ވިޔަފާރީގެ ރޮނގުން އިންޑިއާއާއެކު އޮންނަ ގުޅުން އިތުރަށް ބަދަހި ކުރަން ބޭނުން – ބަންގްލަދޭޝް

ވިޔަފާރީގެ ރޮނގުން އިންޑިއާއާއެކު އޮންނަ ގުޅުން އިތުރަށް ބަދަހި ކުރަން ބޭނުންވާ ކަމަށް ބަންގްލަދޭޝްގެ ކޮމާސް މިނިސްޓަރ ޓިޕޫ މުންޝީ ވިދާޅުވެއްޖެއެވެ.

އިންޑިއާގެ ބޮޑުވަޒީރު ނަރެންދުރަ މޯދީ ބަންގާޅަށް މި މަހު ކުރައްވަން ހަމަޖެހިފައިވާ ދަތުރުފުޅުގެ ކުރިން އެގައުމުގެ މީޑިއާއަކަށް ދެއްވި އިންޓަރވިއުއެއްގައި މުންޝީ ވިދާޅުވީ މިއަހަރަކީ އިންޑިއާއާ ބަންގްލަދޭޝްއާ ދެމެދު ވިޔަފާރީގެ ގުޅުން ގާއިމުކުރިތާ 50 އަހަރު ފާހަގަކުރާ އަހަރު ކަމަށާއި، މި ގުޅުން އިތުރަށް ވަރުގަދަކުރުމަށް ބަންގްލަދޭޝްގެ ސަރުކާރުން ބޭނުންވާ ކަމަށެވެ.

މުންޝީ ވިދާޅުވީ އިންޑިއާއާއެކު ޒަމާނުއްސުރެ ވިޔަފާރީގެ ބޮޑެތި ޕްރޮޖެކްޓްތައް ހިންގިފައިވާ ކަމަށާއި، އިންޑިއާއަކީ ބަންގްލަދޭޝްގެ ވިޔަފާރީގެ އެންމެ ބޮޑު ހިއްސާދާރު ކަމަށެވެ. އަދި ކުރިޔަށް އޮތް ތަނުގައި މި ގުޅުން މިގޮތަށް ފަނޑުވުމެއް ނެތި އޮންނާނެކަމުގެ ޔަގީންކަން އެބައޮތްކަމަށްވެސް މުންޝީ ވިދާޅުވިއެވެ.

މޯދީގެ ދަތުރުފުޅުގައި ވިޔަފާރީގެ ބޮޑު ދެ ޕްރޮޖެކްޓެއްގައި ސޮއި ކުރެވިގެންދާނެ ކަމަށާއި، އެ ދެ ޕްރޮޖެކްޓާއިއެކު ބަންގްލަދޭޝްގެ އިގްތިސާދަށް ބޮޑެތި ބަދަލުތަކެއް އަންނާނެކަމަށް މުންޝީ ވިދާޅުވިއެވެ. އަދި އިންޑިއާގައި ބަންގްލަދޭޝްގެ ކުންފުނިތަކުން ކުރިޔަށްވުރެ ފުޅާދާއިރާގައި އިންވެސްޓު ކުރުމަށް އިތުރު ދޮރުތަކެއް މި ޕްރޮޖެކްޓްތަކުގެ ސަބަބުން ލިބޭނެކަމުގެ ޔަގީންކަން އެބައޮތްކަމަށް މުންޝީ ވިދާޅުވިއެވެ.