ރައީސް އޮފީހުން ފައިސާ ނަގައިގެން ކުށްވެރިއަކު ދޫކޮށްލާފައި ނުވާނެކަމުގެ ފުރިހަމަ ޔަޤީންކަން އެބައޮތް: ރައީސް

ރައީސް އޮފީހުން ފައިސާ ނަގައިގެން ކުށްވެރިން ދޫކޮށްލަމުންދާކަމަށް ދެކެވޭ ވާހަކަތައް ރައީސުލްޖުމްހޫރިއްޔާ އިބްރާޙިމް މުޙައްމަދު ސޯލިޙު ދޮގު ކުރައްވައިފިއެވެ.

ޖަލުގައި ތިބޭ ކުށްވެރިން ދޫކުރުމަށް ރައީސް އޮފީހުގެ ތެރެއިން ލާރި ނަގަމުންދާކަމަށް ދެކެވޭ ވާހަކައާއި ގުޅިގެން ނޫސްވެރިއަކު ކުރި ސުވާލަކަށް ޖަވާބު ދެއްވަމުން ރައީސް ސޯލިޙު ވިދާޅުވީ، ޖަލުގައި ތިބި ކުށްވެރިންނަށް މާފު ދިނުމުގައި އަމަލުކުރާ ވަކި ގޮތްތަކެއް ހުންނަ ކަމަށެވެ. އެގޮތުން ކްލެމެންސީ ބޯޑުން ފޮނުވައިގެން ލުއި ދެއްވާފައިވާ ޤައިދީން ތިބޭނެކަން ފާހަގަ ކުރައްވައި ރައީސް ވިދާޅުވީ، އެކަމުގައިވެސް ކަރެކްޝަންސްގެ ލަފާ ހޯއްދަވާކަމަށެވެ.

ރައީސް އިތުރަށް ވިދާޅުވީ، ރައީސް އޮފީހުން ފައިސާ ނަގައިގެން ކުށްވެރިއަކު ދޫކޮށްލާފައި ނުވާނެކަމުގެ ފުރިހަމަ ޔަޤީންކަން އެބައޮތް ކަމަށެވެ.

ރައީސް އެހެން ވިދާޅުވެފައިވާއިރު، މަޖިލީހަށް އެންމެ ގިނައިން ސިޓީ ފޮނުވާ އެއްބަޔަކީ ޖަލުތަކުގައި ތިބޭ ގައިދީންކަމަށް ރައްޔިތުންގެ މަޖިލީހުގެ ރައީސް، މުހައްމަދު ނަޝީދު ވަނީ ދާދި ފަހުން ވިދާޅުވެފައެވެ. ރައީސް ނަޝީދު ވިދާޅުވީ 9 ނޮވެމްބަރު 2020ގައި ޖުޑީޝަރީ ކޮމިޓީން މާފު ދިނުމާއި އަދަބު ލުއި ކޮށްދިނުމަށް އެދި އިލްތިމާސް ހުށަހަޅާ ފޯމު ހުށަހެޅުމަށްފަހު ޖަވާބެއް ނުލިބި ލަސްވަމުން ދާކަން ފާހަގަކޮށް ކޮމިޓީއަށް ފޮނުވާފައިވާ ސިޓީތައް ކޮމިޓީގެ އަމިއްލަ އިސްނެގުމުގެ މަތިން ދިރާސާކޮށް ނިންމި ރިޕޯޓެއް މަޖިލީހުގެ ތަޅުމަށް ފޮނުވި ކަމަށެވެ.

އަދި މަޖިލީހުގެ ތަޅުމުން އެ ރިޕޯޓު ފާސްކޮށްފައިވާކަމަށާއި ރިޕޯޓުގައި ކޮމިޓީން ފާހަގަކޮށްފައިވާ ކަންކަމާއި ހުށަހަޅާފައިވާ ކަންކަން ސިޓީއަކުން ކަމާގުޅޭ އިދާރާތަކުގައި އަދި ރައީސުލްޖުމްހޫރިއްޔާގެ އޮފީހުގައި ދެންނެވިފައި ވީނަމަވެސް މި ކަންކަމަށް އަމަލީ ސިފައެއް އަންނަމުން ނުދާކަމަށް މަޖިލީހުގެ ރައީސް ވިދާޅުވިއެވެ. މީގެ އިތުރުން މިކަމާ ގުޅިގެން އެތައް ބައެއް ކަންބޮޑުވުން ފާޅުކުރަމުންދާކަމަށް ރައީސް ނަޝީދު ވިދާޅުވިއެވެ. ރައީސް ނަޝީދު ވަނީ އެ މައްސަލަ ދިރާސާކުރުމަށް ޖުޑީޝަރީ ކޮމިޓީއަށް ފޮނުއްވަވާފައެވެ.