އަލިފާނުގެ ހާދިސާގެ އަސަރު އެއްވެސް ގައިދީއަކަށް ނުކުރޭ، ޖަލުގެ ހާލަތު ރަނގަޅު: ކަރެކްޝަންސް
މީޑިއާ އޮފިސަރު އާމިނަތު ޔުސްރީން ވިދާޅުވީ ނީލަން ފިހާރައިގައި ހިނގި ހާދިސާ އާއި ގުޅިގެން ގައިދީންނަށް ކުރިމަތިވެދާނެ ހާލަތަކަށް ތައްޔާރުވެފައިވާ ކަމަށް
އަލިފާނުގެ ހާދިސާ ހިނގި ސަރަހައްދު
ނީލަން ފިހާރަތައް ހުންނަ ސަރަޙައްދުގައި ހިނގި އަލިފާނުގެ ޙާދިސާއާ ގުޅިގެން މާލޭ ޖަލުގެ އެއްވެސް ގައިދީއަކަށް ސިއްހީ މައްސަލަ އެއް ކުރަމަތިވެފައި ނުވާ ކަމަށް ކަރެކްޝަންސް އިން ބުނެފިއެވެ.
ރާއްޖެ އެމްވީ އަށް މައުލޫމާތުދެއްވަމުން ކަރެކްޝަންސްގެ މީޑިއާ އޮފިސަރު އާމިނަތު ޔުސްރީން ވިދާޅުވީ ނީލަން ފިހާރައިގައި ހިނގި ހާދިސާއާ ގުޅިގެން ގައިދީންނަށް ކުރިމަތިވެދާނެ ހާލަތަކަށް ތައްޔާރުވެފައިވާ ކަމަށެވެ. އެެހެންކަމުން އެހީތެރިކަން ބޭނުންވާ ގައިދީންނަށް އެ ފަދަ ހާލަތެއްގައި ފުރިހަމަ އަށް އެހީތެރިކަން ލިބޭނެ ކަމަށް އޭނާ ވިދާޅުވިއެވެ. ޖަލުގެ ހާލަތު ރަނގަޅު ކަމަށް ވެސް ޔުސްރީން ފާހަގަކުރެއްވިއެވެ.
މާލޭ ޖަލު ހުންނަނީ އަލިފާނުގެ ހާދިސާ ހިނގި ސަރަހައްދާއި ދާދި ކައިރީގައެވެ. ނީލަން ފިހާރަިގައި ރޯވި ޙާދިސާ ހިނގާފައިވަނީ ހޯމަ ދުވަހުގެ ފަތިހުގެ ވަގުތެއްގައެވެ. އެ ސަރަޙައްދުގައި ރޯވެފައިވާ ކަމުގެ މައުލޫމާތު ފުލުހުންނަށް ލިބިފައިވަނީ ހެނދުނު 5:45 ހާއިރުއެވެ. އެ ހާދިސާގައި މާލެ ސިޓީ ކައުންސިލުގެ އެކޮމޮޑޭޝަން ބްލޮކެއްގައިވެސް ރޯވެ އެތަން ވަނީ އެއްކޮށް އަނދާ ހުލި ވެފައެވެ. އަލިފާންގަނޑު އެއްކޮށް ކޮންޓްރޯލު ކުރެވުނީ 10 ޖެހި ފަހުންނެވެ.
މިހާތަނަށް މި ހާދިސާގައި އެއްވެސް މީހަކަށް އަނިޔާވެފައި ނުވާ ކަމަށް ކަމާއި ބެހޭ އިދާރާތަކުން ވަނީ ބުނެފައެވެ.
