ރައީސް މުއިއްޒުގެ އަންޑަރ ގްރައުންޑް ޕާކިންގ ހަގީގަތަކަށް ނުވި

ބާ ޖަމާލުއްދީން ސްކޫލް ހުރި ބިމުގައި އަންޑަގްރައުންޑް ޕާކިންއާއެކު މައިޒާނެއް ހެދުމަށް ރައީސް ޑރ މުހައްމަދު މުއިއްޒު ކަނޑައެޅުއްވި ޕްލޭން ފަނުފުލުން ހިނގެއްޖެ އެވެ.

ރައްޔިތުންގެ މަޖިލީހުގެ އިންތިހާބާ ދިމާކޮށް އިފްތިތާހު ކުރެވުނު މި މަޝްރޫއަކީ މުއިއްޒުގެ މެނިފެސްޓޯގައި ހިމެނުނު މުހިންމު ވައުދެކެވެ.

މި މަޝްރޫއުގެ ދަށުން ބާ ޖަމާލުއްދީން ސްކޫލް ހުރި ބިމުގެ އަޑީގައި ވެހިކަލްތަކަށް ޕާކުކުރެވޭ ގޮތަށް އިމާރާތެއް ހަދައި، އޭގެ މަތީގައި ރައްޔިތުންނަށް ހިތްފަސޭހަ މައިޒާނެއް ގާއިމުކުރުމަށް ވަނީ ރޭވިފައެވެ.

މާލޭ ސިޓީ ކައުންސިލާ ގުޅިގެން ތަންފީޒުކުރަން ފެށުނު މި މަޝްރޫއުގެ ދަށުން މިހާތަނަށް ކުރެވިފައިވަނީ ހަމައެކަނި ކުރެހުންތައް ދައްކާލުމާއި އިފްތިތާހީ އިވެންޓެއް ބޭއްވުން އެކަންޏެވެ. މިއަދު އެ ސަރަހައްދު އޮތީ ހަނަފަސް ބިމެއްގެ ގޮތުގައެވެ.

މީގެ ކުރިން މުއިއްޒުގެ މޭޔަރުކަމުގައި ވެސް މާލޭގެ ހަ ސަރަހައްދެއްގައި ޕާކިން ބިލްޑިންތައް އެޅުމަށް ވަނީ ރޭވިފައެވެ. ނަމަވެސް އޭރުގެ ސަރުކާރުން އެއްބާރުލުން ނުލިބުމުގެ ސަބަބުން އެ މަޝްރޫއުތައް ކާމިޔާބު ނުވީ ކަމަށް ރައީސް މުއިއްޒު ވަނީ ވިދާޅުވެފަ އެވެ.

މިދިޔަ އަހަރުގެ ޖެނުއަރީ މަހު، މާލޭ ސިޓީ ކައުންސިލްގެ އާ މޭޔަރާއި ކައުންސިލް މެންބަރުން ހުވާކުރުމުގެ ދަރުބާރުގައި ރައީސް މުއިއްޒު ވިދާޅުވެފައިވަނީ އޭޕްރީލް މަހާ ހިސާބުގައި މާލޭގައި ޕާކިން ބިލްޑިންތައް އެޅުމުގެ މަސައްކަތް ފެށޭނެ ކަމަށެވެ. އެހެންނަމަވެސް، އެ ވިދާޅުވުމަށް މިހާރު ދޮޅު އަހަރަށްވުރެ ގިނަ ދުވަސްވެގެން ގޮސްފައިވާއިރުވެސް އެއިން އެއްވެސް ޕާކިން ބިލްޑިންއެއްގެ މަސައްކަތެއް ފެށިފައެއް ނުވެއެވެ.

މާލޭގެ ޕާކިން މައްސަލައަކީ އަހަރުތަކެއް ވަންދެން ހައްލެއް ނުލިބި ދިގުލައިގެން ގޮސްފައިވާ މައްސަލައެކެވެ. އެކި ވެރިކަމުގައި މި މައްސަލަ ހައްލުކުރުމަށް ގިނަގުނަ ވައުދުތައް ވެފައިވީ ނަމަވެސް، އަދިވެސް މި މައްސަލައަށް ދާއިމީ ހައްލެއް ލިބިފައެއް ނުވެއެވެ.