ފަތުރުވެރިކަމުގެ ސިނާއަތް ގާނޫނާއި ގަވައިދުތަކަށް ވުރެ ރަނގަޅަށް ހިނގާ - މިނިސްޓަރ މައުސޫމް

ރާއްޖޭގެ ފަތުރުވެރިކަމުގެ ސިނާއަތަށް ހާއްސަކޮށް ގާނޫނާއި ގަވައިދުތައް ނުހެދިޔަސް ސިނާއަތުގައި ހަރާކާތްތެރިވާ ފަރާތްތައް އެއަށްވުރެ ރަނގަޅަށް މަސައްކަތްކުރާ ކަމަށް ޓޫރިޒަމް މިނިސްޓަރ އަބްދުﷲ މައުސޫމް ވިދާޅުވެއްޖެއެވެ.

ދިވެހި ފަތުރުވެރިކަމުގެ ރަންޔޫބީލް ފާހަގަކުރުމަށް ކުރެވޭ މަސައްކަތްތަކުގެ ތެރެއިން ރަންޔޫބީލް އަހަރުގެ ލޯގޯ ލޯންޗުކުރަން ބޭއްވި ވަރޗުއަލް ހަފްލާގައި ވާހަކަދައްކަވަމުން މިނިސްޓަރ މައުސޫމް ވަނީ ފަތުރުވެރިކަމަށް ހާއްސަކޮށް ސަރުކާރުން ހަދާ ގަވައިދުތަކުގައި އަންގާފައިވާ ގޮތަށް ވުރެ ފުރިހަމަ އަށް އެސިނާއަތުގެ ހިއްސާދާރުން ކަންތައްތައް ކުރާ ކަމަށް ވިދާޅުވެފައެވެ. އެގޮތުން މިނިސްޓަރ އެންމެ ހިތްހެމަޖެހޭ އަދި އުފާވާ އެއް ކަމަކީ ރާއްޖޭގެ ފަތުރުވެރިކަމުގެ ސިނާއަތަކީ ސެލްފް ރެގިއުލޭޓަރީ ސިނާއަތަކަށް ވުން ކަމަށް ވިދާޅުވިއެވެ.

މިނިސްޓަރ ވިދާޅުވީ ސަރުކާރުން ގާނޫނުތަކާއި ގަވައިދުތައް ހަދަނީ މިގޮތަށް ސެލްފް ރެގިއުލޭޓް ކުރުމުގައި އެއްކިބާވާ ފަރާތްތައް ގާނޫނާއި ގަވައިދުގެ ތެރެއަށް ވައްދައި ސިނާއަތުގައި ހަރަކާތްތެރިވުމުގެ ފުރުސަތުދީ ނިޒާމުގެ ތެރޭގައި މަސައްކަތް ކުރުމަށް ބާރުއެޅުމަށް ކަމަށް މިނިސްޓަރ ވިދާޅުވިއެވެ.

މި ހަފްލާގައި ވާހަކަދައްކަވަމުން މިނިސްޓަރ ވަނީ ފަތުރުވެރިކަމުގެ ރަން އަހަރު ފާހަގަކުރުމަށް ތައްޔާރީތައް ވަމުން އަންނަ އިރު، ފާއިތުވި އަހަރު އެސިނާއަތުގެ މުވައްޒަފުން އާއިލާތަކާއި ދުރުގައި ކޮށްފައިވާ އަގުހުރި މަސައްކަތް ފާހަގަކުރައްވާފައެވެ. އަދި މިހާރު މި ސިނާއަތުގެ މުވައްޒަފުންނަށް ވެކްސިން ޖެހުމުގެ ހަރަކާތް ކުރިއަށްދާއިރު، ވެކްސިންގެ ދެ ޑޯޒް ޖެހި އަވަސް މުސްތަގުބަލެއްގައި އާއިލާތަކާ ދުރުގައި އަހަރުދުވަސް ހޭދަކޮށްފައިވާ ފަރާތްތަކަށް އާއިލާތައް ކައިރިއަށް ދިއުމުގެ ފުރުސަތު ލިބިގެންދާނެ ކަމަށް އުންމީދުކުރައްވާކަމަށް މިނިސްޓަރ ވިދާޅުވިއެވެ.

ފަތުރުވެރިކަމުގެ ރަންޔޫބީލް ރަން އަހަރުގެ ގޮތުގައި އެންމެ ފުރިހަމައަށް ފާހަގަކުރެވިގެންދާނީ ސިނާއަތުގެ މަންފާ ދިވެހިންނަށް ކުރުމުން ކަމަށާއި ސަރުކާރުގެ ފަތުރުވެރިކަމުގެ ސިޔާސަތު ބައްޓަންކުރެވިފައި މިވަނީ ޕާޓްނަރޝިޕްގެ ތެރެއިން މަސައްކަތްކުރާ ގޮތަށް ކަމަށް މިނިސްޓަރ ވިދާޅުވިއެވެ. އެގޮތުން ސިނާއަތްތައް ކުރިއެރުވުމުގެ މަސައްކަތްތައް ކުރިއަށް ގެންދާނީ ސަރުކާރާއި، އަމިއްލަ ވިޔަފާރިވެރިންނާއި މުޖުތަމައު ގުޅިގެންކަމަށް މިނިސްޓަރ ފާހަގަކުރެއްވިއެވެ. އަދި ކުރިއަށް އޮތް ތަނުގައި ފަތުރުވެރިކަމުގެ ސިނާއަތުގައި ކައުންސިލްތަކުގެ ދައުރު ވަރަށް ބޮޑުވާނެ ކަމަށް މިނިސްޓަރ ވިދާޅުވިއެވެ.