ސަސްޕެންޝަނުގައި ހުންނަވާތާ އަށް މަސްދުވަސް ފަހުން ކަރެކްޝަންސްގެ އެސިސްޓެންޓް ކޮމިޝަނާ އޮފް ޕްރިޒަންސް މުހައްމަދު އާސިފް މަޤާމުން ވަކިކޮށްފިއެވެ.

އިތުބާރު ހުރި ފަރާތަކުން މައުލޫމާތު ލިބިފައިވާ ގޮތުގައި އޭނާ އެ މަޤާމުން ވަކިކޮށްފައި ވަނީ ނިމިދިޔަ ހަފްތާގެ ތެރޭގައެވެ.

އެސިސްޓެންޓް ކޮމިޝަނަރ އޮފް ޕްރިޒަންސް މުހައްމަދު އާސިފް ސަސްޕެންޑް ކޮށްފައިވަނީ ހިޔާނާތުގެ މައްސަލައަކާއި ގުޅިގެން ކަމުގެ މައުލޫމާތު ވަނީ ލިބިފައެވެ. އެގޮތުން ޕްރިޒަންސް ކްލަބްގެ ލައްކައަކަށް ވުރެ ގިނަ ފާއިސާ އެ ކްލަބްގެ ރައީސް އަދި އެސިސްޓެންޓް ކޮމިޝަނަރ އޮފް ޕްރިޒަންސް އާސިފް އަމިއްލަ ކަންކަމަށް ބޭނުންކުރެއްވި ކަމަށް ތުހުމަތުކޮށް މުވައްޒަފުންގެ ފަރާތުން މައްސަލައެއް ހުށަހެޅިއެވެ.

އޭނާ ވަކިކުރީ ބަލަން ޖެހޭ ކަންކަން ބެލުމަށް ފަހުގައި ކަމަށް ކަރެކްޝަންސް އިން ބުނެއެވެ.

2024 ވަނަ އަހަރުގެ ޖުލައި މަހުގެ ތެރޭގައި ފެންމަތިވި މިމައްސަލައިގައި އާސިފަށް ކުރާ ތުހުމަތުގައިވާ ގޮތުން އޭނާ ވަނީ ޕްރިޒަންސް ކުލަބުގެ އެކައުންޓުން ދެ ލައްކައަށް ވުރެ ގިނަ ރުފިޔާ ނަގާފައެވެ. އަދި އެ ފައިސާ އެކިއެކި އެކައުންޓުތަކަށް ޖަމާކުރި ކަމަށް ތުހުމަތުކޮށްފައިވެ އެވެ.

އަދި މި މައްސަލަ ކަރެކްޝަނުން ބަލާފައިވެސްވެއެވެ. މުވައްޒަފުން ފޮނުވި ޕެޓިޝަނުގައި ވަނީ އާސިފް ނެގިކަމަށް ތުހުމަތުކުރި ފައިސާ އަނބުރާ ހޯދުމާ އެކު އާސިފަށް ފިޔަވަޅު އަޅައިދިނުމަށެވެ.

2024 ވަނަ އަަހަރުގެ ނޮވެމްބަރ މަހުން ފެށިގެން އާސިފް ސަސްޕެންޑްކޮށްފައިވާއިރު، އެޗްއާރުގެ ހުއްދަ ނެތި އެ އިދާރާގެ އެއްވެސް އިމާރާތަކަށް ނުވަނުމަށް ވަނީ އަންގާފަ އެވެ.

އާސިފް އޭސީޕީގެ މަގާމަށް އައްޔަންކޮށްފައި ވަނީ 2019 ވަނަ އަހަރުގެ ސެެޕްޓެމްބަރު މަހުއެވެ.