ގާޑިޔާ ނެތިގެން މަސްކާށި ނުކެވިގެން އުޅޭކަށް ދެން ނުޖެހޭނެ!

ބޮޑުތަކުރުފާނު މަގަށް ނުކުމެލުމުން މިހާރު އެންމެ ހިތްދަތިވަނީ މީގެ އަހަރުތަކެއް ކުރިން މަގުގެ އެއް ފަރާތުން ފެންނަން ހުރި ގާޑިޔާތައް ފެންނަން ނެތުމުންނެވެ. ހަވީރު ފިންޏަށް ހިނގާލަން ނުކުމެ، ގާޑިޔާލެއްގެ ކައިރިއަށް ގޮސްނުލާ އަނބުރާ ގެއަކަށް ނުދެވެއެވެ. ރޭގަނޑު ދެމަފިރިން ދުއްވާލަން ނުކުތަސް، މިސްރާބު ޖަހާނީ ހަމަ ގާޑިޔަލެއް ދޮށަށެވެ. ކަމާކަންފަށައި ގާޑިޔަލަށް ދާން ގެއިން ނިކުންނަ މީހުންވެސް މަދެއް ނުވާނެއެވެ.

މީރު ބިލަތްގަނޑެއް ކާލަން ވިޔަސް، އަދި ކުރުނބާ ބޯން ބޭނުން ވިޔަސް އެންމެ ފުރަތަމަ ދާން ބޭނުންވާނީ ގާޑިޔަލަކަށެވެ. ގްރޫޕް ހަދާލާފައި އެންމެ ދާން ބޭނުންވާނީ މަސްކާށި ނުވަތަ މަޖާ ކާށެވެ. ގާޑިޔަލަށްދާ ވަކި އުމުރުފުރައެއް ނެތެވެ. މަސްކާށި ކާން ވީމާ ކުޑައެއް ބޮޑެއް، ޒުވާނެއް މުސްކުޅިއެއް ނޯވެއެވެ.

ގިނަ ސަބަބުތަކަކާ ހުރެ މާލޭގެ އެކި ސަރަހައްދުތަކުގައި ގާއިމްކުރެވިފައި ހުރި ގާޑިޔާތައް ވަނީ މިހާރު ނަގާފައެވެ. ހަވީރު ގަޑީގައި ކުރުނބާ ބޯން ދާނެ ގާޑިޔަލެއް އަދި ދުފުންގަޑެއް ހޯދާލަން ކައިރިކޮށްލާނެ ގާޑިޔަލެއް ނެތުމުން އެކަމާ އެތައް ބަޔަކު ހިތާމަކުރެއެވެ. ރޭގަނޑު ގްރޫޕް ހަދާލާފައި މަސްކާއްޓާއި މަޖާ ކާން ނުދެވޭތީ ގިނަ ބަޔަކު ތިބީ މާޔޫސްވެފައެވެ.

ނަމަވެސް މިހާރު މި ވަނީ މިކަމަށް ހައްލެއް ލިބިފައެވެ. ގާޑިޔާތަކުން ލިބޭނެ ހުރިހާ ޚިދުމަތަކާއިއެކު ގާޑިޔާ ކެފޭއެއް ވަނީ ހުޅުވާފައެވެ. ގާޑިޔާ ކެފޭއިން ބުނާ ގޮތުގައި ކެފޭ ހުޅުވައި ގާޑިޔާއިން ލިބޭ ޚިދުމަތްތައް ކެފޭއިން ލިބޭނެ އިންތިޒާމްތައް ހަމަޖެއްސުމުގައި އެންމެ އިސްކަމެއް ދިނީ ގާޑިޔާތަކުގެ ސާފުތާހިރުކަމާމެދު އުފެދޭ ސުވާލުތައް ހުއްޓުވައި ކެފޭގެ ޚިދުމަތްތައް ވީހާވެސް ސާފުތާހިރުކޮށް ފޯރުކޮށްދިނުމަށް ކަމަށެވެ. ޚާއްސަކޮށް މިފަދަ ބަލިމަޑުކަމެއްގެ ތެރޭގައި ކަސްޓަމަރުންނަށް ޚިދުމަތް ފޯރުކޮށްދޭއިރު، ސާފުތާހިރުކަމަކީ އެންމެ ޚާއްސަ އިސްކަމެއްދޭ ކަންތައްކަމަށް ގާޑިޔާ ކެފޭއިން ފާހަގަކުރެއެވެ.

ގާޑިޔާއިން ލިބޭ ޚިދުމަތްތައް ކެފޭއިން ފޯރުކޮށްދިނުމުގެ މަސައްކަތްކުރާއިރު، ގާޑިޔާ ކެފޭގެ އެންމެ ބޮޑު އެއް އަމާޒަކީ ވީހާވެސް އަގު ހެޔޮކޮށް، ހުރިހާ އުމުރުފުރާއަކަށްވެސް ފަސޭހައިން ހޯދޭނެ އަގުތަކުގައި ޚިދުމަތް ފޯރުކޮށްދިނުމެވެ. ގާޑިޔާތަކުން ލިބެން ހުރި ތަފާތު ބާވަތްތައް އަގުގެ ތަފާތުތައް ނެތި ކެފޭއިން ފޯރުކޮށްދެއެވެ.

ގާޑިޔާ ކެފޭއަށް ވަނުމުން އެންމެ ފުރަތަމަވެސް ލޮލުގައި އަޅައިގަންނަނީ ކުރުނބާތައް ބަހައްޓާފައި ހުރި ގާޑިޔާއެވެ. މާބޮޑު ނޫނަސް ކެފޭގެ ގާޑިޔާއިން ކުރުނބާ ލިބޭނެއެވެ. ވީހާވެސް އަވަހަށް ކަސްޓަމަރުންނަށް ހިދުމަތް ފޯރުކޮށްދިނުމަށް ގާޑިޔާ ކެފޭއިން ކުރުނބާ ހަދަން ގެންގުޅެނީ އެކަމަށް ހާއްސަކޮށް އުފައްދާފައިވާ ދިވެހި އަމިއްލަ އުފެއްދުމެކެވެ.

ކުޑައިރުއްސުރެ ވެލްޑިންގެ މަސައްކަތް ކުރަމުންއައި އަލީ ވަހީދު ވަނީ ވަޅިއެއް ބޭނުންކޮށްގެން ކުރުނބާ ހަދަން އެ ދާ ވަގުތު ކުޑަކޮށް، ފަސޭހައިން 30ށް ސިކުންތުތެރޭ ކުރުނބާ ހަދައި ކަސްޓަމަރުންނަށް ދެވޭނެ މެޝިނެއް ތައްޔާރުކޮށްފައެވެ. މީގެ ސަބަބުން ގާޑިޔާ ކެފޭއިން ކުރުނބާއެއް ހޯދާލަން މާކަ ގިނައިރެއް މަޑުކުރާކަށްވެސް ނުޖެހެއެވެ.

މީގެ އިތުރުން މީރު ސައިތައްޓެއް ނުވަތަ ކޮފީތައްޓެއް ބޯލަން ބޭނުން ނަމަ އެވެސް ގާޑިޔާ ކެފޭއިން ލިބޭނެއެވެ.

ރައްޓެހިންނާއިއެކު އުފާވެރި ވަގުތުކޮޅެއް ހޭދަކޮށްލާ، ކުޅި މަޖާތައްޓެއް ކެއުމަށްފަހު މީރު ބިލަތްގަނޑެއް ދުފާލަން ބޭނުންނަމަ ގާޑިޔާ ކެފޭއިން މިހާރު ލިބޭނެއެވެ. މަގުގެ އެކި ހިސާބުތަކުގައި ގާޑިޔާތައް ބަހައްޓާފައި ނެތަސް، މިހާރު ހިތްހަމަ ޖެހިލައިގެން، މަސްކާށި ކެވޭނެއެވެ. ގާޑިޔާ ދޮށަށްގޮސް ބިލަތްގަނޑު ގަނެލައިގެން ދުވައްލާން ދާގޮތަށް ގާޑިޔާ ކެފޭއަށް ގޮސް ޓޭކްއަވޭ ހަދާލައިގެން ދިއުމުގެ ފުރުސަތު ލިބޭނެއެވެ. އަދި ގެއިން ބޭރަށް ދާން ބޭނުން ނުވާނަމަ ޑެލިވަރީގެ ހިދުމަތްވެސް ގާޑިޔާ ކެފޭއިން ފޯރުކޮށްދޭނެއެވެ.

ގާޑިޔާ ކެފޭ ހުޅުވައިގެން އަދި މާގިނަ ދުވަސްތަކެއް ނުވިއަސް، ކެފޭގެ ހިދުމަތްހޯދާ ކަސްޓަމަރުންގެ ފަރާތުން ދަނީ ބޮޑު ތަރުހީބެއް ލިބެމުންނެވެ. އެއްފަހަރު ނަމަވެސް ގާޑިޔާ ކެފޭއަށް ގޮސްފިނަމަ އެ ކަސްޓަމަރުން ތަކުރާރުކޮށް ކެފޭގެ ހިދުމަތްތައް ހޯދަންދެއެވެ. މިހާރު ގާޑިޔާތައް ނެތަސް އެކަމާ މާޔޫސްވެގެން އުޅޭކަށް ނުޖެހެއެވެ.