މޯލްޑިވިއަން އިން މާފަރު އިންޓަރނޭޝަނަލް އެއަރޕޯޓުން މުމްބާއީ އަށް ސީދާ ދަތުރުތައް ފަށަން ނިންމައިފިއެވެ.

މޯލްޑިވިއަން އިން މިކަން ހާމަކޮށްފައިވަނީ އާދިއްތަ ދުވަހު ބޭއްވި ނޫސްވެރިންގެ ބައްދަލުވުމެއްގައެވެ. މި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އައިލެންޑް އޭވިއޭޝަން ސާވިސަސް (އައިއޭއެސް) ގެ މެނޭޖިންގ ޑިރެކްޓަރ މުހައްމަދު މިހާދު ވިދާޅުވީ ސީދާ ދަތުރުތައް ފަށަނީ އަންނަ އޭޕްރިލް މަހުގެ 13 ވަނަ ދުވަހު ކަމަށާއި މޯލްޑިވިއަން އިން ކޮންމެ ހަފްތާއަކު ތިން ފްލައިޓް މުމްބާއީއަށް ބާއްވާނެ ކަމަށެވެ. އަދި ކުރިއަތް އޮތް ތާނގައި އިންޑިއާގެ އިތުރު މަންޒިލްތަކަށް ވެސް މާފަރު އިންޓަރނޭޝަނަލް އިން ދަތުރުތައް ފަށާނެ ކަމަށް އޭނާ ވިދާޅުވިއެވެ.

މިހާދު ވިދާޅުވީ މާފަރު ހިމެނޭ ހަތަރު އަތޮޅަށް ސްޕީޑް ބޯޓުގައި ގަޑިއިރަކުން ފަތުރުވެރިން ގެންދެވޭނެ ކަމަށާއި މި ފުުރުސަތުގެ ބޭނުން ގެސްޓް ހައުސްތަކުން ރަނގަޅަށް ހިފުމަށެވެ. މިއަދާ ހަމައަށް 211 ޖެޓް މާފަރު އެއަރޕޯޓަށް ޖައްސާފައިވާކަން ފާހަގަކުރައްވައި މިހާދު ވިދާޅުވީ އުންމީދަކީ ސީދާ ދަތުރުގެ ސަބަބުން މާފަރުގައި ވެސް ފަތުރުވެރިކަން އިތުރަށް ފުޅާވެގެން ދިޔުން ކަމަށެވެ.

މާފަރު އިންޓަރނޭޝަނަލް އެއަރޕޯޓުން މުމްބާއީ އަށް ސީދާ ދަތުރުތައް ފަށަން ނިންމާފައިވާއިރު މާފަރު އިންޓަނޭޝަނަލް އެއަރޕޯޓް ތަރައްގީކުރުމުގެ ބޮޑެތި މަޝްރޫއުތަކެއް ވަރަށް އަވަހަށް ފެށިގެންދާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް ވަނީ ވިދާޅުވެފައެވެ. ރައީސް ވިދާޅުވީ މާފަރު އެއަރޕޯޓްގެ ދެވަނަ ފިޔަވަހީގެ މަސައްކަތްތައް ކުރިއަށް ގެންދިއުމަށް އަބޫދާބީ ފަންޑުން އެޕްރޫވަލް ލިބި، ފެބްރުއަރީ 28 ވަނަ ދުވަހު ޓެންޑަރިންނަށް ހުޅުވާލެވިފައިވާ ކަމަށެވެ. އަދި މިއާއެކު އެއަރޕޯޓް ތަރައްގީކުރުމުގެ މަސައްކަތް ވަރަށް އަވަހަށް ފެށިގެންދާނެ ކަމަށް ރައީސް ވިދާޅުވިއެވެ.

 ރައީސް ޞާލިހް ވިދާޅުވީ މާފަރު އިންޓަނޭޝަނަލް އެއަރޕޯޓަކީ ރާއްޖޭގައި މިވަގުތު ހިންގަމުންދާ އެއަރޕޯޓްތަކުގެ ތެރެއިން އެންމެ މުހިންމު އެއް އެއަރޕޯޓްކަމަށެވެ.

އެގޮތުން، 2019 ވަނަ އަހަރު އެކަނިވެސް އިންޓަރނޭޝަނަލް 229 ފްލައިޓް މާފަރު އެއަރޕޯޓަށް ޖައްސާފައިވާއިރު، 2021 ވަނަ އަހަރުގެ ފުރަތަމަ ދެމަސް ދުވަހުގެ ތެރޭގައި ގިނަ އަދަދެއްގެ ޕްރައިވެޓް ޖެޓް މާފަރު އެއަރޕޯޓަށް ޖައްސާފައިވާކަން ރައީސް ފާހަގަކުރެއްވިއެވެ.

ކޮވިޑް-19ގެ ސަބަބުން ރާއްޖޭގެ ބޯޑަރު ބަންދުކޮށްފައި އޮތުމަށްފަހު އަލުން ހުޅުވާލިފަހުން ފާއިތުވި އަހަރު ގިނަ އަދަދެއްގެ ޕްރައިވެޓް ޖެޓް މާފަރު އެއަރޕޯޓަށް ޖައްސާފައިވާކަން ތަފާސްހިސާބުތަކުން ދައްކައެވެ. ބޯޑަރު އަލުން ހުޅުވާލިއިރު، އިންޓަނޭޝަނަލް އެއާޕޯޓަކުން ލިބޭ ޚިދުމަތްތަކާ އެކު މާފަރު އެއަރޕޯޓް ހުޅުވާފައިވާއިރު ޑޮމެސްޓިކް އެއަރޕޯޓެއްގެ ގޮތުގައި ޚިދުމަތްދޭން ފަށާފައި ވަނީ 2019 ވަނަ އަހަރުގެ ޑިސެމްބަރ މަހުއެވެ. އަދި މިހާރު މާފަރު އެއަރޕޯޓް ހިންގަނީ އައިލެންޑް އޭވިއޭޝަނުންނެވެ.

މާފަރު އެއަރޕޯޓު ތަރައްޤީކުރުމުގެ މަޝްރޫޢުއަށް ޖުމުލަ 60 މިލިއަން ޑޮލަރު ޚަރަދުވިއެވެ. މިއީ އަބޫދާބީ ހިލޭ އެހީގެ ދަށުން ހިންގި މަޝްރޫޢުއެކެވެ. އެއަރޕޯޓު ތަރައްޤީކޮށްފައިވަނީ، އެންމެ ބޮޑެތި މަތިންދާ ބޯޓުތައް ކަމަށްވާ އެއަރ ބަސް އޭ 320 އާއި، ބޮއިން 737 މަރުކާގެ ބޯޓު ފަހަރު ޖެއްސޭ ފެންވަރަށެވެ.