އަލް އަޤްޞާގެ ކުރީގެ މުދިމު މުފްތީ ޝެއިޚް އިކްރިމާ ސަބްރީ ހައްޔަރުކޮށްފި
11 މާރިޗު 2021 | ބުރާސްފަތި 02:01ޝެއިޚް ސަބްރީ ހައްޔަރުކުރި އެއްވެސް ސަބަބެއް އިސްރާއީލުގެ ސިފައިން މިހާތަނަށް ހާމަކޮށްފައިނުވޭ
އަލް އަޤްޞާގެ ކުރީގެ މުދިމު މުފްތީ ޝެއިޚް އިކްރިމާ ސަބްރީ،
މުސްލިމުގެ ތިންވަނައަށް އެންމެ މާތް ހަރަމް، އަލް އަޤްޞާގެ ކުރީގެ މުދިމު މުފްތީ ޝެއިޚް އިކްރިމާ ސަބްރީ ހައްޔަރުކޮށްފިއެވެ.
ރިޕޯޓުތައް ބުނާ ގޮތުން، އިސްރާއީލުގެ ސިފައިން ޝެއިޚް ސަބްރީ ހައްޔަރުކޮށްފައިވަނީ ގޭގައި ހުންނަވަނިކޮށް ބުދަ ދުވަހުގެ ވަގުތެއްގައި ކަމަށެވެ. ނަމަވެސް ޝެއިޚް ސަބްރީ ހައްޔަރުކުރި އެއްވެސް ސަބަބެއް އިސްރާއީލުގެ ސިފައިން މިހާތަނަށް ހާމަކޮށްފައެއް ނުވެއެވެ.
އިސްރާއީލުގެ ސިފައިން މީގެ ކުރިންވެސް ޝެއިޚް ސަބްރީ ހައްޔަރުކޮށްފައިވެއެވެ. އޭރު ޝެއިޚް ސަބްރީ ހައްޔަރުކޮށްފައިވަނީ މަސްޖިދުލް އަގްސާގައި މުދިމުކަމުގައި ހުންނަވަނިކޮށެވެ.
ރިޕޯޓްތައް ބުނާ ގޮތުން އިސްރާއީލުގެ ސިފައިން ޝެއިޚް މިފަހަރު ހައްޔަރު ކޮށްފައިވަނީ ދީނީ ގޮތުން ޔަހޫދީންނަކީ ހަރުކަށި ފިކުރަށް ލޯބި ކުރާ ބައެއް ކަމަށް ބުނެ ދެއްކެވި ވާހަކަތަކާ ގުޅިގެންނެވެ.
އަޤްޞާ މިސްކިތަކީ އިސްލާމް ދީނުގައި ތިންވަނައަށް އެންމެ ހުރުމަތްތެރިވެގެންވާ މިސްކިތެވެ. އެހެންނަމަވެސް މި މިސްކިތަކީ ޔަހޫދީންގެ ތަނެއް ކަމަށް ބުނެ އިސްރާއީލުން އަންނަނީ އެކަމާ ދައުވާ ކުރަމުންނެވެ. އަދި އެކަމާ ނުރުހުން ފާޅުކޮށް ޝެއިޚް ސަބްރީ ވަނީ އިސްރާއީލުގެ ސިފައިންގެ އެންގުމާ ހިލާފަށް މުދިމުވެ ނަމާދު ވެސް ކޮށްފައެވެ.
އިސްރާއީލުން 1967 ވަނަ އަހަރު ވަނީ އަޤްޞާ މިސްކިތް ހުންނަ ބިމަކީ އެގައުމުގެ ބިމެއްގެ ގޮތުގައި ދައުވާ ކޮށްފައެވެ. ނަމަވެސް އެއީ ފަލަސްތީނުގެ ބިމެއް ކަމުގައި މުސްލިމު ގައުމުތަކުން އަންނަނީ ދައުވާ ކުރަމުންނެވެ. އަދި ދުނިޔޭގެ ބޮޑެތި ޖަމުޢިއްޔާތަކުން ވެސް ވަނީ އެބިމަކީ ފަލަސްތީނުގެ ބިމެއް ކަމުގައި ކަނޑައަޅާފައެވެ.
