އެކަށީގެންވާ ވަގުތާއި ވަސީލަތްތަކުގެ ހައްޤު ނިޒާމީ ސިފައެއްގައި ކުރިން ނިގުޅައިގަތަސް އެ ހައްޤު މިހާރު އޮތީ އިޔާދަކޮށްފައި: އޭޖީ

އެކަށީގެންވާ ވަގުތާއި ވަސީލަތްތަކުގެ ހައްޤު ނިޒާމީ ސިފައެއްގައި ކުރިން ނިގުޅައިގަތަސް އެ ހައްޤު މިހާރު އިޔާދަކޮށްފައިވާ ކަމަށް އެޓަރނީ ޖެނެރަލް އިބްރާހީމް ރިފްއަތު ވިދާޅުވެއްޖެއެވެ.

2015 ވަނަ އަހަރު, ކުރީގެ ރައީސް ނަޝީދު 13 އަހަރަށް ޖަލަށް ލުމަށް ކްރިމިނަލް ކޯޓުން ހުކުމް ކުރުމުގެ ކުރިން އެމަނިކުފާނުގެ ގާނޫނީ ވަކީލުންގެ ޓީމު ދޫނިދޫއަށް ދިޔައިރު ކަން ހިނގައި ދިޔަ ގޮތުގެ ވާހަަކަތައް ޤާނޫނީ ވަކީލް މަހްފޫޒް ސައީދު އަމިއްލަ ބްލޮގްގައި ހިއްސާ ކުރެއްވުމާ ގުޅިގެން، އެޓަރނީ ޖެނެރަލް އިބްރާހީމް ރިފްއަތު ވިދާޅުވީ އެ ދުވަހަކީ ކޯޓުތަކުގެ އަމަލުތައް ހުރި ގޮތުން ވަކީލެއްގެ ހައިސިއްޔަތުން ލަދުވެތިވާން ޖެހުނު ދުވަހެއް ކަމަށާއި، އެ ދުވަސް މިއަދު މާޒީވެ ހިނގައްޖެ ކަމަށެވެ. އަދި އެކަށީގެންވާ ވަގުތާއި ވަސީލަތްތަކުގެ ހައްޤު ނިޒާމީ ސިފައެއްގައި ކުރިން ނިގުޅައިގަތަސް އެ ހައްޤު މިހާރު އިޔާދަކޮށްފައިވާ ކަމަށާއި ހާމަކަމާއި ހަމަހަމަކަމާއެކު އިންސާފު ލިބިދިނުމުގެ އިތުރަށް އެ މޭރުމުން އެކަން ހިނގާކަން ކޮންމެ މީހަކަށް މެ އިހްސާސް ކުރެވުމަކީ ގެއްލިފައި އޮތް އިތުބާރު އިޔާދަވެގެން ދިޔުން ކަމަށް ވެސް ރިފްއަތު ވިދާޅުވިއެވެ.

ތާރީހަށްޓަކައި: ރައީސް މުހައްމަދު ނަޝީދުގެ ހުލާސާ ބަޔާން މި ނަމުގައި އަމިއްލަ ބްލޮގްގައި މަހްފޫޒް ސައީދު ވިދާޅުވީ 12 މާޗް 2015 ދުވަހު ރައީސް ނަޝީދުއާ ބައްދަލުކުރެއްވުމަށް އެމަނިކުފާނުގެ ގާނޫނީ ވަކީލުންގެ ޓީމު ދޫނިދޫއަށް ދިޔަ ކަމަށާއި ވަކީލުންގެ ފަރާތުން ރައީސް ނަޝީދަށް އޮތީ ދެރަ ޚަބަރެކެވެ. އެއީ ރައީސް ނަޝީދުގެ ފަރާތްޕުޅުން ވަކާލާތުކުރުމަށް އެއްވެސް ވަކީލަކަށް ކޯޓަށް ވަޑައިގެންނެވެން ނެތް ވާހަކަ ކަމަށެވެ. ސަބަބަކީ ރައީސް ނަޝީދަށް އިންސާފު ހޯދައި ދިނުމަށް މަސައްކަތްކުރެވޭނޭ އެކަށީގެންވާ މާހައުލެއް ނެތުން ކަމަށެވެ.

22 ފެބުރުއަރީ 2015 ދުވަހު ރައީސް ނަޝީދު ހައްޔަރުކޮށް އިރުކޮޅެއްގެ ތެރޭގައި ކުރިމިނަލް ކޯޓަށް ހާޒިރުކުރިއެވެ. ވަކީލެއްގެ ފުރުސަތު ލިބިދިނުމެއްނެތި ބަންދާމެދު ގޮތެއް ނިންމީ، އަޑުއެހުން ބޭއްވުމުގެ 2 ދުވަސް ކުރިން ވަކީލު ފޯމު ހުށަހަޅަންޖެހޭނޭ ކަމަށް ކުރިމިނަލް ކޯޓުގެ ގަވާއިދެއްގައި ބުނާއިރު އެ ގޮތަށް ފޯމު ހުށަހަޅާފައިނުވާތީކަމަށް ބުނެއެވެ. 22 ފެބުރުއަރީ ގައި ރައީސް ނަޝީދު ހައްޔަރުކުރާނޭކަމާއި، އެރޭގެ ވަގުތެއްގައި ކޯޓަށް ހާޒިރުކުރާނޭކަން ވަކީލުންނަށް އެނގޭނޭ ގޮތެއް ނޯންނާނެއެވެ.

މައްސަލައަށް ތައްޔާރުވާން އެކަށީގެންވާ ފުރުސަތު ލިބިދީފައެއް ނުވެއެވެ. ދިފާއުވުމަށް އެކަށީގެންވާ ވަގުތާއި ވަސީލަތް ލިބިދިނުމަކީ ހަމަ ކޮންމެ މީހަކަށްމެ ގާނޫނުއަސާސީއިން ކަށަވަރުކޮށްދޭ އަސާސީ ހައްގެކެވެ. އެ ހައްގު ރައީސް ނަޝީދަށް ލިބިދީފައެއް ނުވެއެވެ. 19 ދުވަސް ވަންދެން ހަމަ ކޮންމެ ދުވަހަކު ޝަރީއަތް ކުރިއަށް ގެންދެއެވެ. ލިޔެކިޔުންތައް ބަލާލައި ޝަރީއަތަށް ތައްޔާރުވުމަށް ވަގުތު ދިނުމަށް އެދުމުން ފަނޑިޔާރުން ނިންމެވީ، އެ މައްސަލައަކީ 2012 ވަނަ އަހަރު ހުޅުމާލޭ މެޖިސްޓްރޭޓް ކޯޓަށް ވެސް ހުށަހެޅުނު މައްސަލަ ކަމަށް ވާތީ، ވަކީލުންނަށް އެކަށީގެންވާ ވަގުތު ލިބިފައިވާކަމަށް ދެކޭ ކަމަށެވެ. އެހެންނަމަވެސް ހުޅުމާލޭ މެޖިސްޓްރޭޓް ކޯޓަށް ހުށަހެޅުނީ އެ ހާދިސާއާ ގުޅޭ އެހެން ދައުވާއެކެވެ. އެކަން ފަނޑިޔާރުންނަށް އެނގިވަޑައިގަންނަވާނެ ކަމަށް މަހްފޫޒް ވިދާޅުވިއެވެ.

12 މާޗް 2015 ދުވަހު ދޫނިދޫގައި ބޭއްވުނު އެ ބައްދަލުވުމަށް ފަހު މައްސަލައިން ތަނާޒުލުވީކަމުގެ ލިޔުން ކުރިމިނަލް ކޯޓަށް ފޮނުވާނޭ ވާހަކަ ވަކީލުން ދެންނެވުމުން ރައީސް ނަޝީދު އެކަމުގެ ހުއްދަ ދެއްވިއެވެ. އެހެންނަމަވެސް، ހުކުމުގެ ކުރިން ފާހަގަކުރަން ހުރި ގާނޫނީ ނުކުތާތައް ފާހަގަކުރުމަށް އިތުރު ވަގުތު ލިބޭތޯ ފަނޑިޔާރުން އަރިހުން އެދިވަޑައިގަންނަވާނޭ ވާހަކަ ވިދާޅުވިއެވެ. އަދި އެކަމަށް އެދިވަޑައިގެން ހުށަހަޅުއްވާނޭ ބަޔާނެއް ރައީސް ނަޝީދު އަމިއްލަފުޅަށް ލިޔުއްވިއެވެ. އެ ލިޔުމަށް ވަކީލުންގެ ފަރާތުން ބަދަލެއް ގެނެސްފައެއް ނުވާނެއެވެ. އެހެންނަމަވެސް، އެ ލިޔުމުގައިވާ ވާހަކައެއްގެ އިތުރުން، މައްސަލައިގެ ހަގީގަތްތަކާއި، ހެކިންގެ ހެކިބަހާ ގުޅޭ ގޮތުން އިތުރު އެއްޗެއް ޝަރީއަތުގައި ވިދާޅުނުވުމަށް ވަކީލުންގެ ފަރާތުން ލަފާ އަރުވާފައިވާނެއެވެ.

ނަޝީދުގެ މައްޗަށް ޓެރަރިޒަމްގެ ދައުވާ ސާބިތުވެ، މާޗް 13، 2015 ގައި ކްރިމިނަލް ކޯޓުން ހުކުމްކުރީ، އެ މަނިކުފާނުގެ ވެރިކަމުގައި ކްރިމިނަލް ކޯޓުގެ އިސް ގާޒީ އަބްދުﷲ މުހައްމަދު، ގާނޫނާ ހިލާފަށް ހައްޔަރުކޮށް، ސިފައިންގެ މަރުކަޒު، ކ. ގިރިފުށީގައި 22 ދުވަސް ވަންދެން ބަހައްޓާފައި ހުރި މައްސަލައިގައެވެ. އެހެންނަމަވެސް 2018 ވަނަ އަހަރުގެ ނޮވެންބަރު މަހު 26 ވަނަ ދުވަހު ސުޕްރީމް ކޯޓުން ވަނީ މި ހުކުމް ބާތިލްކޮށްފައެވެ.