ކޮވިޑް-19ގެ ކޭސްތަކުގެ އަދަދު ދަށަށް: އާދިއްތަ ދުވަހު 96 ކޭސް

އާދިއްތަ ދުވަހު ރާއްޖެއިން 96 މީހަކު ކޮވިޑް-19ށް ޕޮޒިޓިވްވެފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ތަފާސްހިސާބުތަކުން ދައްކައިފިއެވެ.

އެޗްޕީއޭގެ ތަފާސްހިސާބުތައް ދައްކާގޮތުން ހޮނިހިރު ދުވަހުގެ އިރު އޮއްސި ހަޔަކުން ފެށިގެން އާދިއްތަ ދުވަހު އިރު އިއްސި ހަޔަކާ ދެމެދު ނެގި 3،071 ސާމްޕަލްއިން ޕޮޒިޓިވްވީ 96 މީހުންނެވެ. އޭގެ ތެރެއިން 75 މީހުން ޕޮޒިޓިވްވީ މާލެ ސަރަހައްދުންނެވެ. އަދި އަތޮޅުތެރެއިން 10 މީހުންނާއި ރިސޯޓުތަކުން 10 މީހަކު ޕޮޒިޓިވްވެފައިވާއިރު، އިންޑަސްޓްރިއަލް ރަށްތަކުން ޕޮޒިޓިވްވީ އެކަކެވެ.

މިއާއެކު މުޅި ރާއްޖެއިން ޕޮޒިޓިވްވި މީހުންގެ ޖުމްލަ އަދަދު 21،572ށް އަރާފައި ވާއިރު އޭގެ ތެރެއިން 19،095 މީހުން ވަނީ ބަލިން ރަނގަޅުވެފައެވެ. އަދި 2،406 މީހުންނަށް ފަރުވާދެމުން އަންނައިރު 125 މީހަކަށް ފަރުވާދެމުން އަންނަނީ އެޑްމިޓްކޮށްގެންނެވެ.

މދިޔަ ޖެނުއަރީ މަހުގެ ފަހުކޮޅުން ފެށިގެން ރާއްޖޭގައި ކޮވިޑް-19ގެ ކޭސްތައް އިތުރުވެފައިވާއިރު ކޮންމެ ދުވަހަކުހެން 150އިން މަތީ އަދަދުތަކުން ކޭސްތައް ރިޕޯޓުކޮށްފައިވެއެވެ. އޭގެ ސަބަބުން މާލެ ސަރަހައްގައި ބަލިން ރައްކާތެރިވުމަށް އެޅި ފިޔަވަޅުތައް ވަރުގަދަކޮށްފައިވާއިރު އިރު އޮއްސި ހައެއްގެ ފަހުން އެއްގަމު އުޅަނދުތައް ދުއްވުން ވަނީ މަނާކޮށްފައެވެ. ރޭގަނޑު 8ގެ ފަހުން ކެފޭ ރެސްޓޯރަންޓުތަކުން ޑައިން އިން ހިދުމަތް ދިނުން ބަންދުކޮށްފައިވާއިރު، ރޭގަނޑު 11ގެ ފަހުން ވަނީ ބޭރުގައި އުޅުން މަނާކޮށް ކަރފިއު އިއުލާންކޮށްފައެވެ.

މީގެ އިތުރަށް ގްރޭޑް 7އިން ދަށުގެ ގްރޭޑްތަކުގެ ދަރިވަރުންނަށް އޮންލައިންކޮށް ކިޔަވައިދޭގޮތަށް ނިންމާފައިވާއިރު، މިސްކިތްތަކުގައި ގައިދުރުކޮށްގެން ނަމާދުކުރަން ވެސް ވަނީ އަންގާފައެވެ.

މި ފިޔަވަޅުތަކަށް މިހާރު ގިނަ ދުވަސްތަކެއް ވެފައިވާއިރު ފާއިތުވި އެއް ހަފްތާއެއްހާ ދުވަސް ތެރޭގައި ކޭސްތައް އަންނަނީ މަޑުމަޑުން ދަށް ވަމުންނެވެ. އެގޮތުން ކޭސްތަކުގެ އަދަދު 100ން ދަށުގައި ހުންނަތާ ވެސް މިހާރު ވަނީ ދެ ދުވަސް ވެފައެވެ.

ރާއްޖެއަށް ކޮވިޑް-19ގެ ތިން ވަނަ ރާޅެއް ބިންދާލިއިރު އެޗްޕީއޭއިން މަސައްކަތްކުރަމުން އައީ ދެވަނަ ލޮކްޑައުން އަކަށް ނުގޮސް ކޭސްތައް ކޮންޓްރޯލްކުރެވޭތޯއެވެ. އެޗްޕީއޭއިން ބުނިގޮތުގައި ރާއްޖެއަށް އައި ކޮވިޑް-19ގެ ފުރަތަމަ ރާޅާއި ދެވަނަ ރާޅުގައި ވެސް ނުފެންނަ ވަރަށް ތިން ވަނަ ރާޅުގައި ކޭސްތައް ރިޕޯޓުކޮށްފައިވެއެވެ.