ދައުލަތުގެ އެހީގައި އައްޔަންކުރާ ވަކީލުންނަށް ދިމާވާ ދަތިތައް ހައްލުކުރުމާގުޅޭ އެއްބަސްވުމެއް

ދައުލަތުން ޤާނޫނީ ވަކީލެއްގެ އެހީތެރިކަން ފޯރުކޮށްދޭ ޖިނާއީ މައްސަލަތަކުގައި ލިޔެކިއުންތައް ލިބުމުގައި ވަކީލުންނަށް ދިމާވާ ދަތިތައް ހައްލު ކުރުމަށް އެޓަރނީ ޖެނެރަލް އިބްރާހިމް ރިފްއަތާއި ޕްރޮސިކިއުޓަރ ޖެނެރަލް ހުސައިން ޝަމީމް އެއްބަސްވުމެެއްގައި ސޮއި ކުރައްވައިފިއެވެ.

އޭޖީ އޮފީހުން ބުނީ ބުދަ ދުވަހު ސޮއިކުރި އެމްއޯޔޫގެ ސަބަބުން ދައުލަތުން ޢައްޔަންކުރާ ޤާނޫނީ ވަކީލަށް މައްސަލައިގެ ލިޔެކިއުންތައް އެޓަރނީ ޖެނެރަލްގެ އޮފީހުން ފޯރުކޮށްދިނުމުގައި ދިމާވާ ދަތިތައް ނައްތާލައި، އަވަސް މުއްދަތެއްގެ ތެރޭގައި އެ ލިޔެކިއުންތައް އެޓަރނީ ޖެނެރަލްގެ އޮފީހަށް ލިބޭގޮތަށް ހަމަޖެހިގެންދާނެ ކަމަށެވެ.

ޤާނޫނުއަސާސީގައި ބުނެފައިވާ ގޮތުން ޖިނާއީ ބޮޑެތި މައްސަލަތަކުގައި ތުހުމަތުކުރެވޭ، މީހުންނަށް ވަކީލެއްގެ އެހީތެރިކަން ހޯދޭފަދަ މާލީ ތަނަވަސްކަމެއް ނެތް މީހުންނަށް ދައުލަތުގެ އެހީގައި ވަކީލުން ހަމަޖައްސަންޖެހޭނެއެވެ. އަދި ކުޑަކުދިންގެ ޢަދުލުގެ ޤާނޫނުގައި ބުނެފައިވާ ގޮތުން ހައްޔަރުކުރާ ކުދިންގެ ތެރެއިން ޤާނޫނީ ވަކީލެއް ހަމަޖެއްސެން ނެތް ކުދިންނަށްވެސް ވަކީލުން ހަމަޖައްސަންޖެހޭނީ ދައުލަތުންނެވެ. އަދި އެ މަސައްކަތް ކުރަމުން ގެންދަނީ އެޓަރނީ ޖެނަރަލްގެ އޮފީހުންނެވެ.

ޤާނޫނީ ވަކީލެއްގެ އެހީތެރިކަން ހޯދުމަށް އެދި އޭޖީ އޮފީހަށް ހުށަހެޅޭ މައްސަލަތަކުގެ ޢަދަދު ވަރަށް ބޮޑުތަން އިތުރުވެގެން ގޮސްފައިވާކަން ފާހަގަކޮށް، އޭޖީ އޮފީހުން ބުނީ ޤާނޫނީ އެހީތެރިކަން ދިނުމަށް ޝަރުޠު ފުރިހަމަވެގެން، ދައުލަތުން ޤާނޫނީ ވަކީލު ޢައްޔަންކޮށްދިން ނަމަވެސް، ލިޔެކިއުންތައް ލިބުމުގައި ޢައްޔަނުކުރެވޭ ޤާނޫނީ ވަކީލުންނަށް ދަތިތަކެއް ކުރިމަތިވާ ކަމަށެވެ. ނަމަވެސް މިއަދު ޕީޖީ އޮފީހާއެކު ވެވުނު އެއްބަސްވުމުގެ ސަބަބުން، އެ މައްސަލަތަކަށް ހައްލު ލިބިގެންދާނެ ކަމަށް އޭޖީ އޮފީހުން ބުންޏެވެ.