މީޑިއާ ސްޓަންޓެއް؟ - ކުރަނީ ބަނޑުހައި ހޫނުކަމުގެ ހަޅުތާލު، އެކަމަކު ތިބެނީ ކައިގެން!
ބަނޑުގައި ހޫނުކަމުގައި އެއްވެސް ގައިދީ އަކު ނެތް
ގައިދީން، ކަރެކްޝަންސް
މިދިޔަ ހަފްތާގެ އާދިއްތަ ދުވަހެވެ. ކޮންމެ ދުވަހަކު ވެސް އޮފީހަށް އައިސް އާދައިގެ މަތިން މީސް މީޑިއާ ހާވާލީމެވެ. ދުވަހުގެ މަސްރަހާއި ޚަބަރު ދަބަރާ މެދު އާއްމުންގެ ޚިޔާލު ހުރި ނެތް ގޮތް ބަލާލުމަށްޓަކައެވެ. އަދި މިހާރު ފޯނާއި ޓެކްނޮލޮޖީގެ އެހީގައި ކޮންމެ މީހަކީވެސް ނޫސްވެރިއެއް ކަަމަށް ވުމުން އަޅުގަނޑުގެ ނަޒަރުން ގެއްލިފައިވާ ކަމެއް މީސްމީޑިއާ އިން ފެނިދާނެ ކަމުގެ އުންމީދުގައެވެ. ފަލަ ސުރުޚީގައި ޓްވިޓަރ އާއި ފޭސްބުކް އަދި ވައިބަރ ފަދަ ދިވެހިން ގިނަ ޕްލެޓްފޯމުތަކުގައި އެނބުރެމުން ދިޔަ ޚަބަރަކުން ނިކަން ހާސްވެއްޖެއެވެ.
އެ ޚަބަރަކީ މާފުށީ ޖަލުގައި ހަޅުތާލުކުރާ ކަމުގެ ވާހަކައެވެ. މާފުށީ ޖަލުގައި ގައިދީން ބަނޑުހައިހޫނުކަމުގެ ހަޅުތާލެއް ކުރަމުންދާ ކަމަށް އަޑު ފެތުރުނު އިރު އެކަމުގެ ތަފްސީލުތައް ކިޔާލުމުން ލިބުނު ހާސްކަންވީ ބޮޑެވެ. މީސްމީޑިއާގައި އާދިއްތަ ދުވަހު ދައުރުވެފައިވާ ވާހަކަތަކަށް ބަލާއިރު މާފުށީ ޖަލުގެ ހަރުކަށި ޔުނިޓުގައި ތިބި ގައިދީން ބަނޑުހައިހޫނު ކަމުގެ ހަޅުތާލު ކުރަމުންދާ ކަމަށް އަޑު ވަނީ ފެތުރިފައެވެ. އަދި އެ ގައިދީންގެ ޝަކުވާތައް އަޑު އަހާނީ ކެއުމުން ކަމަށް އެ ގައިދީންނަށް އަންގާފައިވާ ކަަމަށް ވެސް ވަނީ އަޑު ފެތުރިފައެވެ. ބައެއް މީޑިއާތަކުން ރިޕޯޓްކޮށްފައިވާ ގޮތުގައި ހަޅުތާލުކުރަން ފަށާފައި ވަނީ ގައިދީންނަށް ދެ ގަޑިއެއްގެ ކެއުން ނުދިން މައްސަލައިގައެވެ.
މިއީ ދެން ކިހާ ދެރަ ކަމެއްތާއެވެ. ގައިދީންނެއް ކަމަކު ހަމަގައިމު ވެސް ހައްގުތަކެއް ކަށަވަރުކޮށްދީފައި އެބަހުއްޓެވެ. އަމުދުން ހައިހޫނު ކަން މަތީ ތިބި ބައެއްގެ ޝަކުވާ އަޑު އަހާނީ ވެސް ކެއުމުން ކަމަށް ބުނުން އެއީ ކަންބޮޑު ނުވާންވީ ކަމެއް ނޫނެވެ. އެކަމަކު މުއައްސަސާ އެއް ގައިދީން ކުރިމަތީގައި ކުޑަކަކޫ ޖެހުން ވެސް އެއީ ރީތި މަންޒަރެއް ނޫނެވެ. ކޮންމެއަކަސް ވެގެން އުޅޭ ގޮތެެއް ބަލަން އަވަސް އަވަހަށް ކަރެކްޝަންސްގެ މީޑިއާ އޮފިސަރަށް ގުޅައިފީމެވެ.
އެކަމާއި ގުޅިގެން ކަރެކްޝަންސް އިން މީޑިއާ އަށް ބުނީ އެއްވެސް ގައިދީ އެއް ނުކައި ހުރި ކަމުގެ މައުލޫމާތު ލިބިފައި ނުވާ ކަމަށެވެ. އެހެންނަމަވެސް ޔުނިޓް 11ގައި ހުރި ކަންބޮޑުވުންތަކެއް ފާހަގަކުރެވިފައިވާ ކަމަށާއި އެކަމާއި ގުޅިގެން ކުރަން ޖެހޭ މަސައްކަތްތައް ކުރަމުންދާ ކަމަށް ކަރެކްޝަންސް އިން ވަނީ ބުނެފައެވެ. ތަންކޮޅެއް ތިލަކޮށް އިތުބާރު ހުރި ބައެއް މަސްދަރުތަކާއި ވާހަކަދައްކާލުމުން އެނގުނީ މާ ހައިރާން ކުރުވާ ކަމެކެވެ. އެ ބުނާ ގައިދީން ކުރަނީ ބަނޑުހައި ހޫނުކަމުގެ ހަޅުތާލު ކަމަށް މީސްމީޑިއާ އަށް ޚަބަރު ދީފައި އެ ގައިދީން ތިބެނީ ކައިގެންނެވެ. މިއީ ހަމަގައިމުގެ ދުނިޔޭގެ އެއްވެސްތާކު ބަނޑުހައި ހޫނުކަމުގެ ހަޅުތާލު ކުރާ ގޮތެއް ނޫނެވެ.
މިވެރިން މި ހަދާ ވަޑާމަކީ ކަރެކްޝަނުން ކެއުން ހިފައިގެން އަންނަ އޮފިސަރުންނަށް ޖަލު ތެރެއަށް ވަނަ ނުދީފައި، އެ ކެއުން ކާން އިންކާރު ކުރަނީއެވެ. ގައިދީންނަށް ހަފްތާ އަކު އެއް ފަހަރު އަމިއްލަ އަށް ކާން އެއްޗެހި ގަންނަން ފުރުސަތު ލިބެއެވެ. މި ބުނާ ގައިދީން ކަނީ އެ ފުރުސަތުގައި ގަންނަ ކާ އެއްޗިއްސެވެ. ތެދެކެވެ. ޖަލުން ދޭ ކާއެއްޗެހި ނުކައި ތިއްބެވެ. އެ ކަމަކު ބަނޑުހައި ހޫނުކަން މަތީ ހުރި ކަމަ އެންމެ ގައިދީ އެއްވެސް ނެތެވެ.
އެހެންވިއްޔާ ދެން މިކަހަލަ ވާހަކަ ފަތުރައިގެން ހޯދަން ބޭނުމީ ކޮން މަންފާއެއް ބާއެވެ؟ އަޅުގަނޑަށް ފެންނަ ފެނުމުގައި ބޭނުންވީ ސުރުޚީއެކެވެ. ބޭނުންވީ ސަމާލުކަމެވެ. މިއަށް ސިޔާސަ، ނޫނީ ސިޔާސީ ސްޓަންޓު ނޫން ދެން އެެހެންނަމެއް ދޭނެ ގޮތެއް ނުވިސްނުނެވެ. އަދި އެއް ވާހަކަ އެބަ އޮތެވެ. ޖަލުގައި ތިބޭ މީހުން ޖަލުން ބޭރަށް މިފަދަ ވާހަކަތައް ވަގުތުން ވަގުތަށް ފޯރުކޮށްދޭ ގޮތެއް ވެސް ހޯދެން ވެއްޖެއެވެ. ސިޔާސީ މަންފާ އާއި އެ ނޫން މަންފާތަކަށްޓަކައި އާއްމުން ހާސްކުރުވުމާއި، މުއައްސަސާތަކަށް ދުއްތުރާ ކުރަން ގައިދީންނަށް ވެސް ފުރުސަތު ދީގެން ނުވާނެއެވެ.
