ސްޓެލްކޯގެ މުވައްޒަފުންނަށް އެޕާޓްމަންޓް ދޫކުރުމާ ގުޅޭ އުސޫލު އަލުން މުރާޖައާކުރުމަށް އަނބުރާ ކޮމިޓީއަށް
މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރއަށް މިކަންކަން ބެލުމަށް އެންގުމަށް ކޮމިޓީން ނިންމާފައިވޭ
އެސްއޯއީ ކޮމިޓީގެ ބައްދަލުވުން
ސްޓޭޓް އިލެކްޓްރިކް ކޮމްޕެނީ ލިމިޓެޑްގެ މުވައްޒަފުންނަށް ބޯހިޔާވަހިކަން ފޯރުކޮށްދިނުމަށް ޢިމާރާތްކުރާ ފްލެޓްތަކުގެ މައްސަލައާއި މުވައްޒަފުންނަށް ހެލްތް އިންޝުއަރެންސް ދެމުން ގެންދަވާ އުސޫލާ ގުޅޭގޮތުން ހުށަހަޅާފައިވާ މައްސަލަ އަލުން ދިރާސާކުރުމަށް އެ މައްސަލަ އަނބުރާ ސްޓޭޓް އޯންޑް އެންޓަރޕްރައިސަސް ކޮމިޓީއަށް ފޮނުވައިފިއެވެ.
ބުދަ ދުވަހުގެ ރައްޔިތުންގެ މަޖިލީހުގެ ޖަލްސާގައި މި މައްސަލަ އަލުން ދިރާސާ ކުރުމަށް އެސްއޯއީ ކޮމިޓީއަށް ފޮނުވާފައިވަނީ އެކަމަށް ނެގުނު ވޯޓުގައި ބައިވެރިވި 52 މެންބަރުންގެ އިއްތިފާގުންނެވެ. މި މައްސަލަ އަނބުރާ ކޮމިޓީއަށް ފޮނުވަން ހުށަހަޅާފައިވަނީ ހެންވޭރު ހުޅަނގު ދާއިރާގެ މެންބަރު ހަސަން ލަތީފެވެ.
އަންގާރަ ދުވަހުގެ ރައްޔިތުންގެ މަޖިލީހުގެ ޖަލްސާގައި ކޮމިޓީގެ މުގައްރިރު ހުޅުދޫ ދާއިރާގެ މެންބަރު އިލްޔާސް ލަބީބް ވަނީ މި މަސައްލަ އެ ކޮމިޓީން ދިރާސާކޮށް ނިންމި ގޮތުގެ ރިޕޯޓު އިއްވާފައެވެ.
މީގެ އިތުރުން ސްޓެލްކޯގެ މުވައްޒަފުންގެ ތެރެއިން ފްލެޓް ޙައްޤުވާ މުވައްޒަފުންނަށް ފްލެޓް ލިބިގެންދާނެ ގޮތަކަށް މުވައްޒަފުންނަށް އެޕާޓްމަންޓް ދޫކުރުމަށް އެކުލަވާލެވިފައިވާ އުސޫލު މުރާޖަޢާކޮށް މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ހުއްދަ ލިބިގެން މެނުވީ ފްލެޓް ދިނުމުގެ ކަންކަން ކުރިޔަށް ނުގެންދިޔުމަށް ސްޓެލްކޯއަށް އެންގުމާއެކު މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރއަށް މިކަންކަން ބެލުމަށް އެންގުމަށް ނިންމާފައިވާ ކަމަށެވެ.
ހުޅުދޫ ދާއިރާގެ މެންބަރު އިލްޔާސް ލަބީބް އިތުރަށް ވިދާޅުވީ މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރއާއެކު މަޝްވަރާ ކުރުމަށްފަހު ސްޓެލްކޯގެ މުވައްޒަފުންގެ ތެރެއިން ފްލެޓް ޙައްޤުވާ މުވައްޒަފުން ކަނޑައެޅުމަށްފަހު، ފްލެޓް އިތުރުވާނަމަ، ސަރުކާރުގެ ސިޔާސަތުގެ ތެރެއިން އެ ފްލެޓްތައް ދޭނެ ނިޒާމެއް ކަނޑައެޅުއްވުމަށް ސްޓެލްކޯއަށް ދެންނެވުމަށް ވެސް ނިންމާފައިވާ ކަމަށެވެ.
އަދި ސްޓެލްކޯގައި މަސައްކަތްކުރާ، ގިނަ ދުވަސްވީ އަދި ބޯހިޔާވެހިކަމުގެ ދަތިކަން ތަޙައްމަލުކުރަން ޖެހިފައިވާ މުވައްޒައްފުންނަށް ބޯހިޔާވެހިކަމަށް އެދި ކުރިމަތިލުމުގެ ފުރުޞަތު ހަނިވާގޮތަށް އުސޫލުތައް އެކުލަވާލާފައިވާ ފަރާތްތަކާ މެދު ފިޔަވަޅު އެޅުމަށް އެންޓި-ކޮރަޕްޝަން ކޮމިޝަނަށް ދެންނެވުން ހިމެނޭ ކަމަށް މެންބަރު ވިދާޅުވިއެވެ.
މީގެ އިތުރުން އިންޝުއަރެންސް ޚިދުމަތަކީ ރެޖިސްޓަރ ކުރެވިގެން ކުންފުނިތަކުން ދޭ ޚިދުމަތަކަށް ވުމުން، އިން-ހައުސްކޮށް ހެލްތު އިންޝުއަރެންސް ޚިދުމަތް ދިނުމަކީ ބެސްޓް-ޕްރެކްޓިސް ނޫންކަމަށް ކޮމިޓީއަށް ފެންނާތީ، އިން- ހައުސްކޮށް ހެލްތު އިންޝުއަރެންސް ޚިދުމަތް ދިނުމުގެ ބަދަލުގައި ދިވެހިރާއްޖޭގައި ޤާއިމުވެފައިވާ އިންޝުއަރެންސް ނިޒާމުގެ ތެރެއިން އިންޝުއަރެންސްގެ ޚިދުމަތް ކުރިޔަށް ގެންދިއުމަށް ސްޓެލްކޯއަށް އެންގުމަށް ނިންމާފައިވާ ކަމަށެވެ.
