މިޔަރަށް ކާންދިނުމަކީ މަނާ ކަމެއްކަން ހަނދާންކޮށްދީފި

ބައެއް ރިސޯޓުތަކާއި ބައެއް އެހެން ތަންތަނުގައި ވެސް މިޔަރަށް ކާންދިނުން އާންމުވަމުންދާތީ އެއީ މަނާ ކަމެއް ކަން ޓޫރިޒަމް މިނިސްޓްރީން ހަނދާންކޮށްދީފިއެވެ.

ޓޫރިޒަމް މިނިސްޓްރީން ހުރިހާ ޓޫރިޒަމް ފެސިލިޓިތަކާއި، ސްޓޭކް ހޯލްޑަރުންނަށް ފޮނުވި ސަރކިއުލަރއެއްގައި ބުނީ ރިކްރިއޭޝަނަލް ޑައިވިންއާ ގުޅޭ ގަވައިދުގައިވާ ގޮތުން ޓޫރިސްޓް ހިދުމަތްދޭ ތަންތަނާއި ޑައިވިން ފެސިލިޓީސްތަކާއި އެކްސްކާޝަންތައް ރާވާ ފަރާތްތަކުން މިޔަރަށް ކާންދިނުމަކީ މަނާ ކަމެއް ކަމަށެވެ.

މިނިސްޓްރީގެ ސަރކިއުލާގައި ބުނީ ރާއްޖޭގައި ހިންގާ ޓޫރިޒަމް ހަރަކާތްތަކަކީ ގާނޫނާއި ގަވައިދާ އެއްގޮތަށް ރާއްޖޭގެ ތިމާވެއްޓަށާއި ބަޔޯޑައިވާސިޓީ އަށް ގެއްލުން ނުވާނެގޮތަށް ކުރިއަށްގެންދާ ކަންކަމަށް ވާން ޖެހޭނެ ކަމަށެވެ.

މިޔަރަށް ކާންދިނުމަކީ މަނާކަމެއްކަން މިނިސްޓްރީން ހަނދާންކޮށްދީފައިވާއިރު، ފަހަކަށް އައިސް ރާއްޖޭގެ އެކި ހިސާބުތަކުގައި ރިސޯޓުތަކުން މިޔަރަށް ކާންދިނުމަކީ ކުޅިވަރެއްގެ ގޮތުގައި ކުރަމުން އަންނަ ކަމެކެވެ. ބައެއް ޑައިވިން ޓީމްތަކުން ވެސް މިޔަރު އުޅޭ ސަރަހައްދުތަކަށް ގޮސް އެއަށް ކާންދީހަދާއިރު، އެ ސަރަހައްދުތަކަށް ފައިބާ އުޅޭ މަންޒަރުވެސް ބައެއް ފަރާތްތަކުން އާންމުކުރާ ފޮޓޯ ވީޑިއޯތަކުން ފެނެއެވެ. ބައެއް ފަހަރު މިކަންކަމުގެ ތެރޭގައި މީހުންނަށް އަނިޔާވެސް ވެފައިވެއެވެ.