މާލޭ މީހުންނަށް ގޯތިދިނުމަށް ބިމެއް ހިއްކަނީ، ލޯނު ނެގުމުގެ މަސައްކަތް އަންނަނީ ކުރަމުން
އެމަޝްރޫޢު އިއުލާންކުރައްވާނީ ރައީސްކަމަށް އަސްލަމް ވިދާޅުވި
މާލެ ސިޓީ
މާލޭގެ ރައްޔިތުންނަށް ގޯތިދިނުމަށް ބިން ހިއްކުމުގެ މަޝްރޫޢެއް ކުރިޔަށް ގެންދިޔުމަށް ހަމަޖެހިފައިވާކަމަށް ހައުސިން މިނިސްޓަރު މުހައްމަދު އަސްލަމް ވިދާޅުވެއްޖެއެވެ.
ބުދަ ދުވަހު އޮތް ރައްޔިތުންގެ މަޖިލީހުގެ ޖަލްސާގައި ވަޒީރުންނާ ސުވާލުކުރުމުގެ އެޖެންޑާގެ ދަށުން ގަލޮޅު އުތުރު ދާއިރާގެ މެމްބަރ އީވާ އަބްދުﷲ ވަނީ ފާއިތުވި ހަފްތާގައި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު މާލޭގެ ރަށްވެހިންނަށް ގޯތިދެވޭނެ ގޮތެއް ބައްލަވާކަމަށް ވިދާޅުވެފައިވާތީ އެކަމުގެ ވިސްނުން ސަރުކާރުގައި ހުރިގޮތާއި ޓައިމްލައިނާ ގުޅޭގޮތުން މިނިސްޓަރ އަރިހުން ސުވާލުކުރައްވާފައެވެ. އެސުވާލަށް ޖަވާބު ދެއްވަމުން މިނިސްޓަރ ވިދާޅުވީ ރައީސް އިޝާރާތްކުރެއްވި މަޝްރޫޢަކީ މާލޭގެ ރައްޔިތުންނަށް ގޯތި ދިނުމަށް ސަރުކާރުން ގެންގުޅޭ އެހެން ވިސްނުމެއްކަމަށެވެ.
އެކަމުގައި ސަރުކާރުން ގެންގުޅޭ ވިސްނުމަކީ އިތުރު ބިމެއް މާލޭގެ ރައްޔިތުންނަށް ޚާއްސަކުރުން ކަމަށާއި ނަމަވެސް އެމަޝްރޫޢު އިއުލާންކުރައްވާނީ ރައީސްކަމަށް އަސްލަމް ވިދާޅުވިއެވެ.
މިނިސްޓަރ އަސްލަމް މިމޭރުމުން ޖަވާބު ދެއްވުމުން ރިޔާސަތުގައި އިންނެވި މަޖިލީހުގެ ރައީސް ވިދާޅުވީ އެމީހަކަށް އެނގިހުރި އެއްޗެއް ސާފުކޮށްދިނުމަކީ ބޭނުންތެރި ކަމެއް ކަމަށެވެ. އެހެން ވިދާޅުވެ މިމަޝްރޫޢުގެ އިތުރު ތަފްސީލު ވަނީ ރައީސް ނަޝީދު ދެއްވާފައެވެ. އެގޮތުން މިމަޝްރޫޢު ކުރިޔަށް ގެންދިޔުމަށްޓަކައި ބޭނުންވާ ލޯނު ނެގުމުގެ މަސައްކަތް ސަރުކާރުން ކުރަމުން ގެންދާ ކަމަށް ރައީސް ނަޝީދު ވިދާޅުވިއެވެ.
މާލޭ ރައްޔިތުންނަށް ބޯހިޔާވަހިކަން ފޯރުކޮށްދިނުމަށް ބިމެއް ހިއްކާނެކަން މިސަރުކާރުން ހާމަކޮށްފައިވާއިރު ރައީސް އަބްދުﷲ ޔާމީން ސަރުކާރުން ވެސް ވަނީ މާލޭގެ ރައްޔިތުންނަށް ގޯތި ދިނުމަށްޓަކައި މާލޭގެ ދެކުނުން އޮންނަ ފުށިދިއްގަރުފަޅު ހިއްކުމުގެ ޕްލޭނެއް ގެންގުޅެފައެވެ
