ވިއެނާ ކޮންވެންޝަންގައި ބައިވެރިވުމުގެ މައްސަލަ ދިރާސާކުރުމަށް ކޮމިޓީއަށް

ވިއެނާ ކޮންވެންޝަންސް އޮން ރޯޑް ޓްރެފިކް 1968 އާއި ވިއެނާ ކޮންވެންޝަންސް އޮން ރޯޑް ސައިންސް އެންޑް ސިގްނަލްސް 1968 ގައި ރާއްޖެއިން ބައިވެރިވުމުގެ މައްސަލަ ދިރާސާކުރުމަށް ޚާރިޖީ ގުޅުންތަކުގެ ކޮމިޓީއަށް ފޮނުވައިފިއެވެ.

ހޯމަ ދުވަހުގެ ޖަލްސާގައި ވަނީ މިކޮންވެންޝަންތަކުގައި ބައިވެރިވުމާމެދު ރައްޔިތުންގެ މަޖިލީހުން ގޮތެއް ނިންމަވައި ދެއްވުމަށް އެދި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު މަޖިލީހަށް ފޮނުއްވާފައިވާ ސިޓީފުޅު އަމީން އާންމު އިއްވަވާފައެވެ. މިސިޓީފުޅުގައި ވަނީ އިންޓަރނޭޝަނަލް ރޯޑް ޓްރެފިކްގެ ރައްކާތެރިކަން ކަށަވަރުކޮށް ކުރިއެރުވުމަށްޓަކައި އެއްހަމަ އިޖުރާޢަތްތަކެއް އެކުލަވާލުމާއި އެއް ގައުމުން އަނެއް ގައުމަށް ދަތުރުކުރާ އުޅަނދުތަކާ ގުޅިގެން އެފަދަ ގައުމުތަކުގެ މަގުތަކާއި ޓްރެފިކް ނިޝާންތަކާއި ޓްރެފިކާ ގުޅޭ އުސޫލުތައް އެއްހަމަކުރުމުގެ މަގްސަދުގައި އެކުލަވާލާފައިވާ ދެ މުއާހަދާކަމުގައިވާ ވިއެނާ ކޮންވެންޝަންސް އޮން ރޯޑް ޓްރެފިކް އާއި ވިއެނާ ކޮންވެންޝަންސް އޮން ރޯޑް ސައިންސް އެންޑް ސިގްނަލްސްގައި ރާއްޖެއިން ބައިވެރިވުމަށް ވަޒީރުންގެ މަޖިލީހުގެ ބައްދަލުވުމުގައި ނިންމަވާފައިވާކަމަށެވެ.

އެގޮތުން ފެބްރުއަރީ މަހުގެ 2 ވަނަ ދުވަހު އޮތް ވަޒީރުންގެ މަޖިލީހުންގެ ބައްދަލުވުމުގައި އެ ދެ ކޮންވެންޝަންގައި ބައިވެރިވުމަށް ނިންމަވާފައިވާތީ އެކަމާމެދު ރައްޔިތުންގެ މަޖިލީހުން ގޮތެއް ނިންމެވުމަށް އެދިވަޑައިގަންނަވާކަމަށް ރައީސްގެ ސިޓީފުޅުގައި ވަނީ ވިދާޅުވެފައެވެ.