
ޕޮލިސް ބޯޑުގެ މެމްބަރުކަމަށް އާންމުންގެ ތެރެއިން އައްޔަންކުރާ މެމްބަރެއްގެ ގޮތުގައި ހާމިދު އަބްދުލްޣަފޫރު އައްޔަންކުރުމަށް ރައްޔިތުންގެ މަޖިލީހުން ފާސްކޮށްފިއެވެ.
ހާމިދު އަބްދުލްޣަފޫރަށް ރުހުން ދިނުމަށް ފެންނަކަމަށް ފާސްކޮށްފައިވަނީ ވޯޓުގައި ބައިވެރިވެވަޑައިގެންނެވި 41 މެމްބަރުންގެ އިއްތިފާގުންނެވެ.
ޕޮލިސް ބޯޑަށް އާންމުންގެ ތެރެއިން މީހަކު އައްޔަންކުރުމަށް އެކަމަށް ކުރިމަތިލީ މީހުންގެ ނަންތައް ދިރާސާކޮށްފައިވަނީ ސަލާމަތީ ޚިދުމަތްތަކާ ބެހޭ ކޮމިޓީންނެވެ. ޕޮލިސް ބޯޑަށް ރައްޔިތުންގެ ތެރެއިން 5 މީހަކު ކުރިމަތިލިއެވެ. އެފަރާތްތަކާ އިންޓަރވިއު ކުރުމަށްފަހު ކޮމިޓީން ފާސްކޮށްފައިވަނީ ހާމިދު އަބްދުލްޣަފޫރުގެ ނަން އެކަންޏެވެ.
ޕޮލިސް ބޯޑަށް އާންމު ރައްޔިތންގެ ތެރެއިން މަޖިލީހުން ދެ މެމްބަރަކު އައްޔަންކުރަންޖެހެއެވެ. އެހެންކަމުން ކޮމިޓީ ރިޕޯޓްގައި ބުނެފައިވަނީ ދެން އައްޔަންކުރަންޖެހޭ މެމްބަރު އައްޔަންކުރުމަށް އެކަމަށް މަޖިލީހުގެ އިދާރާއިން އިއުލާންކުރުމަށެވެ.
ޕޮލިސް ބޯޑް އެކުލެވިގެންވަނީ 7 މެމްބަރުންގެ މައްޗަށެވެ. ރައީސް އައްޔަން ކުރައްވަން ޖެހޭގޮތަށް ޕޮލިސް ބޯޑް އޮންނައިރު ބޯޑުގައި ހިމެނެނީ ރައީސުލްޖުމްހޫރިއްޔާ އައްޔަންކުރާ 2 މެމްބަރުންނާއި ފަންނީ ދާއިރާއަކުން ތައުލީމާއި ތަޖުރިބާ ލިބިފައިވާ 3 މީހުންގެ އިތުރުން އާންމު ރައްޔިތުންގެ ތެރެއިން ކުރިމަތިލާ 2 މީހުންނެވެ.
އާންމު ދެ މެންބަރުން ބޯޑަށް ހޮވަނީ މަޖިލީހުން އިއުލާންކުރުމުން ކުރިމަތިލާ ފަރާތްތަކުގެ ތެރެއިން މަޖިލީހުން ނަންތައް ދިރާސާކޮށް މަޖިލީހުން ފާސްކުރާ ދެ ނަމެކެވެ.
