ސްޓެލްކޯ ގެ ސުޕަވައިޒަރެއްގެ ގޮތުގައި މަސައްކަތް ކުރަމުން އައި އުމުރުން 43 އަހަރުގެ އަހުމަދު އަޒްމީލް ނިޔާވި އިރު ފަރުވާދެމުން އައީ ބެންކޮކް ހޮސްޕިޓަލްގަ
ނިޔާވި ސްޓެލްކޯ މުވައްޒަފު އަލްމަރުޙޫމް އަޙްމަދު އަޒްމީލް
ހުޅުމާލޭގައި ހުންނަ ސްޓެލްކޯ ބާ އިންޖީނު ގޭގައި މިދިޔަ ނޮވެމްބަރު 26 ގައި ހިނގި އަލިފާނުގެ ހާދިސާ ގައި ފިހުނު އެ ކުންފުނީގެ މުވައްޒަފު ތައިލެންޑު ގައި ފަރުވާދެނިކޮށް ބުރާސްފަތި ދުވަހު ނިޔާވެއްޖެ އެވެ.
ސްޓެލްކޯގެ ސުޕަވައިޒަރެއް ގެ ގޮތުގައި މަސައްކަތް ކުރަމުން އައި އުމުރުން 43 އަހަރުގެ އަހުމަދު އަޒްމީލް ނިޔާވި އިރު ފަރުވާދެމުން އައީ ބެންކޮކް ހޮސްޕިޓަލްގަ އެވެ. އިތުރު ފަރުވާއަށް އޭނާ ތައިލެންޑަށް ގެންގޮސްފައި ވަނީ ނޮވެމްބަރު 30 ގަ އެވެ.
ހާދިސާ ހިނގި ދުވަހު ސްޓެލްކޯއިން ނެރުނު ބަޔާނެއްގައި ބުނީ އެ ހާދިސާ ހިނގީ ސްވިޗް ގިއަރަކަށް ދިމާވި މައްސަލަ އެއް ހައްލު ކުރުމުގެ މަސައްކަތް ކުރަމުން ދަނިކޮށް ކަމަށެވެ. ސްވިޗް ގިއަރަކީ ގްރިޑުތަކަށް ކަރަންޓު ދިނުމަށް ބޭނުންކުރާ އެއްޗެއް ކަމަށާއި، އެއީ އާންމު ގޭގެއަށް ކަރަންޓު ދިނުމަށް ބޭނުންކުރާ ބްރޭކަރު ފަދަ އެއްޗެކެވެ.
އަލިފާނުގެ ހާދިސާ ހިނގަން މެދުވެރިވި ސަބަބު، އެ ކުންފުނިންނާއި ފުލުހުން ވެސް ތަހުގީގު ކުރަމުންދާ ކަމަށް އެ ބަޔާނުގައި ބުންޏެވެ. އަދި އެކަމާ ގުޅިގެން ފުލުހުން ހިންގާ ތަހުގީގަށް ފުރިހަމަ އެއްބާރުލުން ދޭނެ ކަމަށް ސްޓެލްކޯއިން ބުންޏެވެ. މިހާތަނަށް މި ތަހުގީގުގެ އެއްވެސް ތަފުސީލެއް ފުލުހުން އަދި ސްޓެލްކޯއިން ހާމަކޮށްފަ އެއް ނުވެ އެވެ. ނިޔާވި އަޒްމީލް ވަނީ 21 އަހަރަށް ވުރެ ގިނަ ދުވަހު ސްޓެލްކޯ އަށް ހިދުމަތް ކޮށްފަ އެވެ.
